LECTURAS DEL JUEVES 5º TIEMPO ORDINARIO

LECTURAS DEL JUEVES 5º TIEMPO ORDINARIO

Ko’ágã ñahendúta Tupã Ñandejára ñe’ẽ Reyes arandukápe oĩ háicha  11, 4-13

Salomón itujáma ramo, ikuña kuéra omoakã raku ichupe ambue tupãnguérare, noñeme’ẽmbái va’ekue niko Tupã Ijárape, ojapo haguéicha itúva David. Salomón omomba’e guasu tupã kuñáva Aserápe, Sidongua mba’éva, ha Milcómpe, Amongua tupã gua’u ahẽ. Aipo ramo, Salomón hembiapo vai Tupã Ñandejára renondépe, ndoikói haguére ipy’a ite guive Tupã Ñandejára rapére oiko haguéicha itúva David.

Umi árape Salomón omopu’ã, upe yvytýpe oĩva Jerusaléngui kuarahy resẽ gotyo, peteĩ Tekoha, Moabgua tupã gua’u ahẽ Quemóspe ha Molócpe, Amongua tupã gua’u ahẽ. Upéicha avei ojapo opa ikuña kuéra mombyry guápe guarã.

Umíva oikuave’ẽ mymbajuka ha insiénso itupã nguérape. Tupã Israel Jára ipochy Salomón ndive, ojei haguére ichugui , ojechauka va’ekue ichupe mbohapy jevy, ha he’i va’ekue ani haguã omomba’e guasu ambue tupã nguérape. Ha’e katu ndojepy’apýi Tupã Ñandejára he’i va’ekuére.

Upévare Tupã Ñandejára  he’i Salomónpe: “Nde rejapói haguére Ñe’ẽ ñame’ẽ va’ekue ojupe ha che rembiapoukapy, aipe’áta nde hegui ne retã ame’ẽ haguã peteĩ ne rembiguáivape. Opáichavo, nde ru David rehápe, ndajapo mo’ãi reikove aja; nde ra’ýgui katu aipe’áta. Ndaipe’a mo’ãi jepe ichugui  opa upe tetã: ahejáta ichupe peteĩ ñemoñaregua, nde ru David ha Jerusalén, pe táva aiporavo va’ekue rehehápe.”

Tupã Ñandejára Ñe’ẽ

SALMO ÑEMBOHOVÁI 105, 3-4. 35-37. 40

Opavave: Ne mandu’a kena che rehe, che Jára

Ovy’aite nepa umi oporombojojáva ha hekopegua opa ára ojapóva.

Ne mandu’ána che rehe, che Jára, ne retã guáre avei.

Ehechakuaa kena chéve rejúvo reporope’a ivaívagui. O.

Ore Rukuéra ojehe’a umi nda itupã rayhúiva rehe

ha ojapo umíva rembiapo, omomba’e itupä gua’ukuérape

oikóva ichupe kuéra ñuhä ramo. O.

Ojuka ha oikuave’ẽ añáme ta’ýra ha tajýrakuéra.

Tupã Ñandejára ipochy hetãgua ndive, ha ojeguaru umi imba’e teévagui. O.

ALELUIA St 1, 21bc

Aleluia.

Pejapyhy py’a porãme pe Ñe’ë oñeñotÿva pende pype orekóva pu’aka pene pysyrõ haguã.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha 7, 24-30

Upe ramo Jesús oho Tiro retã gotyo. Oike peteĩ ógape, oipota’ỹre avave oikuaa, ha ndaikatúi okañy. Pya’e oikuaa ichugui  peteĩ mitãkuña mba’epochy oguerekóva sy, upéva oho oñesũ Jesús renondépe. Upe kuña, Sirofeniciagua, ndaha’éi Israelgua, ha ojerure asy Jesúspe omosẽ haguã mba’epochy imemby kuñágui.

Jesús katu he’i ichupe: Eheja to karu raẽ ta’ýra kuéra. Naiporãi niko mitã jurúgui jaipe’a tembi’u ha ñame’ẽ jaguápe.

Ha’e he’i ichupe: Upéichako nde karai. Opaichagua, jaguánte avei ho’úva umi tembi’u rembyre mitã nguéra oitýva meságui.

Jesús he’i ichupe: Reñe’ẽ haguére péicha, tereho rejepy’apy’ỹre. Pe mba’epochy osẽma ne memby kuñágui. Pe kuña oguahẽvo hógape, ojuhu imemby kuña hupápe: pe mba’epochy osẽ ra’e ichugui.

Ñandejára Jesucristo Ñe’ẽ