LECTURAS DEL VIERNES 21 FEBRERO

LECTURAS DEL VIERNES 21 DE FEBRERO

PRIMERA LECTURA:

Ñahendúta Tupã Ñandejára Ñe’ẽ Santiago ohai va’ekue                         

2, 14-24. 26

Che pehẽnguekuéra: Mba’épe piko iporã oje’e ojeroviaha ha ndojapói mba’eve iporãva? Ikatu nga’u piko péichagua jerovia ñane renohẽ ivaívagui? Oĩrõ peteĩ ñane pehenguéva ijao’ỹva ha oguereko’ỹva ho’u va’erã upe árape, ha peteĩ peẽva he’i ichupe: “Toho porã ite ndéve. Eñeñuã ro’ýgui ha ekaru” ha nome’ẽi ichupe upe oikotevẽva, mba’épe piko iporã upéva? Upéicha avei jerovia añónte, ha ojechauka’ỹva tembiapokue rupi, výro rei.

Ikatu jepe oĩ he’íva: “Nde rejerovia ha che katu ajapo iporãva”. Ehechauka chéve aipórõ, nde jerovia rejapo’ỹre mba’eve, ha che ahechaukáta ndéve che jerovia che rembiapokue rupi.

Nde rerovia, Tupã Ñandejára peteĩ añonteha, ha rejapo porã. Mba’epochy kuéra katu oguerovia avei upéva ha oryryipa kyhyjégui. Nde rehechakuaái piko, nde tovatavy, pe jerovia ojechauka’ỹva tembiapokue rupi, výro reiha? Tupã Ñandejára oguereko va’ekue imarangatúvarõ ñande ru ypykue Abrahámpe, upe ojapo va’ekuére oikuave’ẽ ramo guare ita’ýra Isaácpe. Rehecháma Abraham ohechauka hague ijerovia hembiapokue rupi, ha hembiapokue rupi ojerovia hague hekópe.

Upéicha oiko va’ekue pe Tupä Ñandejára Ñe’ẽ he’íva: “Abraham oguerovia Tupãme ha upévare Tupã Ñandejára oguereko ichupe imarangatúva ramo.” Ha Abraham oñembohéra va’ekue Tupã Ñandejára irũ tee.

Pehecháma aipórõ Tupã Ñandejára oguerekoha yvypórape imarangatúva ramo, hembiapo kuére avei, ndaha’éi ijeroviáre añónte.

Ipaharã: ñande rete espiritu’ỹre, te’õ nguéicha reínte. Jerovia tembiapokue’ỹre výro reínte.

Tupã Ñandejára Ñe’ẽ

SALMO ÑEMBOHOVÁI     111, 1-6

R. Ovy’a va’erã Tupä Ñandejárape ohayhúva

O bien

Aleluia.

Ovy’a upe omomba’éva Tupä Ñandejárape, ha ipy’a rory ojapóvo hembiapoukapy.

Iñemoñare imbareténe ko yvy ári, heko potĩva ra’y kuéra ojehovasáne. R.

Hógape opa mba’e oguerekóne, ha ipojeráne opa árape.

Pytũmbýpe jepe oĩ ohesapéva heko potĩvape,

ha upéva ipy’a porã, oporo poriahuvereko ha heko joja. R.

Ovy’a upe ipy’a ite guive oiporukáva hapichápe,

ha opa oguerekóva ogueroguata hekópe.

Heko jojáva ndojecha vai chéne, opa ára oikóne hese mandu’a. R.

ALELUIA       Cf. Hech. 16, 14b

Aleluia.

Tupä Ñandejára eipe’a ore korasö

romoneï hagua nde Ra’y Ñe’ë.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                              88, 34-9, 1

Upe ramo Jesús ohenói hemimbo’ekuérape ha opavavépe, ha he’i: Oime ramo che moirũséva to ñembyesarái ijehegui, to hupi ikurusu ijapére, ha ta che moirũ. Pe hekovére hakate’ỹva, omanóta. Pe omanóva che rehehápe ha che marandu porã rehehápe katu, oikovéta. Mba’épa oguenohẽne yvypóra oguerekopárõ opa ite mba’e ipópe, ha oñehundi ramo ha’e? Mba’eve!

Mba’épa ikatúne yvypóra ome’ẽ oikove jevy haguã? Mba’eve! Oimérõ che rerotĩva ha oguerotĩva che ñe’ẽ ko’ã tekove jeroviaha’ỹ ha mba’e vai apoha renondépe, che avei, yvypóraicha aju va’ekue, atĩne heseve kuéra ajúvo che Ru mimbipa reheve ha Tupã Ñandejára remimbou marangatu kuéra ndive.

Jesús he’i avei ichupe kuéra: Añetehápe ha’e peẽme, ko’ápe oĩva apytépe oĩ nomano mo’ãiva ohecha mboyve Tupã Ñandejára sãmbyhy.

Ñandejára Jesucristo Ñe’ẽ.