LECTURAS DEL MARTES 25 DE FEBRERO
25 febrero, 2020LECTURAS VIERNES DESPUÉS DE CENIZA
28 febrero, 2020LECTURAS DEL MIÉRCOLES DE CENIZA
PRIMERA LECTURA:
Ko’ágä ñahendúta Tupã Ñandejára ñe’ẽ Joel arandukápe oĩ háicha 2, 12-18
Tupã Ñandejára he’i kóicha:
“Peju jevy che ndive pende py’a ite guive.
Pekaru’ỹ, pesapukái, pejahe’o!”
Pejevy Tupã pende Járape.
Pemondoro pende py’a, ani pende ao!
Tupä Ñandejára niko ipy’a kyrỹi ha oporoporiahuvereko, ndaipochy kuaái.
Ha’e niko mborayhu meme, opa ára oĩ oporombyasy haguãicha.
Ikatu mba’éko na pene nupãi ha pende rovasa, ome’ẽ peẽme trígo ha vino peikuave’ẽ haguã ichupe.
Pembopu turu yvyty Siónpe!
Pemoerakuã karu’ỹ, peporohenói aty guasurã. Pemboaty opavavépe ha pejapo aty guasu, pemboaty tuja, mitã ha mitã kambu.
Omenda ramóva jepe tosẽ ikotýgui.
Tojahe’o pa’i kuéra Ñandejára rembiguái korapy ha altar pa’ũme, ha te’i: “Eiporiahuvereko kena ore Jára ne retã guápe, ani reheja avave oñembohory ore rehe.
Ani reheja tetã nguéra ore rereko ipo guýpe, ha umi tupã gua’u rehe ojeroviáva he’i oréve:
“Mamo piko oĩ Tupã pende Jára?”
Upérõ Tupã Ñandejára ohechauka imborayhu ha oiporiahuvereko hetã guápe.
Tupã Ñandejára Ñe’ẽ.
SALMO ÑEMBOHOVÁI 50, 3-6a. 12-14. 17
R. Tupã Ñandejára, che poriahuvereko che rembiapo vaígui.
Tupã Ñandejára, che poriahuvereko, nde niko nemba’e porã.
Che poriahuvereko ha eipe’a che árigui che rembiapo vaikue.
Che johéi porã teko vaígui, che mopotĩ che angaipágui. R.
Ahecha kuaa niko ajavyha, ha mba’e vaígui ndaikatúi apoi.
Nde rehe añónte ajapo ivaíva ha ajapo ivaíva nde resa renondépe. R.
Tupã Ñandejára, embopyahu che rekove ha ta imara’ỹ,
che py’a to ñembopyahu ha ta imbarete.
Anítei che mosẽ ne renondégui, térã reipe’a che hegui nde pytu marangatu. R.
Embopyahu jevy chéve vy’a añandúva ajejopy vaihágui che renohẽvo,
ha nde pu’aka marangatu ta che mombarete. Tupã, che juru eipe’a ha ndéve rogueropurahéine. R.
SEGUNDA LECTURA:
Ñahendúta Tupã Ñandejára Ñe’ẽ San Pablo ohai va’ekue Corintos guápe.
2 Cor 5, 20 – 6, 2
Che pehenguẽ kuéra: Ore hína, aipórõ, Cristo rembijokuái, he’ise, Tupã Ñandejára voi ojerureha upéva ore rupi. Aipórõ, Cristo rérape rojerure peẽme peiko porã jevy haguã Tupã Ñandejára ndive. Cristo ndojapói va’ekue mba’eve ivaíva, opáichavo ñande rayhupápe Tupã Ñandejára oguereko va’ekue ichupe iñangaipáva ramo, jahupity haguã teko marangatu Tupã Ñandejára ome’ẽva Cristo rupi.
Néi, ore romba’apóva Tupã Ñandejárape guarã, rojerure peẽme ani haguã pembohasa rei upe py’a porã Tupã Ñandejára ohechauka va’ekue. Ha’e he’i Ikuatiañe’ẽ Ñe’ẽme:
“Ou porãrõ guare ndéve rohendu va’ekue, ha ho’a vaírõ guare ndéve roipytyvõ va’ekue.”
Ko’ágã hína pe ñepytyvõha ára, ikatu haguã oñesũ jejopy vaígui.
Tupã Ñandejára Ñe’ẽ.
VERSÍCULO ANTES DEL EVANGELIO Cf. Sal 94. 8a. 7d
Ani pemohatä pene korasö,
pehendu uvei Tupä Ñandejára ñe’ë.
EVANGELIO
Ko’ágä ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese? 6, 1-6. 16-18
Upe ramo Jesús he’i hemimbo’ekuérape:
Pejapóvo oimeraẽ mba’e Tupã Ñandejárape pemomba’e guasu haguã ani pejapo opavave rovake pejechauka haguã. Upéicha pejapo ramo pende Ru oĩva yvágape nomoengoviái chéne peẽme mba’evépe.
Upévare, peipytyvõ ramo oikotevẽ vape ani pemoherakuã opa rupi, ojapo háicha umi hova mokõiva umi tupaoha rupi, térã umi okaháre. Ha’e kuéra péicha ojapo oñeñe’ẽ porã haguã hese kuéra. Añetehápe ha’e peẽme, ichupe kuéra niko oñemoengoviapáma oñemoengovia va’erã. Peẽ peipytyvõ ramo oikotevẽvape, ani peheja oikuaa pende rapicha pehayhuvéva. Kirirĩháme pejapo, ha péicha pende Ru ohecháva mba’épa pejapo kirirĩháme, omoengoviáta peẽme pene rembiapokue.
Peẽ peñembo’e jave, ani peñembo’e umi hova mokõi vaicha. Ha’e kuéra niko ñembo’yhápe oñembo’e umi judío kuéra tupao rupi, térã umi tape ojuasaha rupi ojehechauka haguã opavavépe. Añetehápe ha’e peẽme, ichupe kuéra niko oñemoengoviapáma oñemoengovia va’erã. Peẽ peñembo’éta vove katu, peike pende kotýpe, pemboty pene rokẽ, ha peñembo’e pende Rúpe pene añoháme. Ha pende Ru ohecháva mba’épa pejapo pene añoháme, omoengoviáta peẽme pene rembiapokue.
Ndape’úi jave mba’eve Tupã Ñandejárape pemomba’e guasu haguã, ani peñembohovasy umi hova mokõi vaicha. Ha’ekuéra niko péicha ojapo ojechauka haguã ndo’úi jave hína mba’eve. Añetehápe ha’e peẽme, ichupekuéra niko oñemoengoviapáma oñemoengovia va’erã. Peẽ ndape’úi jave mba’eve Tupã Ñandejárape pemomba’e guasu haguã, pejovahéi ha peñakã karãi, ani haguã avave ohechakuaa ndere’uiha mba’eve Tupã Ñandejárape remomba’e guasu haguã. Nde Ru añónte ohecháta pe ne añoháme rejapóva. Ha’e ohecha kuaáta ndéve ha omoengoviáta ndéve ne rembiapokue.
Ñandejára Jesucristo Ñe’ẽ.