LECTURAS DEL VIERNES I DE CUARESMA

LECTURAS DEL VIERNES I DE CUARESMA

Ko’ágä   ñahendúta Tupã Ñandejára ñe’ẽ Ezequiel arandukápe oĩ háicha  18, 21-18

Péicha he’i Tupã Ñandejára: Oime ramo heko añáva ojevýva hembiapo vaikuégui, ha ojapo heko jojáva ha heko peguáva, ha opa che rembiapoukapy añetehápe oikovéne ha nomanói chéne. Che na che mandu’avéi chéne hembiapo vaikuére, ha oikovéne ojapo haguére iporãva. Che ndaipotái omano pe heko añáva, aipota opoi heko vaígui ha oikove. Che, opa mba’e Jára, ha’e upéicha. Pe heko jojáva ndaheko porãvéi ramo, ha ojapo heko añáva rembiapo, peimo’ã piko peẽ oikotevẽtaha. Na che mandu’avéi chéne umi mba’e porã ojapo va’ekuére, omanóne iñangaipáre.

Peẽ pejéne nda che reko jojaiha. Ehendúna, Israel, peje piko peẽ nda che reko jojaiha? Ndaha’éipa hína peẽ uvei umi pene rembiapo vaíva? Imarangatúva ojei ramo heko jojágui, ojapo ivaíva ha omano. Omano hembiapo vai haguére. Heko añáva ojei ramo mba’e vai apógui ha ojapo heko joja ha hekópe guáva, oikovéne katu ete. Ojesape’a ramo ha oñemboyke mba’e vai eta ojapo va’ekuégui, añetehápe oikovéne ha nomanói chéne.

Tupã Ñandejára Ñe’ẽ.

SALMO ÑEMBOHOVÁI    129, 1-8

R.Che Jára, che rendu mína.

Amo ipypukuvehágui niko ndéve añembo’e che Jára.

Che Jára, che rendu mína.

Ejapysaka porã che rehe, ejapysaka che rembijerurére. R.

Ne mandu’átarõ ore rembiapo vaikuére,

piko máva oñemoĩta ne renondépe?

Nde katu reheja rei oréve ore angaipa

ikatu haguã ndéve romomba’e. R.

Che py’a ite guive aha’arõ Tupä Ñandejára che pytyvõ haguã,

ha arovia upe iñe’ẽ ha’e ome’ẽva chéve.

Che py’a ite guive aha’arõ Tupä Ñandejárape,

ku guárdia ajapóva ára ko’ẽ oha’arõ háicha. R.

Ku guárdia ajapóva ára pyahu oha’arõ háicha.

Israel! ejerovia Tupä Ñandejára rehe.

Imborayhu na iñambuéiva, jejopy vaígui ha’e ñane renohẽta.

Ha’e oheja reíta Israélpe opa iñangaipa. R.

VERSÍCULO ANTES DEL EVANGELIO Ez18, 31

“Mombyry pemombo pende jehegui pe mbohovaise

peñemo korasö ha ánga pyahu”, he’i Tupä Ñandejára.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                       5, 20-26

Upe ramo he’i: Che ha’e peẽme ikatutaha peguahẽ yvágape Tupã Ñandejára oisãmbyhyhápe, peẽ peñeha’ãve ramo pejapo Tupã Ñandejára  rembipota, umi Moisés rembiapoukapýre oporombo’évagui ha fariséo kuéragui.

Peẽ peikuaa yma oje’e hague pende ypy kuérape: “Aníke reporojuka. Pe oporojukáva oñembojovake va’erã.” Che katu ha’e peẽme: Opavave oñembojovake va’erã ipochy haguére hapicha ndive. Ha oimérõ he’íva hapichápe ‘Nde výro’ upéva ojereraha va’erã karai kuéra renondépe. Ha pe he’íva hapicháre ‘Nde aña ra’y’ upéva ohóta ochyryry aña retãme.

Upévare, rerahakuévo hína ne kuave’ẽmby altárpe ha nemandu’a sapy’a nde rapicha ipy’a vaiha ne ndive, eheja ne kuave’ẽmby pe altar renondépe ha tereho nde rapicha rendápe. Eñemoĩ porã raẽ hendive ha upéi katu eju altárpe ha eme’ẽ ne mba’e kuave’ẽ.

Oimérõ nde rerahaséva ñembojovakehápe, tapére ikatu aja gueteri, eñeha’ã eñemoĩ porã hendive. Upéicha’ỹrõ, pe mbojovakehára ne me’ẽta mburuvichápe, ha mburuvicha ne moingéta yvyrakuápe. Añetehápe ha’e ndéve, upégui neresẽ mo’ãi emyengoviapa peve viru pehẽnguemínte jepe ndéve hembýva.

Ñandejára Jesucristo Ñe’ẽ.