LECTURAS DEL SÁBADO 25 DE ENERO
24 enero, 2020LECTURAS DEL LUNES 27 DE ENERO
26 enero, 2020LECTURAS DEL DOMINGO 26 DE ENERO
Primera lectura:
Ko’ágä ñahendúta Tupä Ñandejára ñe’ẽ Isaías arandukápe oĩ háicha
8, 23__ 9,3
Iñepyrũrã Tupä Ñandejára oheja vai Zabulón ha Neftalí yvy, oĩva tetã nguéra ypýpe, ha upéi omoakã rapu’ã jevy. Umi yvy ojepyso Jordán mboypýri guive, yguasu rembe’y peve.
Tetãgua oikóva pytũmbýpe, ohecha peteï mba’e rendy tuicháva;
umi pytũmbýpe oikóva ári, ohesape upe mba’e rendy.
Remongakuaa tory, ha heta ojevy’a.
Opavave ovy’a ne renondépe, kóga ñemono’õme ramo guáicha,
ovy’a háicha umi oñomboja’óva opa mba’e ñorairõme guare rehe.
Mba’e pohýi ijati’ýre oĩva, mba’e pohýi ijape rehe oguapýva,
inupãhára po pegua yvyra, remoangu’ipa, Madiánpe ramo guaréicha.
Tupä Ñandejára Ñe’ẽ.
SALMO ÑEMBOHOVÁI 26, 1. 4. 13-14
R. Tupä Ñandejára upe che rekove ohesapéva, ha upe che pytyvõva.
Tupä Ñandejára upe che rekove ohesapéva, ha upe che pytyvõva.
Mávagui piko akyhyjéta? Tupä Ñandejára oñangareko che rehe,
Máva piko che mongyhyjéta? R.
Peteï mba’énte Tupä Ñandejárape ajerure, peteï mba’énte aipota.
Tupaópe aikose aikove aja pukukue,
hese ajepy’a mongeta haguã, ha’e che mbopy’a rory haguã,
ichupe amomba’e guasu haguã. R.
Aikuaa Tupä Ñandejára imba’e porãtaha che ndive
aikove aja pukukue.
Perovia Tupä Ñandejárape, pende py’a guasúke ha ani pene ate’ỹ.
Añetehápe ha’e peëme, pejerovia Tupä Ñandejára rehe. R.
Segunda lectura:
Ñahendúta Tupä Ñandejára Ñe’ẽ San Pablo ohai va’ekue ikuatia peteïhápe Corinto guápe
1, 10-14. 16-17
Che pehẽngue kuéra, Ñandejára Jesucrísto rérape ajerure peëme maymáva peiko haguã jekupytýpe ha ani pejoavypa oñondive. Peiko porã oñondive, pejepy’a mongeta ha peñeñandu peteïcha. Ha’e peëme péicha, che pehẽngue kuéra, aikuaágui Cloe rogagua rupi, oĩha jeiko vai pende apytépe.
Ha’ese, oimeha he’íva: “Che Pablo rehegua”, ambue katu “Che Apolos rehegua”, ambue “Che Cefas rehegua”, ha oimeve he’íva “Che Cristo rehegua”. Cristo nga’u piko oñemboja’opa? Pablo nga’u piko ojehupi kurusu rehe pende rehehápe? Térã piko peñe mongarai ra’e Pablo rérape? Ame’ẽ che aguyje Tupä Ñandejárape mavave peëme namongaraíri hague rehe, Crispo ha Gayo rire!
Tupä Ñandejára Ñe’ẽ.
ALELUIA Cf. Mt 4, 23
Aleluia.
Jesús oiko yvy Galilea rupi, ha oporombo’e umi judío kuéra tupao rupi.
Ha’e omoherakuã marandu porã oñe’ẽva Tupä Ñandejára sãmbyhýre.
Hetápe avei omonguera opaichagua mba’asy ha mba’e vaígui.
Aleluia.
EVANGELIO
Ko’ágä ñahendúta Ñandejára Jesucrísto rekove ha hemimbo’e San Mateo omombe’u háicha.
Pejapysaka porãtapa hese? 4, 12-23
Upe ramo Jesús ohendúvo Juan oñemoakãsã hague, oho jevy yvy Galiléape. Osẽ táva Nazarétgui ha oho opyta Cafarnaúmpe, peteï táva oĩva yguasu rembe’ýpe, Zabulón ha Neftalí ñemoñare kuéra ypýpe. Upéva ojehu oiko haguã heko itépe umi mba’e maranduhára Isaías omoĩ va’ekue kuatia rehe he’i ramo:
Zabulón ha Neftalí ñemoñarekuéra yvy opytáva yguasu gotyo
ysyry Jordán mboypýri!
Nde, yvy Galilea, ambue tetãgua oikohápe!
Umi yvypóra nde pypegua, oiko va’ekue pytũmbýpe,
ohecha tesape tuicháva.
Tesapeha peteï ohesapéva umi omanóma va’ekuéicha oikóvape.
Upe guive Jesús oñepyrũ oñemoñe’ẽ ha he’i:
Pejevy Tupä Ñandejára gotyo. Hi’aguĩma hína ñesãmbyhy yvágagui oúva.
Jesús oguata jave oikóvo yguasu Galilea rembe’y rupi, ohecha mokõi ojoryvýpe, Simón hérava avei Pedro ha Andréspe. Ha’e kuéra niko pira renohẽha, ha oity hína hikuái ipyaha ýpe. Jesús he’i ichupe kuéra:
Peju che moirũ, ha che pombo’éta penohẽ haguã pende rapichápe jejopy vaígui.
Upepete voi oheja hikuái umi pyaha, ha oho hendive.
Ha Jesús ohovévo upégui, ohecha jevy mokõi ojoryvývape, Santiago ha Juan, Zebedeo ra’y kuérape. Ha’e kuéra oĩ hína itúva ndive ha omoatyrõ umi ipyaha kuéra kanóape. Jesús ohenói ichupe kuéra, ha upepete voi oguejy hikuái ikanóagui, oheja itúvape, ha omoirũ Jesúspe.
Jesús oiko yvy Galilea rupi, ha oporombo’e umi judío kuéra tupao rupi. Ha’e omoherakuã marandu porã oñe’ẽva Tupä sãmbyhy rehe. Hetápe avei omonguera opaichagua mba’asy ha mba’e vaígui.
Ñandejára Jesucrísto Ñe’ẽ.
O bien más breve:
Ko’ágä ñahendúta Ñandejára Jesucrísto rekove ha hemimbo’e San Mateo omombe’u háicha.
Pejapysaka porãtapa hese? 4, 12-17
Upe ramo Jesús ohendúvo Juan oñemoakãsã hague, oho jevy yvy Galiléape. Osẽ táva Nazarétgui ha oho opyta Cafarnaúmpe, peteï táva oĩva yguasu rembe’ýpe, Zabulón ha Neftalí ñemoñare kuéra ypýpe. Upéva ojehu oiko haguã heko itépe umi mba’e maranduhára Isaías omoĩ va’ekue kuatia rehe he’i ramo:
Zabulón ha Neftalí ñemoñarekuéra yvy opytáva yguasu gotyo
ysyry Jordán mboypýri!
Nde, yvy Galilea, ambue tetãgua oikohápe!
Umi yvypóra nde pypegua, oiko va’ekue pytũmbýpe, ohecha tesape tuicháva.
Tesapeha peteï ohesapéva umi omanóma va’ekuéicha oikóvape.
Upe guive Jesús oñepyrũ oñemoñe’ẽ ha he’i:
Pejevy Tupä Ñandejára gotyo. Hi’aguĩma hína ñesãmbyhy yvágagui oúva.
Ñandejára
Jesucrísto Ñe’ẽ.