LECTURAS DEL JUEVES 14 DE NOVIEMBRE

LECTURAS DEL JUEVES 14 DE NOVIEMBRE

Primera lectura:

Ko’ágä ñahendúta Tupã Ñandejára ñe’ẽ Sabiduría arandukápe oĩ háicha

7, 22 – 8, 1

Arandúpe oĩ espíritu imba’e kuaáva, imarangatúva, ha’énteva, opaichaguáva, ikatupyrýva, iñakã porãva ipotĩva, hesakãva, ndaitujúiva, ohayhúva iporãva, imba’e porãva, ohecha pukúva, naisãiva, ipy’a porãva ohayhúva yvypórape, opyrũ hatãva, ndokyhyjéiva, ipy’a guapýva, ipu’akapáva, ohechapáva, oikéva opa espíritu iñakã porãvape, ipotĩvape, ha isatĩvape.

Arandu oku’eve opa omýivagui, ipotĩ porãgui oike ha ohasa opa mba’e. Ha’e hína Tupã Ñandejára pokatu pytu, mba’e potĩ osẽva Ipu’akapáva reko mimbipágui, upévare mba’eve iky’áva ndojái hese.

Ha’e mba’e rendy opa’ỹva tesape, mba’e potĩ ojehechaha Tupã Ñandejára rembiapokue, ha ipy’a porãngue ra’ãnga.

Peteĩnte ramo jepe, ichupe guarã ikatupa ite; omoengovia’ỹre mba’eve, ombopyahu opa oĩva, opa ára oike imarangatúva py’apýpe ojapo haguã ichugui kuéra Tupã Ñandejára rayhuha ha imaranduhára.

Tupã Ñandejára ohayhu arandu rayhuhárape. Ha’e iporãve kuarahýgui ha ojajaive mbyja kuéragui, ára sakãgui jepe ohesapeve, ára rire ou pyhare, ha arandúre ndaipu’akái mba’eve.
Ha’e ojepysopa iteko yvy tuichakue, ha oisãmbyhy hekópe opa mba’e.

Tupã Ñandejára Ñe’ẽ.

SALMO ÑEMBOHOVÁI 118, 89-91. 130. 135. 175

R. Che Jára, ne Ñe’ẽ ndopái chéne araka’eve.

Che Jára, ne Ñe’ẽ ndopái chéne
araka’eve, yvága rehe oĩne opa ára.
Nde reko jeroviaha ohupitýne opa oikovévape,
ko yvy nde remoĩ hendápe ha upépe oĩ ko’ágä ite peve. R.

Opa mba’e oĩ nde reipota
hagueicha ite, umíva nde po guýpe oĩmba.
Umi ne ñe’ẽ jaikuaávo, ñande resape,
ha omoarandu umi mba’eve oikuaa’ỹvape. R.

Ehecha kuaákena chéve,
ha ehechauka chéve ne rembipota.
Eheja taikove romomba’e guasu haguã,
ha ne ñe’ẽ ta che pytyvõ. R.

ALELUIA Jn 15, 5

Aleluia.
Ñandejára Jesucristo he’i:
“Che hína pe parral ha peë umi hakä .
Upe oïva che ndive, ha Che hendive, heta hi’a”.
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?

17, 20-25

Upe ramo umi fariséo oporandu Jesúspe araka’épa oguahẽ va’erã Tupã Ñandejára porosãmbyhy, ha ha’e he’i ichupe kuéra: Tupã Ñandejára sãmbyhy oguahẽvo ndaha’éi opavave ohecha va’erã. Ndoje’e mo’ãi: ‘Péina ápe’ térã ‘Péina amo’.

Tupã Ñandejára sãmbyhy niko oĩma pende apytépe. Ha he’i hemimbo’e kuérape: Oguahẽta ára peẽ pehechasetaha peteĩ ára jepe, pe Tupã Ñandejára ra’y ou va’ekue yvypóraicha oikoha, ha ndapehecha mo’ãi. Oiméta he’íva: ‘Kóina ápe’, térã ‘Péina amo’. Ani peho hapykuéri.

Pe aratirícha overávo ohesapepáva ára tuichakue, péichata pe Tupã Ñandejára ra’y ou va’ekue yvypóraicha ou jevyha ára. Tekotevẽnte ohasa asy heta raẽ, ha ojahéi hese yvypóra ko’ágägua.

Ñandejára Jesucristo Ñe’ẽ.