LECTURAS DEL DOMINGO SEGUNDO DE ADVIENTO

LECTURAS DEL DOMINGO SEGUNDO DE ADVIENTO

LECTURA PETEÎHA:
Ko’ágã ñahendúta Tupã Ñandejára ñe’ẽ Isaías arandukápe oĩ háicha 11, 1-10

Upéro Jesé ñemoñare oipysóta hakã, hapógui heñóita hoky pyahu. Ñandejára espíritu hi’ári opytáta, arandu ha akã porã espíritu, ñemoñe’ẽ kuaa ha mbarete espíritu, mba’e kuaa ha Ñandejára mbyaje espíritu.

Opa mba’épe iñe’ẽ rendúta Ñandejárape, noporombojovake mo’ãi váicha rehe reínte, ha pe oje’énteva nohendu mo’ãi. Ombojovake ramo ikangývape, tekojoja oipurúta, ha imboriahúvape hekópe omohendáta.

Imbaretesévape, oinupãta iñe’ẽme tukumbópe ramo guáicha, ha pe iñañávape ipytúhẽme ojukáta. Tekojojáta iku’a jokuaha, ha teko jeroviaha humby ñuãha.

Aguara guasu ovecha ra’y ndive oikóta, jaguarete ha kavara ra’y ojoyke rehe oñenóta, vaka ra’y ha león okarúta oñondive, ha mitã’i oñangarekóta hesekuéra.

Vaka ha óso oikóta oñondive ha ita’ýrakuéra oñenóta ojoykére, guéicha avei león ho’úta kapi’i. Mitã kambu oñemboharáita mbói chumbe kuára ári, ha mitãkambu ikuápe opo’ẽta. Ndaipóri mo’ãi ñembyai térã sarambikue che yvyty marangatúpe, henyhẽtagui pe tetã Ñandejára kuaapýgui, y omyenyhẽ háicha yguasu.

Upe árape Jesé rapo, opu’ãta mba’e rechaukaha ramo tetãnguéra apytépe guarã. Tetãnguéra ohekáta upéva, ha omimbipáta upe hekoha.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 72, 1-2. 7-8. 12-13. 17
Opavave: Nde rekovépe ta ipoty tekojoja ha ta ñeañua py’aguapy.
Ñandejára, eme’ẽ mburuvicha guasúpe tekojoja ha mburuvicha guasu ra’yrépe teko potĩ,
ikatu haguãicha ne retã oisãmbyhy tekojojápe, ha imboriahúvape hekopete. O.

Nde rekovépe ta ipotyjera tekojoja ha ta neañua py’aguapy, jasy opaha ára peve.
toĩ ipo guýpe peteĩ ysyry guasu guive ambue peve, ha ysyry guasu guive opaha peve arapy. O.

Ha’e oguenohẽta mboriahu oñepomõivape ha ipy’amirĩvape jejopy vaígui,
Ipy’aporãta ikangýva ha mboriahu ndive ha hekove ipombytépe omoĩta ndorekói ramo mamo oho haguã. O.

Héra rehe tapiaite toĩ mandu’a ha iñemoñare toikove tapiaite kuarahýicha.
tojehovasa ipo rupi mayma tetãnguéra, ha umíva to myerakuã ichupe vy’apópe. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue Roma guápe 15, 4-9

Che pehenguekuéra: Opa mba’e ojehai va’ekue yma Ñandejára rérape, ojehai ñande reko mbo’e haguã, ta ikatu teko mbarete ha py’a pytu’u jahupity umi mba’e oje’éva rupi, ñaha’arõkuaa haguã. Ha Ñandejára teko mbarete ha py’a pytu’u ome’ẽva, ta pene pytyvõ peiko haguã joayhúpe, Ñandejára Jesucristo oiko haguéicha, upéicha peteĩ py’ápe ha peteĩ ñe’ẽme perohory haguã Tupãme, Ñandejára Jesucrísto Rúpe.

Aipóramo, peñoipytyvõke torypápe, Cristo peneipytyvõ haguéicha avei peẽme, ikatu haguãicha ojajái Tupã. Ikatu ave ha’e peẽme, Cristo ou hague oñemomirĩ umi judío rehehápe, oñemoañete haguã ñe’ẽ oñeme’ẽ va’ekue ñande rukuéra ypykuépe, ha ojehechauka upéicha
Tupã nopyrũiha iñe’ẽ rehe ha avei, umi judio’ỹva oguerohory haguã Tupãme iporiahuvereko kuaa rehe.

Upéicha ombo’e Ñandejára Ñe’ẽ he’ívo: “Upéva rehe roguerohorýne opa tetã apytépe Ñandejára, ha apurahéine nde rérape”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Lc 3, 4. 6.
Aleluia.
Pembosako’i Ñandejárape háperã pejapo ichupe tape ikarẽ’ỹva.
Opavave ohechane Tupã oporopysyrõha”.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Mateo omombe’u háicha 3, 1-12

Opavave: Romomba’e guasu ndéve, Ñandejára.

Umíva umi árape Juan Bautista oñemoñe’ẽ oikóvo pe desiértore, Judéape. He’i:— Pehejáke pende pekádo. Cháke hi’aguĩma hína Ñandejára Réino.

Ko Juan rehe niko proféta Isaías imandu’a va’ekue, he’i ramo guare: “Oĩ osapukáiva desiértore ha he’íva: ‘Pembosako’i Ñandejárape haperã, pejapo chupe tape ikarẽ’ỹva.’”

Juan ao niko ojejapo va’ekue kaméllo raguekuégui ha iku’a jokuaha katu vakapínte va’ekue. Hembi’u katu tuku ha eíra ka’aguy. Opavave Jerusalén ha Judeagua osẽ hendápe ohendu haguã mba’épa he’i. Ou ave hendápe umi Jordán rembe’ýre oikóva. Oñemombe’u hikuái ipecádogui, ha Juan omongarai chupekuéra Jordánpe.

Juan ohechávo umi fariséo ha umi saduséo hetakue oúva oñemongarai haguã, he’i chupekuéra: — Peẽ Aña rymba. Mávaiko he’i peẽme pekañytaha pe ñenupã Ñandejára omboútavagui peẽme. Peikóna ojehecha haguãicha pende rehe pejevyha Ñandejára gotyo. Ani peimo’ã peje haguére “Oréko Abraham ñemoñare” ndojehu mo’ãiha peẽme mba’eve.

Cháke ha’e peẽme, Ñandejára ikatu ko’ã itágui jepe ojapo Abrahámpe iñemoñarerã. Cháke, hácha ojeitýtama yvyra máta rapóre. Opa yvyra máta hi’a porã’ỹva ojeitýta ha ojehapýta. Che niko ýpente pomongarai, peheja haguére pende pekádo.

Upe oútava che rire katu pene mongaraíta Espíritu Santo ha tatápe. Ha’e ipu’akave chehegui. Chéve nda’ijái ipy reheguánte jepe arahávo chupe. Pála ipópe, ha’e ombovevéta ikoga’a ra’ỹi hakãnguégui. Oñongatúta pe ha’ỹingue ha ohapýta umi hakãngue tata ogue’ỹvape araka’eve.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.