LECTURAS DEL JUEVES III DE CUARESMA

LECTURAS DEL JUEVES III DE CUARESMA

PRIMERA LECTURA

Ko’ágä   ñahendúta Tupã Ñandejára ñe’ẽ Jeremías arandukápe oĩ háicha         7, 23-28

Tupã Ñandejára he’i:

Ha’e va’ekue avei ichupe kuéra iñe’ẽrendu haguã, upéicha ramo che ha’etaha Tupã ichupeKuéra guarã, ha’e kuéra katu che retãyguáta. Ha’e va’ekue avei ichupekuéra oiko haguã che aipota háicha, oho porã haguã ichupe kuéra. Ha’e kuéra katu nohenduséi che ñe’ẽ ha ndoikuaaséi va’ekue mba’eve. Ojetu’u uvei ivaívare ha oñeme’ẽ hembipota vaípe. Ojevy rangue che rendápe oñemomombyry che hegui.

Pende ru kuéra ypykue osẽ guive Egíptogui ko’agã ite peve, che amondo va’ekue peẽme che rembiguái maranduhára kuéra ojoapykuéri. Peẽ katu nape hendúi che ñe’ẽha ndapei kuaaséi va’ekue mba’eve, pende ru kuéra ypykuégui pejetu’uve va’ekue uvei ivaívare.

Nde, Jeremías, ere ichupe kuéra opa ko’ã mba’e, ndoikuaaséi ramo jepe mba’eve, esapukái ichupe kuéra okirirĩ ramo jepe. Ere ichupe kuéra: ‘Kóva hína upe tetã iñe’ẽ rendu’ỹva Tupã Ijárape ha ndopoiséiva ivaívagui. Upe añetegua noñehenduvéi ete ijurúgui kuéra.’”

Tupã Ñandejára Ñe’ẽ.

SALMO ÑEMBOHOVÁI                         94, 1-2. 6-9

R. Peju japurahéi Tupä Ñandejárape vy’a pópe.

¡Peju japurahéi Tupä Ñandejárape vy’a pópe.

Japurahéi upe Itaguasu jejopy vaígui ñane renohẽvape!

Ñaguahẽ henda  peve ja aguyjeve me’ë ha ichupe ñamomba’e,  opa ite mba’ére,

Tupä Ñandejárape japurahéi. R.

Peju ñañesũha ñamomba’e guasu ichupe.

Ñañesũ ñande apohare, Ñandejára renondépe.

Ha’e hína Tupã Ñandejára, ñande katu hetãgua oisambyhýva

ha ovecha iñu megua ipo rupi omboguatáva. R.

Ha nga’u ra’e pehendu he’i ramo:

“Ani pende py’a hatã Meribápe guaréicha,

Masápe pejapo haguéicha, yvy ojeiko’ỹháme.

Upérõ penderu kuéra ypykue opu’ã va’ekue che rehe

ohecha ramo jepe umi mba’e ajapo va’ekue. R.

VERSÍCULO ANTES DEL EVANGELIO Cf. Jl 2, 12-13

Pende py’a ite guive pejevy che rendápe

che mba’e porä ha aporoiporiahuverekóre.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                       11, 14-23

Upe ramo Jesús omosẽ hína peteĩ karia’ýgui pe mba’epochy omoñe’ẽngu va’ekue ichupe. Ha pe mba’epochy osẽvo, upe iñe’ẽngúva oñepyrũ oñe’ẽ. Opavave ohecha ramo joa upéva. Oime jepe he’íva: “Beelzebú, Aña nguéra ruvicha voi niko hína pe ohejáva ichupe omosẽ umi mba’epochykuérape.

”Ha oime avei umi, omoñuhãvo ichupe, ojeruréva Jesúspe ojapo haguã mba’e hechapyrãva ohechauka haguã Tupã Ñandejára oĩha hendive. Ha’e katu, oikuaáva hína mba’épa oguereko hikuái iñakãme, he’i ichupekuéra: Peteĩ tetã oñemboja’opa ramo ha opu’ãmba ramo oñoakãre, oñehundi. Ha opa hógakuéra ho’apa ojo’ári. Péicha avei Satana voi opu’ã ramo ijehe, mba’éicha piko imbarete tapiáta? Kóicha ha’e, peẽ pejégui che amosẽha mba’epochy kuérape, Beelzebú pokatu rupi.

Péicharõ añete, máva piko ome’ẽ pene remimbo’e kuérape pokatu omosẽ haguã ichupe kuéra? Pene remimbo’e kuéra ojapóva rupi voi, ojehecha peẽ pejavyha. Che amosẽ ramo mba’epochy kuérape Tupã Ñandejára po rupi, upéva he’ise Tupã Ñandejára sãmbyhy oguahẽmaha peẽme.

“Peteĩ kuimba’e mbarete ikyse porã ramo ha oñangareko hógare, umi mba’e oñongatúva ipype oĩ porã. Ha ou ramo ambue imbaretevéva ichugui  ha ipu’aka hese katu, oipe’a ichugui  pe kyse ojerovia hague, ha opa oguerekóva, ha ojapo umívagui ojaposéva. Upe che ndive oĩ’ỹva, oñemoĩ che rehe. Ha upe che ndive omono’õ’ỹva, omosarambi.”

Ñandejára Jesucristo Ñe’ẽ.