LECTURAS DEL LUNES 09 DE DICIEMBRE
8 diciembre, 2019LECTURAS DEL MIÉRCOLES 11 DE DICIEMBRE
11 diciembre, 2019LECTURAS DEL MARTES 10 DE DICIEMBRE
Primera lectura:
Ko’ágä ñahendúta Tupã Ñandejára ñe’ẽ Isaías arandukápe oĩ háicha
40, 1-11
Tupã Ñandejára he’i: “Pembovy’a, pembovy’a che retã guápe.
Pe ñe’ẽ pende py’a ite guive Jerusalénpe ha peje ichupe opamaha itembiguái reko, omyengoviapa maha hembiapo vaikuére, ohupitýma hague Tupä Ñandejáragui ñenupã jo’a opa iñangaipáre.”
Oĩ peteĩ osapukáiva: “Pembosako’i Tupä Ñandejárape haperã yvy ojeiko’ỹháme, pejapo yvy perõme tape po’i ñane Tupã Ñandejárape guarã.
Pemoenyhẽ umi ipyko’ẽha, pemboguejy yvyty ha yvy pu’ã.
Pejapo yvyty pa’ũgui ñu ojojapa itéva.
Upérõ Tupä Ñandejára ohechaukáta heko mimbipa ha upéva ohecháta opa yvypóra oñondive.
Tupä Ñandejára voi upéicha he’i.”
Oĩ he’íva: “Ere hatã”, ha che ha’e: “Mba’e piko ha’e va’erã?”
“Opa yvypóra kapi’ícha, ha yvoty ñúicha hekove.
Pe kapi’i ipiru, haviru pe yvoty Tupä Ñandejára oipeju ramo hi’ári.
Yvypóra niko añete ku kapi’ícha. Pe kapi’i ipiru, haviru pe yvoty, Tupã Ñandejára ñe’ẽ katu opyta opa árape guarã.”
Ejupi yvyty yvatépe, nde, reraháva Siónpe marandu porã.
Hatã esapukái, nde, reraháva marandu porã Jerusalénpe.
Esapukái kyhyje’ỹre, ere Judá pegua távakuérape: “Péina upépe ne Tupã!”
Oguahẽma Ñandejára ipokatu reheve ha pyapy mbaretépe opa mba’e ipo guýpe omoĩ.
Ogueru hendive hetãgua oguenohẽ va’ekue jejopy vaígui.
Ovecha rerekuáicha ogueraha ijovecha kuéra omongarúvo, ohupi umi ovecha ra’y, ogueraha ijyva ári ha oñangareko ovecha imemby ramóvare.
Tupã Ñandejára Ñe’ẽ.
SALMO ÑEMBOHOVÁI 95, 1-3. 10ac. 11-13
R.Pepurahéi Tupä Ñandejárape purahéi pyahu.
Pepurahéi Tupä Ñandejárape purahéi pyahu.
To purahéi Tupä Ñandejárape opa ko yvy.
Pepurahéi Tupä Ñandejárape, héra pemomba’e. R.
Opa rupi pemombe’u ha’e oporoguenohẽha jejopy vaígui.
To je’e opa tetã rupi imba’e poräha:
“Tupä Ñandejára ñande ruvicha guasu hína”.
Ha’e oisãmbyhy teko jojápe tetã nguéra. R.
To vy’a yvága ha yvy. To sununu pe yguasu ha opa ipype oĩva.
To vy’a umi ñu ha opa mba’e ipype oĩva. Vy’águi to sapukái umi yvyra ka’aguy pegua. R.
To jepurahéi Tupä Ñandejára renondépe, ha’e ou ko yvy oisãmbyhy haguã.
Teko jojápe ko yvy oisãmbyhýta, ha añetépe tetãnguéra. R.
ALELUIA
Aleluia.
Tupã Ñandejára hi’aguïma: Ha’e ou ñane pysyrövo.
Aleluia.
EVANGELIO
Ko’ágä ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?
18, 12-14
Upe ramo Jesús he’i hemimbo’ekuérape: Mba’épa peẽ peimo’ã ojapotaha peteĩ kuimba’e oguerekóva 100 ovecha, ha okañy ramo ichugui peteĩ? Ohejáne ñúme umi 99, oho haguã oheka pe okañy va’ekue. Ha ojuhúvo, ovy’a iteve va’erã ko peteĩ ovecha reheve, umi 99 okañy’ỹ va’ekue reheve guágui. Péicha avei, pende Túva oĩva yvágape ndoipotái oñehundi peteĩnte jepe ko’ãvagui, mitãicha che rehe ojeroviáva.
Ñandejára Jesucristo Ñe’ẽ.