LECTURAS DEL JUEVES 06 DE FEBRERO

LECTURAS DEL JUEVES 06 DE FEBRERO

Ko’ágä   ñahendúta Tupã Ñandejára ñe’ẽ Reyes arandukápe oĩ háicha              

                    2, 1-4. 10-12

Hi’aguĩma ramo hi’ára paha, David oheko mbo’e ita’ýra Salomónpe kóicha: “Che aháma upe tape ohoha rupi opavave. Ta nde py’a guasu ha eikóke kuimba’éicha. Ejapóke opaichagua Tupä nde Jára rembiapoukapy oĩ háicha Moisés kuatia ñe’ẽme, oho porã haguã ndéve opa mba’e rejapóvape ha mamo rehohápe. Avei Tupä Ñandejára omoporã jevy haguã upe iñe’ẽ ome’ẽ va’ekue chéve he’ívo: ‘Nde ra’y kuéra oikórõ hekópe ha oguata ramo che rapére añetehápe ha ipy’a ite guive, katu ete oĩ va’erã peteĩ ne ñemoñaréva oisãmbyhýtava Israel guápe.’

David omano ha oñeñotỹ itúva kuéra ypykue ndive David távape. Oiko Israel ruvicha guasúrõ 40 áño pukukue, umívagui 7 Hebrónpe ha 33 Jerusalénpe. Upéi oisãmbyhy Salomón itúva David rendaguépe, ha ndaipóri omongúiva ichupe iguapyhágui.

Tupã Ñandejára Ñe’ẽ.

SALMO ÑEMBOHOVÁI  I Crónicas29, 10-11ab. 11d- 12d

R. Ñamomba’e guasu Tupã Ñandejárape

Jehovasapyre hína Tupä Ñandejára

“Roguerohory opa árape guarã, nde Tupã ore ru Israel Jára! Opa ite árape. R.

Nde niko Ñandejára, nde tuicha ha nde pokatu, nde pópe oĩ opa mba’e ha nde reko mimbipa ndaijojahái! Opa mba’e oĩva yvy ári ha yvágape ne mba’énte voi. R.

Nde hína ore Jára pe mburuvicha guasu pavẽ ha nde mba’e guasuve opavavégui!

Nde hegui ou mba’e rereko heta ha terakuã. R.

Nde reisãmbyhy opa mba’e. Pe mbarete ha pokatu oĩ nde pópe,

ha nde avei pe reme’ẽva mbarete ha pokatu opavavépe. R.

ALELUIA        Mc  1, 15

Aleluia.

Tupä Ñandejára Sambyhy hi’aguï. Peguerovia Marandu Porä.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       6, 7-13

Upe ramo Ñandejára ohenói umi 12 hemimbo’épe ha oñepyrũ omondo ichupe kuéra mokõi mokõi, ha ome’ẽ ichupe kuéra pokatu ipu’aka haguã mba’epochýre. He’i ichupe kuéra ani haguã ogueraha mba’eve tapére guarã, yvyra ipo peguánte. Ndoguerahái va’erã ijaviorã térã viru. Ikatu omonde sapatu, ijao jopyrurã katu ani ogueraha.

He’i ichupe kuéra: Upe óga peike haguépe peiko haguã, pesẽtaha árape peve peikóta. Ha na pene moguahẽséi ramo térã na pene renduséi ramo katu, pesẽ pe óga térã pe távagui, ha peityvyro pende pýgui pe yvytĩmbo oikuaa haguã upéva maranduha Tupã Ñandejára oinupãtaha ichupe kuéra.

Upérõ osẽ hikuái hemimbo’e kuéra he’i haguã opavavépe ojevy haguã Tupã Ñandejára gotyo. Omosẽ avei heta mba’epochy, ha omonguera heta hasývape omonávo hese kuéra ñandyry.

Ñandejára Jesucristo Ñe’ẽ