LECTURAS DEL SÁBADO 18 DE ENERO

LECTURAS DEL SÁBADO 18 DE ENERO

Primera lectura:

Ko’ágä   ñahendúta Tupã Ñandejára ñe’ẽSamuel arandukápe oĩ háicha         

    9, 1-6. 10. 17-19; 10, 1a

Oiko peteĩ karai Benjamín ñemoñaregua hérava Quis, Abiel ra’y; Abiel, Seror ra’y; Seror, Becorat ra’y; Becorat, Afíah ra’y. Quis, karai johéi pyre ojeapóva mba’e ramo. Ita’ýra peteĩ, mitã rusu pyahu ha iporãva, héra Saúl. Israélpe ndaipóri ha’éicha iporãva ha ijyvateve maymávagui; ijati’y guive ohasa ichupe kuéra. Peteĩ jevy okañy karai Quísgui hymba vúrro kuéra. Upérõ he’i ita’ýra Saúlpe: Eraha ne irũrã peteĩ ñane mba’apohára ha ta peho peheka ñandéve ñane rymba kuéra.

Saúl oho Efraín yvyty rupi, ohasa yvy hérava Salisá rupi ha ndojuhúi hymba vúrro. Ohasa avei yvy rupi hérava Saalim ha Benjamín rupi ha ndojuhúinte avei.

Samuel ohechávo Saúlpe, Tupä Ñandejára he’i ichupe: “Kóva hína upe kuimba’e añe’ẽ hague ndéve. Ha’e oisãmbyhýta che retã guápe.”

Pe táva reike ypýpe Saúl oñemboja Samuel rendápe ha he’i ichupe: Ikatu piko eremi chéve moõpa opyta mba’e rechahára róga?

Samuel he’i ichupe: Che hína upe mba’e rechahára. Tereho che renonderã upe ijyvatehápe hapépe rekarúta che ndive. Ko’ẽrõ ko’ẽ mboyve reho kuaa ha amombe’úta ndéve opa mba’e reikuaaséva.

Upérõ Samuel oguenohẽ peteĩ ñandyry ryru ha oñohẽ Saúl akã ári, he’ívo ichupe: Tupä Ñandejára ne moĩ ko árape hetã Israel sãmbyhyhárõ. Nde reisãmbyhýta ichupe ha reipe’áta umi hese ija’e’ỹvagui omongoráva ichupe. Ha kóvata hína techaukaha Tupä Ñandejára ne moĩ hague Israel sãmbyhyhárõ.

Tupã Ñandejára Ñe’ẽ.

SALMO ÑEMBOHOVÁI                                  20, 2-7

R. Ñandejára, ore ruvicha ovy’a remombarete haguére ichupe.

Tupä Ñandejára, ore ruvicha ovy’a remombarete haguére ichupe.

Ovy’a, nde rupi ipu’aka haguére umi hese oñemoĩvare. R.

Reme’ẽ ichupe umi mba’e ipy’a ite guive oipotáva.

Ne rendápe oguahẽ ha tuicha rehovasa, mba’e jegua óro mburuvicha guasu

oiporúva remonde iñakãre. R.

Oikove puku haguã ojerure ndéve, ha reme’ẽ ichupe jeikove ndepukupa jepéva.

Ichupe rehovasa opa árape, ha ijypýpe reime rupi rembovy’a. R.

ALELUIA Lc 4, 18

Aleluia.

Tupä Ñandejára che mbou va’ekue agueraha haguä Marandu Porä imboriahúvape, amoerakuävo oñemondohoha umi apytïmbýpe oikóva sä.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       2, 13-17

Upe ramo Jesús oho jevy yguasu rembe’ýpe. Opavave oñemboja hese ha ha’e oporombo’e. Ohasávo, ohecha Alfeo ra’y Levípe, oguapyva hína viru oñemono’õ hápe Rómape guarã.

Jesús he’i ichupe: Eju che moirũ. Leví opu’ã ha oho hendive.

Jesús okaru hína Leví rógape, ha heta umi viru omono’õva Rómape guarã. Ha ambue herakuã vaíva oguapy avei mesápe Jesús ha hemimbo’e kuéra ndive. Heta niko umi oikóva hapykuéri. Mbovymi Moisés rembiapoukapy mbo’eha Fariséova, ohechávo Jesús okaruha umíva ndive, oporandu hemimbo’e kuérape: Mba’éicha rupi piko pene mbo’ehára oguapy okaru viru mboatyha ha iñangaipáva ndive? Jesús ohendu upéva ha he’i ichupe kuéra: Hesãiva noikotevẽi pohãnohárare, hasývante. Che ndajúi ahenóivo heko jojávape, hembiapo vaívapente.

Ñandejára Jesucristo Ñe’ẽ