LECTURAS DEL MARTES II DE CUARESMA

LECTURAS DEL MARTES II DE CUARESMA

PRIMERA LECTURA

Ko’ágã ñahendúta Tupã Ñandejára ñe’ẽ Isaías arandukápe oĩ háicha  1, 10. 16-20

Sodoma ruvichakuéra, pehendu Ñandejára Ñe’ẽ, Tupã remimbo’ére pejapysaka, peẽ Gomorragua.

Pejepohéi, peñe mopotĩ!

Peipe’a che renondégui pene rembiapo ahẽ!

Anive pejapo ivaíva!

Peje hekombo’e pejapo haguã iporãva, peñeha’ã pejapo pe hekojojáva, peipytyvõ ojejopy vaívape, pembojovake hekópe tyre’ỹme, pesẽ kuña iména manóva rehehápe, oñeme’ẽ haguã ichupe imba’éva.”

Upéi, he’i Tupã Ñandejára: “Peju ñañe mongeta ko’ã mba’ére, ha pene angaipa pytãve ramo jepe, ahejáta morotĩ asy, ojogua ramo jepe poyvi oñembo ape pytã itévape, morotĩ, mandyjúicha ahejáta.

Peñe mbopy’a peteĩ ramo pene ñe’ẽ rendu haguã, pe’úta iporã nguete yvy ome’ẽvagui. Ha akóinte pejetu’u ramo ivaívare, katu ete pemanóta ñorairõme.”

Tupã Ñandejára voi he’íma péicha.

Tupã Ñandejára Ñe’ẽ.

SALMO ÑEMBOHOVÁI      49, 8-9. 16bc-17. 21. 23

R. Oikóva tape ikare’ỹvare, Tupã Ñandejára rova ohecháta.

Mba’eve ndarekói ha’e va’erã mymba jukáre pejapóva chéve.

Umíva niko opa árape che renondépe pemoguahẽ.

Ndajeruréi peẽme pene rymba tóro, térã kavara mácho pende korágui. R.

“Mba’éicha rupi che rembiapoukapy nde jurúgui ahendu?

Mba’éicha rupi ne mandu’a che Ñe’ẽ me’ẽre?

Rohekombo’e ramo niko mba’eve nde reikuaaséi, ha che ñe’ẽre nde rejepy’apýi. R.

Opa ko’ã mba’e niko rejapo, ha piko reipota akirirĩ.

Nde piko reimo’ã che ndeichaguaha mba’e.

Nde rovakete anohẽta ndéve ne rembiapo vaikue, ha aikuaaukáta ndéve mávapa che. R.

Pe che momba’e guasúva ipy’a ite guive,

ha oikuave’ẽva chéve upéva, ha’e che momba’e.

Ha upe tape porã rehe oikóvape anohẽne jejopy vaígui”. R.

VERSÍCULO ANTES DEL EVANGELIO Ez 18, 31

“Mombyry pemombo pende jehegui pe mbohovaise

peñemo korasö ha ánga pyahu”, he’i Tupã Ñandejára.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 23, 1-12

Upe ramo Jesús oñe’ẽ maymavépe ha hemimbo’ekuérape. He’i kóicha:

Umi Moisés rembiapoukapy mbo’eha ha umi fariséo kuéra ári oĩ oikuaaukávo Moisés rembiapoukapy. Upévare, pene ñe’ẽrendu va’erã ichupekuéra ha pejapo va’erã ha’ekuéra he’íva. Upe ha’ekuéra ojapóva katu ani peẽ pejapo. Ha’ekuéra niko he’i peteĩ mba’e ha ndojapói pe he’íva. Ha’ekuéra niko omoĩ opavave apére mba’e pohýi ikatu’ỹva jaropu’aka. Oity avei opavave apére mba’e pohýi, ha peteĩ ikuãme jepe ndopokoséi hese. Opa umi mba’e ojapóva, ojechauka haguãnte ojapo.

Oñapytĩ isyva ha ijyva kuérare Ñandejára Ñe’ẽ ryru tuicha tuicháva, ha ombopukuve ijao ruguái. Oĩ porãveta hápe oguapy karu guasuhápe ha judío kuéra tupaópe. Tape Ñandejára rupi katu oipota oñemomaitei ichupe kuéra karai guasúicha ha opavave te’i ichupekuéra “Mbo’ehára”.

Peẽ katu ani peheja avavépe pene renói mbo’ehára. Peẽ niko ojoryvy hína, ha peteĩnte pene Mbo’ehára. Ha ani avavépe peje ko yvy ári “Ore Túva”. Peteĩnte niko pende Túva, ha ha’e oĩ yvágape. Ani avei peheja avavépe he’i peẽme “Ore mbo’ehára”, peteĩnte niko pene mbo’ehára ha upéva pe Mesías.

Pe mba’e guasuvéva pende apytépe, tembiguáicha ojejokuaika va’erã. Tupã Ñandejára oitýta yvýre pe oñemomba’e guasusévape, ha upe oñemomichĩvape katu omomba’e guasúta.

Ñandejára Jesucristo Ñe’ẽ.