LECTURAS DEL VIERNES 3º TIEMPO ORDINARIO

LECTURAS DEL VIERNES 3º TIEMPO ORDINARIO

Ko’ágã ñahendúta Tupã Ñandejára ñe’ẽ Samuel arandukápe oĩ háicha 11, 1-4a. 5-10a. 13-17. 27c

Pe ára yvoty jave, upérõ niko mburuvicha guasu kuéra osẽ jepi ñorairõháme, David omondo Joab ha mburuvicha kuérape, opa ñorairõhára Israelgua ndive. Ohundi hikuái amoníta kuérape ha omongora itáva Rabá. David katu opyta Jerusalénpe.

Peteĩ ka’aru David opu’ãvo ike asajégui, oguata hóga guasu ape ári ha ohecha upégui peteĩ kuña porã ite ojahúva. David oporandu mávapa pe kuña, ha oje’e ichupe upéva Betsabé Eliam rajy ha Urías hitíta rembireko. David ogueruka pe kuña ha oñeno hendive; upe rire pe kuña oho jevy hógape. Betsabé opyta hye guasu ha omombe’uka Davídpe.

Upérõ David he’iuka Joábpe ombou haguã hendápe Urías, pe hitítape, ha péicha ojapo Joab. Ou rire Urías David oporandu ichupe mba’éichapa oiko Joab ha ñorairõhára kuéra, ha mba’éichapa oho hína pe ñorairõ. Upéi he’i ichupe oho haguã hógape ojepyhéi ha opytu’umi. Urías osẽ rire mburuvicha guasu rógagui, David oguerahauka ichupe hógape jopói ramo tembi’u imeságui ho’u haguã. Urías katu oñeno mburuvicha guasu róga rokẽme tembiguái kuéra apytépe ha ndohói hógape.

Oñemombe’úvo Davídpe Urías ndohói hague hógape, David oporandu ichupe: Mba’ére piko nderehói nde rógape, ko mombyry etégui rejúva?

David omboguapy ichupe imesápe okaru ha ho’u haguã kaguy hendive ha omonga’u ichupe. Pyhare oguahẽvo Urías opyta jevy oke tembiguái kuéra apytépe ha ndohói hógape.

Upe ára ambuépe David ohai peteĩ kuatiañe’ẽ Joábpe ha omondo ichupe Urías rupi. Upe kuatiápe he’i: “Pemoĩ Uríaspe tenonde upe iñarõvehápe ñorairõ ha upéi peheja ichupe ha’eño tomano ñorairõháme.”

Upéicha rupi, Joab omongora vove pe táva ondyry haguã hese, omoĩ Uríaspe ha’e oikuaahápe oĩha umi táva pegua ñorairõhára ipy’a guasuvéva. Umi ñorairõhára osẽ ondyry haguã Joab rehe ha ojuka ñorairõhára mbovymíme Joab ndivegua, ha ijapytépe kuéra ojuka avei Uríaspe.

Tupã Ñandejára Ñe’ẽ.

SALMO ÑEMBOHOVÁI   50, 3-7. 10-11

Opavave: Tupã, che poriahuvereko, nde niko ne mba’e porã

Tupã Ñandejára, che poriahuvereko, nde niko ne mba’e porã,

Che poriahuvereko ha eipe’a

che árigui che rembiapo vaikue. O.

Che johéi porã teko vaígui, che mopotĩ che angaipágui.

Ahecha kuaa niko ajavyha ha mba’e vaígui ndaikatúi apoi.

Nde rehe añónte ajapo ivaíva, ha hendape’ỹva nde rovake ajapo. O.

Upévare, opa mba’e eréva oĩ porã,

Ndaipóri avave he’i va’erã mba’eve.

Aikove ypy guive voi ajapo ivaíva, che sy ryepyguivéma voi asẽ che ky’a. O.

Vy’a ha tory ta ñandu jevy, che rete hasypáva taikyre’ỹ jevy,

anítei remaña che angaipáre, che rembiapo ky’águi katu che mopotĩ. O.

ALELUIA Cf. Mt  11, 25

Aleluia.

Romomba’e guasu che Ru, yvy ha yvága Jára, reikuaauka hague mba’e guasu ete Sambyhy rehegua naiñarandúivape.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha    4, 26-34

Upe ramo Jesús he’i hemimbo’ekuérape: “Tupã Ñandejára  sãmbyhy ojehu, ojehu háicha kuimba’e oñemitỹ va’ekuépe. Ha’e okérõ térã ipáype, pyhare térã arakue, pe mba’e ra’ÿi heñói ha okakuaa, ha’e oikuaa’ỹre mba’éichapa. Pe yvýgui niko ijehegui voi heñói raẽ upéi hakã ha upéi hi’a. Ha umíva hi’ajúvo omboaty, oguahẽmagui mono’õha ára.”

He’i avei Jesús: Mba’épepa ojogua Tupã Ñandejára sãmbyhy? Mba’épepa ñambojojáta? Ojogua ku mostása ra’ỹime oñeñotỹva. Mostása ra’ỹigui michĩvéva niko ndaipóri. Oñeñotỹvo katu okakuaave opa mba’e kokuépe opu’ãvagui, ha guyrakuéra jepe ou ojaitypo umi hakãre.

Upéicha Jesús omombe’úva ichupe kuéra pe ñe’ẽ heta mbojoja ko’ãichagua rupi, ikatu haguã oike iñakãme nguéra. Ha mba’eve nde’íri ichupekuéra mbojoja oipuru’ỹre. Hemimbo’e kuérape katu omyesakã opa mba’e upe rire.

Ñandejára Jesucristo Ñe’ẽ