LECTURAS DEL DOMINGO PRIMERO DE CUARESMA

LECTURAS DEL DOMINGO PRIMERO DE CUARESMA

PRIMERA LECTURA:

Ko’ágä ñahendúta Tupä Ñandejára ñe’ẽ Génesis arandukápe oĩ háicha 9,8-15

Tupä Ñandejára he’i avei Noé ha ita’ýrakuérape:

“Ko’ágã añe’ẽ me’ẽ pene ndive ha pene ñemoñarekuéra ndive, ha avei tymbakuéra, guyraKuéra ha opa oikovéva osẽ va’ekue ygára guasúgui ndive. Che ñe’ẽ ame’ẽva peëme: águive, avave nomano mo’ãvéi y oporoaho’ipáva rupi, ha y ndojaho’i mo’ãvéi yvy. Techaukaha ramo añe’ẽ me’ẽ hague peëme opa árape guarã, amoẽ araíre jy’ýi. Ajaho’i ramo araípe ko yvy ha ojehecha araíre che jy’ýi, che mandu’áta che ñe’ẽ rehe, upe ame’ẽva peëme ha tekove kuéra yvy ári guápe ha ndaipóri mo’ãvéi y ojaho’ipátava yvy.

Tupä Ñandejára Ñe’ẽ.

SALMO ÑEMBOHOVÁI 25, 4-5b. 6. 7b-9

R.Tupä, ehechauka chéve umi nde rape, ha umíva rupi che sãmbyhy.

Tupä Ñandejára , ehechauka chéve umi nde rape,
ha umíva rupi che sãmbyhy.
Che mbo’e umi mba’e añete guáva. Ndéko hína che Jára. R.

Ñandejára, ani nde resarái ne mborayhu ha nde poriahuverekógui,
reñandúva ore rehe opa árape.
ani nde resarái che hegui, ne mborayhu niko tuicha. R.

Tupä Ñandejára niko imba’e porã ha imarangatu,
upéva rehe oheko mbo’e heko vaívape.
Imboriahúvape oisãmbyhy ani haguãtei ojavy,
ha hápe rehe ichupe kuéra omboguata. R.

SEGUNDA LECTURA:

Ñahendúta Tupä Ñandejára Ñe’ẽ San Pedro aranduka peteï hápe oĩ háicha 3, 18-22

Che pehenguekuéra:
Cristo jepe niko omano ñane angaipa rehe, peteï jevy opa ára guarã. Ha’e na iñangaipái va’ekue, ha umi iñañáva rupi ohasa asy, pende reraha haguã peëme Tupä Ñandejára rendápe. Yvypóra háicha omano ha oikove jevy espiritu háicha. Ha upéicha oho omoherakuã osẽ porã hague, umi espíritu ojeheko jopy va’ekuépe.

Umíva naiñe’ẽ rendúi va’ekue yma, Noé oikoveha árape, Tupä Ñandejára oha’arõ ramo hína py’a guapýpe, ojejapo aja pe ygára guasu, 8 yvypóra oipysyrõ haguépe hekove y rupive. Ha upe y upéva niko ohechauka va’ekue Upéma ramo pe y ñañemongaraiha ñande pe’áva jejopy vaígui.

Pe ñemongarai nda ha’éi ipotĩ haguãñande rete, upéva hína jajerure haguã Tupä Ñandejárape ta ipotĩñande py’apy Jesucrísto oikove jevy rupi, ha ojupi va’ekue yvágape, oĩ haguã Tupä Ñandejára akatúape, ha opyta haguã iguýpe umi Tupä Ñandejára remimbou, ha opa espíritu ipokatúva ha ikatúva oporoguereko ipoguýpe.

Tupä Ñandejára Ñe’ẽ

ACLAMACIÓN Mt 4, 4b

“Nda ha’éi tembi’u añónte oikotevẽva yvypóra oikove haguã, opa ñe’ẽ Tupä Ñandejára jurúgui osẽva rehe avei oikotevẽ”.

EVANGELIO

Ko’ágä ñahendúta Ñandejára Jesucrísto rekove ha hemimbo’e San Marcos omombe’u háicha. Pejapysaka porãtapa hese? 1, 12-15

Espíritu ogueraha Jesúspe yvy ojeiko’ỹháme. Upépe opyta 40 ára tymba saite apytépe. Oipy’a ra’ã ichupe Satana, ha Tupä Ñandejára remimbou kuéra ou oipytyvõ haguã ichupe.
Juan oñemoakãsã rire, Jesús oho Galiléape omoerakuã haguã Tupä Ñandejára marandu porã. He’i: “Oguahẽma upe ára oje’e va’ekue, ha Tupä Ñandejára sãmbyhy hi’aguĩma. Pejevy Tupä Ñandejára gotyo ha perovia pe marandu porã”.

Ñandejára Jesucrísto Ñe’ẽ.