LECTURAS DEL MARTES 21 DE ENERO

LECTURAS DEL MARTES 21 DE ENERO

Primera lectura:

Ko’ágä   ñahendúta Tupã Ñandejára ñe’ẽ Samuel arandukápe oĩ háicha                         

    16, 1-13

Tupä Ñandejára he’i Samuélpe: Araka’e pevépa rerombyasýta Saúlpe? Ndaipotavéima ha’e oiko Israel mburuvicha guasúrõ. Emoenyhẽ ñandyrýgui ne ñandy ryru ha tereho Jesé Belengua rógape. Aiporavóma Israel ruvicha guasurã peteĩ kuimba’e ita’ýra kuéra apytépe.

Samuel he’i ichupe: Mba’éichapa ajapóta? Saúl oikuaa ramo che jukáta.

Tupä Ñandejára he’i ichupe: Eraha peteĩ vakílla ha ere reikuave’ẽtaha chéve mymbajuka. Ere Isaípe toho mymbajuka hápe ha che ha’éta ndéve upe rejapo va’erã. Emboyke chéve mburuvicha guasurã upe che ha’étava ndéve.

Samuel ojapo upe Tupä Ñandejára he’i va’ekue ichupe. Oguahẽvo Belénpe, moakãhára  upe táva pegua osẽ huguãitĩvo tuicha kyhyje reheve ha oporandu hikuái ichupe: Rerúpa py’aguapy rejúvo karai marangatu?

Samuel he’i ichupekuéra: Ani pekyhyje, aju amymbajukávo Tupä Ñandejárape. Peñemopotĩ ha pe che moirũ mymbajuka hápe.

Upéi Samuel omopotĩ Jesé ha ita’ýra kuérape ha he’i ichupekuéra ou haguã mymbajuka hápe. Ha’ekuéra oguahẽvo Samuel ohecha upe héravape Eliab ha he’i ipype: “Katu ete kóva hína upe kuimba’e Tupä Ñandejára oiporavóva mburuvicha guasurã”.

Tupä Ñandejára katu he’i ichupe: “Ani rema’ẽ hova rehe térã ijyvate kuére. Che ndaipotái ichupe. Che nama’ẽi péicha. Peẽ pema’ë upe kuimba’e rováre, che katu ama’ẽ ipy’apýre.”

Upérõ Jesé ohenói Aminadábpe ha ombohasa Samuel rendápe; Samuel katu he’i: Kóvape ndoiporavói avei Tupä Ñandejára.

Upéi Jesé ogueru Samápe. Samuel katu he’i: Kóvape ndoiporavói avei.

Jesé ohechauka 7 ita’ýra Samuélpe, ha Samuel he’i ichupe avavépe ndoiporavoiha Tupä Ñandejára. Ipahápe oporandu ichupe: Ndaiporivéipa nde ra’y?

Jesé he’i: Oĩ gueteri upe michĩvéva oñangarekóva hína ovecháre. Samuel he’i: Ehenoiuka ichupe. Ha’e ou rire jaguapýta jakaru. Jesé ohenoika ichupe: upe mitã rusu hova pytã, hesa porã ha ijuky.

Tupä Ñandejára he’i Samuélpe: Kóva ha’e! Epu’ã emoingo ichupe mburuvicha guasúrõ.

Upépe voi Samuel oguenohẽ iñandyry ryru ha ityke’ýrakuéra renondépe omoingo Israel ruvicha guasúrõ upe mitã rusúpe hérava David. Upe guive Tupä Ñandejára espíritu oñemomba’e David rehe. Upéi Samuel oho jevy Ramáme.

Tupã Ñandejára Ñe’ẽ.

SALMO ÑEMBOHOVÁI                88, 20-22. 27-28

R. Ajuhu Davidpe, che rembiguái

Yma rejechauka va’ekue umi nde rehe ojeroviávape ha ere va’ekue:

“Kuimba’e ikatupyrývape aipytyvõ, iporavo pyrévape ahupi. R.

Che rembiguái Davídpe ajuhu ha añohẽvo iñakãre ñandy ryku marangatu

amoingo mburuvicha guasúrõ. Ichupe opa ára aipytyvõne ha amombareténe. R.

He’íne chéve ha’e: ‘Nde hína che ru, Tupã Ñandejára che renohẽva jejopy vaígui

ha reñangarekóva che rehe.’ Ajapóta ichupe

che ra’y ypykue, mburuvicha guasu tuichavéva yvy ári. R.

ALELUIA Cf. Ef  1, 17-18

Aleluia.

Ñandejára Jesucristo Túva

to moesakä ñane korasö, ikatu haguáicha ñamomba’e ha’arömby

ipype ñañe renói va’ekuépe.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       2, 23-28

Upe ramo Jesús ohasa ohóvo kokue rupi peteĩ pytu’uha árape, hemimbo’e kuéra oñepyrũ oipo’o trígo ha ho’u. Umi fariséo he’i ichupe: Ema’ẽmi, neremimbo’e kuéra niko ojapo, ojejapo’ỹ arã pytu’uha árape ave.

Ha’e katu he’i ichupekuéra: Ndapeikuaáinga’u piko mba’épa Tupä Ñandejára Ñe’ẽme he’i, David ojapóvo iñembyahýi ramo guare, iñirũ nguéra ndive? Oike hikuái Tupaópe, Abiatar pa’i guasúrõ guare, ha ho’u umi panpe Tupã Ñandejárape oñemboyke va’ekue ha pa’ínteva ikatúva ho’u, ha ome’ẽ avei iñirũ nguérape.

He’i avei ichupe kuéra: Pytu’uha árako ojejapo va’ekue yvypórape guarã, ndaha’éi yvypóra pytu’uha árape guarã. Upévare che, yvypóraicha aju va’ekue, areko che pópe ha’évo mba’e mba’épa ikatu ojejapo pytu’uha árape.

Ñandejára Jesucristo Ñe’ẽ