LECTURAS DEL JUEVES 17 DE OCTUBRE

LECTURAS DEL JUEVES 17 DE OCTUBRE

Primera lectura:

Ñahendúta Tupã Ñandejára Ñe’ẽ San Pablo ohai va’ekue Roma guápe                                                                               3, 21-30a

Che pehẽnguekuéra:

Ha ko’ágä, tembiapoukapy’ỹre, Tupã Ñandejára ohechauka ñandéve mba’éichapa ñane mboheko joja, ha upéva he’i pe tembiapoukapy voi ha umi maranduhára. Jarovia rupi Jesucrístope, Tupã Ñandejára omboheko joja umi ogueroviávape.

Ndaipóri niko ojoavyha: opavave niko iñangaipa ha mombyry oĩ Tupã Ñandejára reko mimbipágui. Tupã Ñandejára katu, imba’e porãgui, rei ete oporomboheko joja, Jesucristo rupi, oporopysyrõvo. Tupã Ñandejára oheja rei angaipa, Jesucristo oñohẽ rupi huguy. Angaipa jeheja rei ojehupity jerovia rehe ae. Kóicha Tupã Ñandejára ohechaukase va’ekue  mba’éichapa ñane mboheko joja: oheja reívo ñandéve angaipa jajapo va’ekue .

Ha’e niko oha’arõkuaa. Ha’e niko ohechaukase ñandéve ko’ágä  mba’éichapa ñane mboheko joja. Pe ha’e heko joja háicha niko, omboheko joja avei umi Jesús rehe ojeroviávape.

Mamópa aipórõ opyta pe yvypóra ojererovuha Tupã Ñandejára renondépe? Mamove. Ha mba’ére piko upéva? Ndaha’éi ojapo haguére tembiapoukapy he’íva, oguerovia haguérente. Ha péicha ñaguahẽ kóvape: Tupã Ñandejára omboheko jojaha yvypórape ijerovia rupi, ohecha’ỹre ojapópa térã ndojapói tembiapoukapy he’íva.

Tupã Ñandejára nga’u piko judío kuéra Tupãnte? Ndaha’éi piko avei opa tetã Tupã? Hesakã porã opa tetã Tupã Ñandejáraha.

Tupã Ñandejára Ñe’ẽ.

SALMO ÑEMBOHOVÁI                                                129, 1-4b. 5-6b

R. Tupä Ñandejárante ipy’a porãva.

Amo ipypukuvehágui niko ndéve añembo’e che Jára.

Che Jára, che rendu mína.

Ejapysaka porã che rehe,

ejapysaka che rembijerurére. R.

Ne mandu’átarõ ore rembiapo vaikuére,

piko máva oñemoĩta ne renondépe?

Nde katu reheja rei oréve ore

angaipa ikatu haguã ndéve romomba’e. R.

Che py’a ite guive aha’arõ Tupä Ñandejárape,

che aguerovia iñe’ëre opa árape.

Che ánga oha’arö Tupä Ñandejárape,

ku guárdia ojapóva ára pyahu oha’arõ háicha. R.

ALELUIA Jn 14, 6

Aleluia.

Ñandejára Jesucristo he’i:

“Che hína pe Tape, Añetegua ha Tekove.

Avave ndohói che Túva rendápe ndaha’éi ramo che rehe ae”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                                                  11, 47-54

Upe ramo Jesús he’i fariséokuérape:

“Pejererekóke peẽ, pemopu’ãva ityvyrã umi maranduhárape, pende ru kuéra ypykue ojuka va’ekuépe. Péichape peẽ peikuaauka hína peimeha umi pende ru ypy kuerakue ojapo va’ekue  ndive. Ha’e kuéra ojuka va’ekue  umi maranduhárape, ha peẽ pejapo ityvyrã.”

Upévare, arandu guasu etépe he’i va’ekue  Tupã Ñandejára: ‘Amondóta peẽme maranduhára ha apóstol, ha oiméta pejukáva ha ambue peikóva pemuña.’ Umi yvypóra ko’ágä  guápe, Tupã Ñandejára ojeruréta hepykue umi maranduhára ruguýre, oñeñohẽ va’ekue  oúvo ojejapo ñepyrũ guive ko yvy. Abel ruguy guive, Zacarías ruguy peve, ojejuka va’ekue  pe altar ha Tupã Ñandejára koty pa’ũme.

Aipórõ ha’e peẽme, Tupã Ñandejára ojeruretaha hekove kuéra repykuére opavave ko’ágä  oikóvagui.

“Pejererekóke peẽ, Moisés rembiapoukapy mbo’eha, perekóva pende pópe peikuaa haguã Tupã Ñandejára, ha peẽ voi ndapeikuaái ha ndapehejái avavépe oikuaa ichupe.”

Jesús osẽvo upégui, umi Moisés rembiapoukapy mbo’eha ha umi fariséo ipochy eterei ha oñepyrũ oñatõi ichupe porandúpe. Omoñuhãse ichupe oity haguã ichupe iñe’ëngue rupi voi.

Ñandejára Jesucristo Ñe’ẽ