LECTURAS DEL SÁBADO 28 DE DICIEMBRE

LECTURAS DEL SÁBADO 28 DE DICIEMBRE

LOS SANTOS INOCENTES MÁRTIRES

Ñahendúta Tupä Ñandejára Ñe’ẽ San Juan aranduka peteïhápe oï háicha

1,5__ 2,2

Kóva hína pe ñe’ẽ Jesucrísto ore mbo’e va’ekue ha amoerakuãva peëme: Tupä Ñandejára hína tesapehára ha ipype ndaipóri mba’eveichagua pytũ. Ja’e ramo ñaimeha hendive ha jaiko pytũmbýpe, ñande japu ha ndajaikói pe añete ojerure háicha. Ha jaiko ramo tesapeha rendýpe, Tupä Ñandejára oiko háicha tesapeha rendýpe, upéicha ramo ñaime oñondive peteï py’ápe, ha ita’ýra Jesús ruguy ñane mopotĩñane angaipágui.

Ja’e ramo na ñane angaipaiha, ñañe mbotavy ñande jupe voi, ha ndaipóri ñande pype añete, ha ñañemombe’u ramo ñane angaipágui, ikatu jarovia Tupä Ñandejára, heko jojáva, oheja reitaha ñane angaipa ha ñane mopotĩtaha opa teko añágui, ja’e ramo na ñane angaipaiha, ja’e hína Tupä Ñandejára ijapuha, ha ndajarohorýi añetehápe iñe’ẽ.

Che ra’y kuéra pohayhu etéva: ahai peëme ko’ã mba’e ani haguã pejapo ivaíva. Opáichavo, jajapo ramo ivaíva, jareko Jesucrístope ojeruréva ñande rehe Itúvape. Ha’e imarangatu. Ha omano va’ekue ojeheja rei haguã ñandéve ñane angaipa, ha nda ha’éi ñandévente, opa yvypórape avei.

Tupä Ñandejára Ñe’ẽ.

SALMO ÑEMBOHOVÁI 124,2-5. 7b-8

R.Upe ñane pytyvõva niko Tupä Ñandejára.

Tupä Ñandejára noñemoĩri rire ñande yke rehe,
yvypóra kuéra opu’ã ramo guare
pýra ite ñane mokõ va’erã mo’ã. R.

Ipochy hendy hague rehe ñane ndive hikuái,
Y ñande aho’ipa va’erã mo’ã,
y pochy ñane moñapymi va’erã mo’ã. R.

Upe ñuhã opẽ ha ñande ñasẽ ñakañy joaite.
Upe ñane pytyvõva niko Tupä Ñandejára,
yvága ha yvy apohare. R.

ALELUIA

Aleluia.
Ndéve, TupäÑandejára romomba’eguasu ha rogueropurahéi,
ndéve, Ñandejára, ne momba’eguasu ha
nde gueropurahéi umi ne mborayhúre omanóva.
Aleluia.

EVANGELIO

Ko’ágä ñahendúta Ñandejára Jesucrísto rekove ha hemimbo’e San Mateo omombe’u háicha.
Pejapysaka porãtapa hese?

2, 13-18

Upe ramo oho rire umi karai arandu, peteï Tupä Ñandejára remimbou ojehechauka Josépe iképe, ha he’i ichupe:

Epáy ha epu’ã. Eraha ne ndive pe mitã ha isy, ha pya’e Te reho Egíptope. Epyta upépe che romomarandu peve. Herodes ohekaukáta hína pe mitã ojuka haguã.

Upévo José opáy. Pe pyharépe voi ogueraha pe mitã ha isy Egíptope. Ha opyta hikuái upépe Herodes omano meve. Péicha ojehu oiko haguã heko itépe upe Tupä Ñandejára he’i va’ekue maranduhára rupi: “Egíptogui ahenói va’ekue che Ra’ýpe”.

Herodes ohecha kuaávo umi karai arandu ombotavy hague ichupe, ipochy eterei. Upéva rehe, ojukaukapa ite mitã kuimba’e omboty’ỹva guive mokõi áño, oikóva Belénpe ha ijerekuévo. Umi mitã ojejuka karai arandu kuéra omombe’u hague rehe ichupe mba’e árapepa ohecha ra’e hikuái pe mbyja.

Ha péicha oiko, ojehu haguã heko itépe maranduhára Jeremías omoĩ va’ekue kuatiápe:
Oñehendu Ramáme tasẽ ha jahe’o soro.
Raquel ojahe’o hína imembykuéra rehe, ha omanomba hague rehe hikuái ndohejái avavépe
omoangapyhy ichupe.

Ñandejára Jesucrísto Ñe’ẽ.