LECTURAS DEL VIERNES 08 DE NOVIEMBRE

LECTURAS DEL VIERNES 08 DE NOVIEMBRE

Primera lectura:

Ñahendúta Tupã Ñandejára Ñe’ẽ San Pablo ohai va’ekue Roma guápe                                    

15, 14-21

Che pehẽnguekuéra, aikuaa porã pene renyhẽha mba’e porãgui ha opaichagua arandúgui. Ha peñe moñe’ẽ kuaaha ojupe. Ko kuatia ñe’ẽme katu añemoĩ añe’ẽ resakã porãvo peẽme heta mba’ére, ani haguã pende resarái. Péicha ajapo, Tupã Ñandejára, ipy’a porã rupi ome’ẽgui chéve ajapo haguã, ha amba’apo Jesucrístope umi judio’ỹvape iporã haguã. Ko che rembiapo niko, pa’i rembiapóva hína, amoasãivo Tupã Ñandejára marandu porã, amoĩ haguã henondépe umi judio’ỹvape, kuave’ẽmby ombohorýva chupe ramo, ha imarangatúva Espíritu Santo rupi.

Ndareíri avy’a Cristo reheve, Tupã Ñandejárape guarã amba’apo haguére. Che añe’ẽ umi mba’e Cristo ojapo va’ekuére che rupi, umi judio’ỹva iñe’ẽ rendu hagua Tupã Ñandejárape. Péicha ajapo, umi mba’e ha’éva ha ajapóva rupive, mba’e techaukarã ha mba’e hechapyrãva pu’aka, ha Tupã Espíritu pokatu rupi. Upéicha rupi amohu’ã porã va’ekue  Cristo marandu porã emosarambi, Jerusalén guive, ha opa rupi, Iliria yvy peve. Opa ára añeha’ã va’ekue  ambo’e Cristo marandu porã, umi araka’eve oñehendu’ỹ haguépe Jesucristo rehegua, ani haguã amopu’ã mba’eve ambue omoñepyrũ haguépe. Ajapo uvei katu he’i háicha Tupä Ñandejára Ñe’ẽ:

“Ohecháne umi araka’eve oikuaa’ỹ va’ekue  ichugui  mba’eve, oikuaáne umi araka’eve ohendu’ỹva’ekue  ichugui  mba’eve.”

Tupã Ñandejára Ñe’ẽ.

SALMO ÑEMBOHOVÁI                                                97, 1-4

R. Tupä Ñandejára ohechauka ipokatu, tetã nguérape ohechauka heko jojaha.

Pepurahéi Tupä Ñandejárape purahéi pyahu,

mba’e hechapyrãva ojapógui ha’e.

Ipyapy mbarete ha imarangatúgui ipu’aka opa mba’ére. R.

Tupä Ñandejára ohechauka ipokatu,

tetã nguérape ohechauka heko jojaha.

Imandu’a imborayhu ha heko

jeroviaháre tetã Israel ndive guarã. R.

Yvy jerekuévo ojehecha             

Tupã Ñandejára ipu’akaha opa mba’ére.

To jererohory Tupä Ñandejára yvy jerekuévo,

purahéi rory to soro ha to jevy’a. R

ALELUIA 1Jn 2, 5

Aleluia.

Tupä Ñandejára mborayhu oguahëma hu’äme

upe ojapóvape Ñandejára Jesucristo ñe’ë.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                                 

                16, 1-8

Upe ramo Jesús omombe’u avei kóva hemimbo’ekuérape:

“Oiko va’ekue  peteĩ kuimba’e imba’e retáva oguerekóva peteĩ hóga rerekua. Ha ojeho oje’e ichupe, upe óga rerekua oiporu vaipaha hína umi oguerekóva. Ijára ohenói ha he’i ichupe: ‘Mba’e piko ko oje’éva nde rehe? Emoĩmba chéve kuatiáre ne rembiapokue, nde ndaikatu véima reiko che róga rerekuárõ.’

Upe óga rerekua oñemoĩ ojepy’amongeta: ‘Mba’e piko ajapóta ko’ágä, che jára che rejáva mba’apo’ỹre? Na che mbaretéi ayvyjo’o haguã ha atĩ ajerure haguã tupãmba’e. Aikuaáma mba’épa ajapóta, areko haguã che moguahẽva hógape, ágã apytávo mba’apo’ỹre.’

Ohenói peteĩ teĩme umi ohepyme’ẽ va’erãva ijárape. Pe tenonde guápe oporandu: ‘Mbovýpa rehepyme’ẽ va’erã che járape?’ Upéva he’i ichupe: ‘Ame’ẽ va’erã ichupe 100 hyru ñandyry.’ Pe óga rerekua he’i: ‘Péina ko’ápe nde kuatia, eguapy ha ejapo ambue 50 rehénte.’

Upéi oporandu ambuépe: ‘Ha nde, mboy rehepyme’ẽ va’erã? Ha ha’e he’i: ‘100 atýra trígo.’ Pe óga rerekua he’i avei ichupe: ‘Kóina ápe nde kuatia, ejapo ambue 80 rehénte.’ Mba’e jára ohecha kuaa, pe óga rerekua rova atã ikatupyry hague opa ojapóvape. Ha upéicha niko, umi omba’apóva ko yvy ári guáre ikatupyryve voínte umi Tupã Ñandejára rembipotárente oikóvagui.”

Ñandejára Jesucristo Ñe’ẽ.