LECTURAS DEL DOMINGO DUODÉCIMO TIEMPO ORDINARIO

LECTURAS DEL DOMINGO DUODÉCIMO TIEMPO ORDINARIO

MAITEI OÚVAPE – Saludo

Ñandejára ñanembopy’a guasu ivaívove la pórte. Ha Jesús he’i ñandéve ani haguã jakyhyje, ñande Ru yvágapegua oñangarekoha ñande rehe. Ñañemandu’ami avei ko árape ñande colecta pe ñame’ẽva ohóta Roma pe, Karai Papa Francisco oipytyvõ haguã heseve umi tetã oikotevẽvape.

COLECTA ÑEMBO’E

Tupã Ñandejára, ehupytyka oréve toroikove opa ára ne mborayhúpe ha toromomba’e nde réra marangatu, nde py’a porã rupi nda ore rejáiva umi remoĩva imbareteve hagua ne mborayhu rupive.

Nde Ra’y Hesukrísto rupive, Tupã Ñandejaraite, oikovéva ha ipu’akapáva nendive Espíritu Sánto ñemopeteĩme, yma, ko’ágã ha opa araite.

ÑAHENDU ÑANDEJÁRAPE
LECTURA PETEÎHA:
Motivación: Proféta Jeremías kontráriokuéra ou vove hi’ári ha’e ojerovia Ñandejárare, ha oñembo’e asy Tupãme ani haguã ho’a ipópekuéra.

Ko’ágã ñahendúta Tupã Ñandejára ñe’ẽ Jeremías arandukápe oĩ háicha 20, 10-13

Upérõ profeta Jeremías he’i: Ikatu ahendu oñeñe’ẽ ngururu ramo. “Opa rupi ojekyhyjepa guasu!” He’i hikuái: “Jagueraha ñambojovake ichupe!”

Che irũ teéva jepe oipota añepysãnga vai.

He’i hikuái: “Ikatu mba’éko ojavy. Upéma ramo ñande pu’akáta hese ha ñamyengoviáta ichupe”.

Nde katu, che Jára, reime che ndive kuimba’e py’a guasúicha ñorairõme. Ho’áta umi che rehe oñemoĩva ha ndaipu’aka mo’ãi che rehe. Opa mba’e osẽ vaíta ichupekuéra ha itĩndýta opytávo, opa ára ojaho’íta ichupekuéra ñemotĩ opave’ỹva.

Che Jára nde pu’akapáva, nde reporohekora’ãva teko jojápe, nde rehechava yvypóra py’apy, ehechaukána chéve mba’éichapa reporonupã, nde pópe niko amoĩ che rekove.

Peropurahéi Ñandejárape, perohory ichupe! Ha’e niko oipe’a ojepy’apývape iñañáva poguýgui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 69, 8-10. 14. 17.33-35
Opavave: Tupã, ne mborayhu tuichagui ehendu che ñembo’e.

Nde rehehápe niko heta mba’e ahasa, ha ñemotĩ mante ha’u.
Che ryke’ykuéra mba’eve ndoikuaaséi che hegui,
che rógape okaragua ramo aiko.
Nde tupao ahayhúgui che piru che kã,
ha nde rehe oñeñe’ẽ vai ramo, che rehe oñeñe’ẽ hína. O.

Tupã, ndéve niko añembo’e reju haguã che pytyvõ.
Ne mborayhu niko tuicha, eju che nohẽ ajejopy vaihágui.
Tupã, ne mborayhu tuichágui ehendu che ñembo’e.
Nde che poriahuverekógui ejapysaka che rehe. O.

Imboriahúva ohecha ha ovy’a, ikyre’ỹne umi Tupã rehe ojeroviáva.
Tupã ojapysaka imboriahúva rehe,
ha nomboykéi umi iñapytĩmby oikóva.
Yvága, yvy ha umi y tomomba’e Tupãme, ha opa ipype oikóva. O.

LECTURA MOKÕIHA:
Motivación: Pe Adán pekádo ñande rupyty háicha opavavépe, upéicha avei pe tekove pyahu oguerúva Jesús ñande rupyty opavavépe ha ñande salva.
Ñahendúta Tupã Ñandejára Ñe’ẽ San Pablo ohai va’ekue Roma guápe 5, 12-15

Che pehenguekuéra: Peteĩ kuimba’e año rupi, niko oike pe angaipa apo ko yvy ári. Ha upe angaipa apo rape rupi, oike pe mano. Ha upéicha, mano ohasa opavavépe, opavave iñangaipa rupi.

Tembiapoukapy oĩ mboyve, oĩma va’ekue angaipa ko yvy ári. Angaipa apo ndojererekói mba’eve ramo, ndaipóri ramo tembiapoukapy.
Upéicha ramo jepe, Adán ára guive Moisés peve, mano oguahẽ opa yvypórape, umi hembiapo vai’ỹvape jepeve, ojehu haguéicha Adánpe, peteĩ tembiapoukapy ojapo’ỹ hague rehe. Adán ojogua hína, pe upe rire oútavape.

Pe Adán rembiapo vaikue ndaikatúi ñambojoja, pe jopói Tupã ome’ẽ va’ekue rehe ñandéve. Peteĩva angaipa rehe año heta omano va’ekue, ha pe mba’e Tupã ome’ẽ va’ekue ñandéve reiete katu, peteĩ año rupi, Jesucrísto, upéva tuichave mba’e ha iporã opavavépe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 15, 26b. 27a
Aleluia.
Pe Espíritu oikuaaukáva mba’eichaguápa Tupã ha oúva che Rúgui. Ichupe amboúta peẽme che Rúgui ha ha’e oñe’ẽta che rehehápe. Ha Peẽ avei peñe’ẽta che rehehápe.
Aleluia.

EVANGELIO
Motivación: Jesús he’i ñandéve ani haguã jakyhyje avavetégui, ñande ñaimégui Ñandejára pópe opa araite. Péva ñanembopy’aguasu.

Ñahendúta Ñandejára Jesucrísto rekove ha hemimbo’e San Mateo omombe’u háicha 10, 26-33

Opavave: Romomba’e guasu ndéve, Ñandejára.

Upérõ Jesús he’i idisípulo kuérape: Ani pekyhyje avavégui. Opa mba’e oñemívako ojekuaapa vaerã ágã. Ha opa mba’e okañýva ojehecha vaerã ágã.

Ko’ã mba’e ha’éva peẽme pytũmbýpe, pehenduka peẽ araitépe. Ha umi mba’e ha’éva peẽme pende apysápe, perosapukái opa rupi. Ani pekyhyje umi ikatúvagui ohundi pende rete, ha ikatu’ỹva ohundi pene ánga. Pekyhyje Ñandejáragui, ikatúva pene rundi Aña retãme.

Mokõi guyra’i niko mba’eve ndovaléi. Péicharõ jepe nomanói Ñandejára ndoipotái ramo. Pene akãrague peteĩ-teĩ jepe niko ha’e oikuaapa. Aníke aipo ramo pekyhyje, peẽ niko mba’e guasueteve hína heta guyra’ígui.

Peẽ pemombe’u ramo peẽ che disípuloha, che ave amombe’úne che Rúpe peẽ che mba’eha. Peje ramo pende jehe ndaha’eiha katu, che ha’éne che Rúpe ndapoikuaaiha.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.