LECTURAS DEL SÁBADO 26 DE OCTUBRE

LECTURAS DEL SÁBADO 26 DE OCTUBRE

Primera lectura:

Ñahendúta Tupã Ñandejára Ñe’ẽ San Pablo ohai va’ekue Roma guápe                                                                 

             8, 1-11

Che pehẽnguekuéra:

Ko’ágä ndaipórivéima ñenupã umi Jesucrístore ojoajúvape guarã. Pe Espíritu rembiapoukapy oporomoingovéva Jesucristo rupi, nde pe’a pe angaipa ha mano rembiapoukapýgui. Tupã Ñandejára niko ojapo, pe Moisés rembiapoukapy ikatu’ỹ va’ekue  yvypóra reko kangýgui: Tupã Ñandejára ombou Ta’ýra teépe, yvypóra heko kangy vaicha ha angaipa apoha ramo, péicha ohundi haguã upe angaipa apo. Upéicha ojapo, ikatu haguã ñande jajapo teko jojápe pe tembiapoukapy ojeruréva, ndajaiko véima niko ñande reko kangýpe, jaikóma Espíriture.

Umi oikovéva yvypóra reko kangýpe, ojepy’apy upéicha oiko haguãnte, ha umi oikóva Espíritu rehe katu, ojepy’apy Espíritu reheguáre. Ha pe jepy’apy yvypóra reko kangy rehegua, oporogueraha manóme. Jepy’apy Espíritu rehegua katu, oporogueraha jeikove ha py’a guapýpe. Umi ojepy’apýva oikónte haguã yvypóra reko kangýpe, umíva opu’ã Tupã Ñandejárare, ndoikoséi ha ndaikatúi voi oiko Tupã Ñandejára rembiapoukapýre. Upévare, umi yvypóra reko kangýre oikóva ndaikatúi ombohorývo Tupã Ñandejárape.

Peẽ katu ndapeiko véima upe yvypóra rekópe, Espíritu rehéma, Tupã Espíritu oiko rupi pende pype. Oguereko’ỹva Jesucristo Espíritu ipype, ndaha’éi Jesucristo rehegua. Ha Jesucristo oikove ramo pende pype, omanóta ramo jepe pende rete pene angaipakuére, pe espíritu oikove Tupã Ñandejára pene mboheko joja rupi. Ha pe Jesús moingove jevyhare Espíritu oikove ramo pende pype, upe omoingove jevy va’ekue  Jesucrístope voi, omoingove jevýta  umi pende rete omano va’erãva, Tupã Espíritu oikovéva pende pype rupi.

Tupã Ñandejára Ñe’ẽ.

SALMO ÑEMBOHOVÁI                                                23, 1-6

R. Toñemomba’e guasu umi ohekáva Tupä Ñandejárape.

Ko yvy niko Tupä Ñandejára mba’e,

opa mba’e ipype oĩva, ha opa mba’e ipype oikóva.

Ha’e upe yvy omopyenda va’ekue,

yguasu ha ysyry ári omboguapy. R.

Mávapa ojupíne Ñandejára yvytýpe?

Mávapa opytáne itupao marangatúpe?

Umi ipo ha ipy’a ipotĩva ha ojeíva opa mba’e vaígui,

ta’ãnga omomba’e’ỹva térã Tupã réra oiporu rei rei’ỹva. R.

Umívape ohovasa Tupã Ñandejára,

ha oguenohẽ ichupe kuéra jejopy vaígui.

Upéichako umi Tupä Ñandejárare ojeroviáva,

umi Jacob Tupã rendápe oguahẽva. R.

ALELUIA Ez 33, 11

Aleluia.

Ñandejára Jesucristo he’i:

“Che ndaipotái umi hembiapo vaíva omano,

to jevy uvei hembiapo vaikuégui ha toikove”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                             

                                                     13, 1-9

Umíva umi árape avei, oĩ ohóva ohecha Jesúspe, ha omombe’u ichupe mba’éichapa Pilato ojuka kuimba’e kuéra Galiléa guápe omba’e kuave’ẽ jave hikuái Tupã Ñandejárape.

Jesús he’i ichupekuéra: “Peimo’ãpa peẽ upéva ojehu hague umi Galiléa guápe, ha’ekuéra iñangaipa hetave hague ambuégui upe tetãme? Ha’e peẽme nahániriha, ha peẽ voi ndapejevýirõ Tupã Ñandejára gotyo, pemanóta avei.

Peimo’ã piko peẽ umi 18 omano va’ekue  ako ho’a ramo hi’árikuéra Siloé pegua óga yvate, hembiapo vaive ra’e umi ambue Jerusalénpe oikóvagui? Ha’e peẽme nahániriha; ha peẽ voi ndapejevýirõ Tupã Ñandejára gotyo, pemanóta avei.”

Jesús omombe’u ichupe kuéra ko ñe’ẽ mbojoja: “Peteĩ kuimba’e oguereko va’ekue  peteĩ ígo iparraltýpe, ha oho ohecha hi’apa, ha ndojuhúi mba’eve. Aipórõ he’i pe parralty ñangarekohápe: ‘Ma’ẽ, mbohapy áño pukukue aju ko igo’akue arahávo, ha araka’eve ndajuhúi. Eikytĩ mba’e, ma’erã piko omboai reíta hína ko yvy?’ Pe parralty ñangarekoha katu he’i ichupe: ‘Che jára, eheja gueterína peteĩ áño. Ahapyatýta ha amoĩta hese pohã omopu’ã porãva. Hi’a ramo iporã, ha upéicha’ỹrõ reitýne.’”

Ñandejára Jesucristo Ñe’ẽ