LECTURAS DEL JUEVES 5 DE SEPTIEMBRE

LECTURAS DEL JUEVES 5 DE SEPTIEMBRE

Primera Lectura

Ñahendúta Tupã Ñandejára Ñe’ẽSan Pablo ohai va’ekue Colosas guápe                           1, 9-14

Che pehẽngue kuéra:

Roñembo’e pende rehe ha rojerure Tupã Ñandejárape oikuaauka porã haguã peẽme hembipota, pene moarandu ha oikuaauka porã haguã peẽme pe mba’e kuaa oúva Espíritu Sántogui. Upéicharõ peikóne oiko háicha Tupä Ñandejára reheguáva, pejapo tapiávo umi ichupe ombohorýva, opaichagua mba’e porã, ha pekakuaave haguã Tupã Ñandejárape. Rojerure Tupã Ñandejárape, ipokatu mimbipápe, ta pene mombarete. Upéicharõ peropu’aka kuaáne opa mba’e py’a mbarete ha ñeha’arõ kuaápe, ha vy’a guasu reheve. Peme’ëne pende aguyje ñande Túvape, pene mbokatupyrýva pehupity haguã avei pe ha’e ome’ë távagui Tupã Ñandejára mba’évape, ha’e oisãmbyhy mimbihápe. Tupã Ñandejára niko ñande pe’a pytũpoguýgui ha ñande reraha pe Ta’ýra ohayhu etéva oisãmbyhyhápe. Ha’e rupi ñane pysyrõ ha ojeheja reipa ñandéve ñane angaipa. 

Tupã Ñandejára Ñe’ẽ.

SALMO ÑEMBOHOVÁI                       97, 2-6

R.Tupä Ñandejára ohechauka ipokatu, 

Tupä Ñandejára ohechauka ipokatu, 

tetã nguérape ohechauka heko jojaha. 

Imandu’a imborayhu ha heko jeroviaháre 

tetã Israel ndive guarã. R.

Yvy jerekuévo ojehecha

Tupã Ñandejára ipu’akaha opa mba’ére. 

To jererohory Tupä Ñandejára yvy jerekuévo, 

purahéi rory tosoro ha tojevy’a. R.

Árpa púpe Tupä Ñandejárape to jepurahéi, 

mbaraka púpe ichupe to jepurahéi. 

Turu ha trompéta púpe to jepurahéi Tupä Ñandejára, 

ñande ruvicha guasu renondépe. R.

ALELUIA

Mt 4, 19

Aleluia. 

Ñandejára Jesucristo he’i:

“Peju ha che moirü, pombo’éta penohẽhaguã pende rapichápe tape vaígui”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?

                                            5, 1-11

Peteĩjevy, Jesús oĩjave yguasu Genesaret rembe’ýpe, oñandu ojopypaha ichupe umi távagua ohenduséva Tupä Ñandejára Ñe’ẽ. Jesús ohecha mokõi kanóa pe y rembe’ýpe. Umi pira renohẽha oguejy ra’e hikuái ojohéi haguã ipyaha kuéra. Jesús ojupi peteĩvape, Simón mba’éva, ha ojerure ohomive haguã hyepývo pe y rembe’ýgui. Upéi oguapy pe kanóape, ha upe guive oñepyrũombo’e opavavépe. Oñe’ẽmbávo, he’i Simónpe: Eraha ko’ã kanóa pe y hypyvehápe, ha peity upépe pende pyaha penohë haguã pira. 

Simón katu he’i: Mbo’ehára, pyhare pukukue romba’apo hína kuri ha noroguenohẽi mba’eve; ko’ágã nde erégui, aitýta umi pyaha. 

Ojapo upéicha, ha heta iterei pira ho’a ha umi pyaha oñepyrũosoro. Aipórõ ojepoity hikuái iñirũnguéra ambue kanóa peguápe, oho haguã oipytyvõ ichupe kuéra. Ha’e kuéra oho, ha mokõive kanóa omoenyhẽtégui haimete oyguy. 

Ohechávo upéva, Simón Pedro oñesũJesús renondépe ha he’i ichupe: Ani eja che rehe, che Jára, che niko peteĩmba’e vai apoha! 

Simón ha iñirũnguéra niko tuicha iterei oñemondýi pe pira ho’a heta ite va’ekuére. Upéicha avei Santiago ha Juan, Zebedeo ra’y kuéra, omoirúva Simónpe. Jesús katu he’i Simónpe: Ani rekyhyje. Ko’águi rire rombo’éta renohẽhaguã nde rapichápe tape vaígui. 

Aipórõ, omboja hikuái y rembe’ýpe ikanóa kuéra, oheja opa mba’e ha oho Jesús ndive. 

Ñandejára Jesucristo Ñe’ẽ