LECTURAS DEL MIÉRCOLES 18 DE DICIEMBRE. FERIA DE ADVIENTO

LECTURAS DEL MIÉRCOLES 18 DE DICIEMBRE. FERIA DE ADVIENTO

Primera Lectura

Ko’ágä   ñahendúta Tupã Ñandejára ñe’ẽ Jeremías arandukápe oĩ háicha          

                                                               23, 5-8

Tupã Ñandejára he’i: “Oúta ára ha che rupi David oguerekóta peteĩ iñemoñare tee, peteĩ oisãmbyhýtava hekopete, teko joja ha teko hekopegua oiporútava ko tetãme.

Ha’e oisãmbyhy aja, Judá ndokyhyje mo’ãi mba’evégui ha Jerusalén oikóta py’a guapýpe.

Oñembohérata kóicha: ‘Tupä Ñandejára ñane moakã rapu’ã”.

Tupä Ñandejára he’i: “Oúta ára nome’ẽ mo’ã veimaha hikuái iñe’ẽ he’ívo: ‘Tupä Ñandejára rérape, oguenohẽ va’ekue Israelgua Egíptogui’, ome’ẽta uvei iñe’ẽ he’ívo: ‘Tupä Ñandejára rérape oguenohẽ va’ekue Israel ñemoñare kuérape tetã yvate gotyogui ha opa tetã nguéragui omosarambi hague rupi ichupe kuéra.’ Ha oikóta hetã teépe.”

Tupã Ñandejára Ñe’ẽ.

SALMO ÑEMBOHOVÁI                                 71, 1-2. 12-13. 18-19

R. Tupã Ñandejára, eme’ẽ mburuvicha guasúpe teko joja

Tupã Ñandejára, eme’ẽ mburuvicha guasúpe teko joja

ha mburuvicha guasu ra’ýpe teko potĩ,

ikatu haguãicha ne retã oisãmbyhy hekopete,

ha imboriahúvape ohechakuaa. R.

Ha’e oguenohẽta mboriahu ojerurévo ichupe jejopy vaígui,

ha oikotevẽvape ndorekóiva mamo oho haguã.

Oiporiahuverekóne imboriahúvape

ha ichupe oguenohẽne jejopy vaígui. R.

To ñemomba’e guasu Tupã Israel Jára,

ha’e año ite mba’e hechapyrãva ojapo.

Héra toñemomba’e opa árape,

ha imimbikue to moenyhẽ ko yvy. R.

ALELUIA

Aleluia.

Israel róga Ñangarekoha,

Moiséspe reme’ë va’ekue Apoukapy Sinaípe,

eju ore pysyrö nde jyva pu’akápe.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                                                              1, 18-24

Jesucristo ou ramo guare kóicha va’ekue: Isy María ome’ẽma iñe’ẽ omenda haguã Josére. Ha oiko mboyve oñondive, María ojejuhu hye guasuha Espíritu Santo rupi. José katu, kuimba’e ijoheipyréva, nomoherakuã vaiséi ichupe. Oheja reise mo’ãnte ichupe, avave oikuaa’ỹre. Ko’ã mba’e ombojere aja iñakãme, ojehechauka ichupe iképe Tupä Ñandejára remimbou, ha he’i ichupe:

José, David ñemoñare, ani rekyhyje reraha haguã ne rembirekorã Maríape.

Pe mitã ha’e oguerekótava niko Espíritu Santo pu’aka rupi ou. María imembýta ha rembohérata pe mitã Jesús. Ha’e hína upe oguenohẽtáva hetã guápe hembiapo vaikuégui.

Ko’ã mba’e ojehu oiko haguã heko itépe upe Tupä Ñanddejára he’i va’ekue maranduhára rupi: “Kuñataĩ imarã’ỹva hyeguasúta ha imemby kuimba’éta.

Oñembohérata Emanuel, (he’iséva “Tupã Ñandejára ñane ndive”).”

José opáyvo, ojapo Tupä Ñandejára remimbou he’i haguéicha ichupe, ha ogueraha hembirekorã Maríape. Oiko’ỹre oñondive imemby, ha José ombohéra Jesús.

Ñandejára Jesucristo Ñe’ẽ.