LECTURAS DEL LUNES III DE CUARESMA

LECTURAS DEL LUNES III DE CUARESMA

PRIMERA LECTURA

Ko’ágä   ñahendúta Tupã Ñandejára ñe’ẽ 2 Reyes arandukápe oĩ háicha        2 Rey 5, 1-15

Oĩ peteĩ karai hérava Naamán, Siria pegua ruvicha guasu ñorairõhára ruvicha; mburuvicha guasu ohayhu ha ome’ẽ ichupe opa mba’e ha’e oipotáva, ha’e rupi niko Tupä Ñandejára oipytyvõ Síriape ñorairõme. Ko kuimba’e katu hasy kuru vaígui.

Peteĩ jevy oñorairõ ramo sirio kuéra Israelgua ndive, peteĩ mitãkuña Israelgua ho’a sirio kuéra pópe ha ojereraha Naamán rembirekópe hembiguairã. Ko mitãkuña he’i pe kuñakaraípe: Che jára oho ramo Samaría pegua maranduhára rendápe, okueráta ikuru vaígui.

Naamán omombe’u mburuvicha guasúpe mba’épa he’i pe mitãkuña. Ha Siria ruvicha guasu he’i ichupe: Iporã. Tereho katu ha arahaukáta che kuatiañe’ẽ Israel ruvicha guasúpe.

Upérõ Naamán oho. Ogueraha 30.000 pláta pehẽngue, 6.000 óro pehẽngue ha 10 ao, ha ogueraha Israel ruvicha guasúpe kuatiañe’ẽ he’íva: “Oguahẽvo nde pópe ko kuatiañe’ẽ, reikuaáta amondoha Naamán, che ñorairõhára ruvicha peteĩva, remonguera haguã ichupe ikuru vaígui.”

Israel ruvicha guasu ohechávo pe kuatia, omondoro ijao ñembyasýgui ha he’i: Che nga’u piko Tupã Ñandejára, ome’ẽ ha oipe’áva jeikove, ajeve kóva ombou che rendápe peteĩ kuimba’e amonguera haguã ichupe ikuru vaígui? Pehecha porã hína, mba’éichapa che reka ñorairõrã!

Maranduhára Eliseo, ohendúvo Israel ruvicha guasu omondoro hague ijao, he’iuka ichupe: “Ma’erã piko remondoro nde ao? Tou pe kuimba’e che rendápe ha oikuaáta oĩha maranduhára Israélpe.”

Naamán oho ikárro ha ikavaju kuéra reheve ha opyta Eliseo róga renondépe. Eliseo katu he’iuka ichupe hembijokuái rupi: “Tereho ejahu 7 jevy ysyry Jordánpe ha nde rete ipotĩta kuru vaígui.”

Naamán ipochy eterei ha oho jevy he’ívo: Che aimo’ã osẽta che rendápe, ñembo’yhápe oñembo’éta Tupã Ijárape, upéi opokota che rasyhápe ha péicha che monguerataha. Damasco pegua ysyry Abana ha Farfar niko iporãve opa ysyry Israel peguágui. Umívapente niko ikatu va’erã mo’ã ajahu che potĩ haguã che kuru vaígui.

Ha tuicha pochy reheve oho upégui. Hembiguai kuéra katu oñemboja ha he’i ichupe: Karai, pe maranduhára he’i rire ndéve rejapo haguã peteĩ mba’e hasýva, nderejapói chénepa ra’e? Ha pe he’íva ndéve niko Kóvante: rejahu haguã ha ne potĩtaha.

Naamán oho ha oñapymi 7 jevy ysyry Jordánpe, he’i haguéicha ichupe maranduhára, ha ho’o opyta ipotĩ asy mitã ro’óicha. Upérõ ha’e ha opa imoirũhára oho jevy Eliseo rendápe, ha oguahẽvo Naamán he’i ichupe: Ko’ágã aikuaa porã, opa tetã nguéra ko yvy arigua apytépe, Israélpe ño ite oĩha Tupã Ñandejára. Upévare ajerure ndéve rereko haguã ne mba’erã ko’ã jopói arúva ndéve.

Tupã Ñandejára Ñe’ẽ.

SALMO ÑEMBOHOVÁI          41, 2-3; 42, 3-4

R. Tupã Ñandejára che ánga henyhẽse nde hegui.

Ku guasu yuhéi ijuku’a háicha ysyry porãre,

upéicha che ánga henyhẽse nde hegui, Tupã Ñandejára. R.

Che ángã nde hegui henyhẽse,

Tupã Ñandejára reikovéva.

Araka’épa ijáne chéve,

ne rendápe aguahẽ ha romomba’e guasu? R.

Embou chéve añetegua ha ne mba’erendy

ehesape ha emoesakã chéve che raperã,

ikatu haguã aguahẽ nde yvyty marangatúpe,

upe nde reikohápe. R.

Aguahẽne Tupã Ñandejára oñemomba’e guasuhápe,

upe che rekove ombohorýva rendápe.

Árpa púpe aropurahéine ame’ëvo aguyje

Tupã, che Járape. R.

VERSÍCULO ANTES DEL EVANGELIO Cf. Sal 129, 5.7

Aha’arö Tupä Ñandejárape ha ajerovia iñe’ëre,

hese ojejuhu poriahuvereko ha pysyrö eta ite.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                       4, 24-30

Upe ramo Jesús oguahẽ Nazaretpe ha péicha oñe’ẽ upe aty guasu oĩva sinagógape: Añetehápe ha’e peẽme ndaiporiha maranduhára ojeguerohorýva ijyvy teépe. Añetehápe niko, heta va’ekue kuña imenave’ỹva Israélpe, maranduhára Elías oikoveha árape, ndokyvéi ramo guare mbohapy áño rasa rupi ha tuicha ñembyahýi tetã tuichakue.

Ha Elías noñemondói va’ekue mavavéva umi kuña imenave’ỹva Israelgua rendápe. Ha oñemondo peteĩ kuña Sareptagua rendápe, táva Sidón ypýpe. Oĩ va’ekue avei Israélpe heta hasýva ai pochýgui, maranduhára Eliseo oikoveha árape, ha mavavéva noñemonguerái, Naamán, Siria guápe año ite.

Ohendúvo upéva, umi oĩ va’ekue upe judío kuéra tupaópe ipochy joa. Opu’ã ha omosẽ hikuái Jesúspe upe távagui, ogueraha ichupe yvate pe yvyty itáva kuéra opu’ãha ru’ãme, upe guive oity haguã ichupe yvýpe. Jesús katu ohasa ipa’ũ rupi kuéra ha oho.

Ñandejára Jesucristo Ñe’ẽ.