LECTURAS DEL VIERNES II DE CUARESMA

LECTURAS DEL VIERNES II DE CUARESMA

PRIMERA LECTURA

Ko’ágã ñahendúta Tupã Ñandejára ñe’ẽ Genésis arandukápe oĩ háicha   37, 3-4. 12-13ª. 17b-28

Jacob ohayhuve Josépe ityke’ýrakuéragui, oikove ypy haguére ichupe ituja riréma ha ojapouka ichupe peteĩ ao jyva puku. Ityke’ýrakuéra ohechávo itúva ohayhuveha ichupe, ndaija’éi hese ha noñe’ẽvéi ichupe.

José ryke’ykuéra oho Siquem gotyo itúva ovecha kuéra reheve. Jacob he’i Josépe: Eju to rojokuái.

José oho ohekávo, ha ojuhu ichupekuéra Dotánpe. Ha’e kuéra ohecha ichupe mombyry guive. Oguahẽ mboyve, oñemoĩ hikuái peteĩ ñe’ẽme ojuka haguã ichupe, ha he’i hikuái ojupe: Péina pépe ou hína ku ohecháva iképe heta mba’e. Jajukána, jaity peteĩ ykua ipypukúvape ha ja’e hese tymba ñarõ ho’u hague ichupe; jahecha mba’épa oiko umi mba’e ohecha va’ekue iképegui. Rubén ndoipotái ojejuka ityvýra ha he’i: Natekotevẽi jajuka. Jaitýnte ko ñu mbytépegua ykuápe.

He’i upéicha, upéi oguenohẽ haguã upégui ha ogueraha jevy itúvape.

Oguahẽvo José, ityke’ýrakuéra oipe’a ichugui  ijao jyva puku, ha oity ichupe peteĩ ykua pypukúpe. Okaru aja hikuái, ohecha sapy’a Ismaelgua kuéra oúva Galaádgui. Ogueroja hikuái Egíptope ikaméllo apére mangaisy ha mba’e ryakuã ita. Ha Judá he’i ityvýrakuérape: Ma’erãpa jajukáta ñande ryvýpe ha upéi ñañeha’ãta ñamokañy ojekuaa’ỹ haguã ñande jajuka hague ichupe? Jajuka rangue, ñame’ẽ umi Ismael ñemoñarépe, ha ha’e kuéra to me’ẽ ñandéve hepykue. Upéicha nañamongy’a mo’ãi ñande po huguýre. Ñande ryvy niko.

Opavavépe iporã upéva. Ohasávo upe rupi umi ñemuhára Madiangua, ityke’ýra kuéra oguenohẽ Josépe ykuágui ha ome’ẽ ichupekuéra 20 pláta pehẽnguére. Madiangua ogueraha Josépe, Egíptope.

Tupã Ñandejára Ñe’ẽ.

SALMO ÑEMBOHOVÁI  104, 16-21

Opavave: Tupã Ñandejára omoañete upe he’i va’ekue.

Ñembyahýi guasu ogueru upe tetãme ha ohundipa hi’upyrã.

Henonderã nguéra katu omondo peteĩme,

Josépe, tembiguái ramo oñeme’ẽ va’ekue. O.

Ojopy hikuái ipy yvyra kuápe ha ijajúragui omosã, ojehu peve umi mba’e

he’i va’ekue ojehutaha.

Tupã Ñandejára omoañete upe he’i va’ekue. O.

Mburuvicha guasu opoika ichugui,

ojejopy hágui oñenohẽ haguã he’i.

Hógape omoĩ ichupe mburuvichárõ. Opa mba’e ipo guýpe omoĩ. O.

VERSÍCULO ANTES DEL EVANGELIO Jn 3, 16

Tupã Ñandejára ohayhu etereígui yvypórape ome’ẽ Ta’ýra peteĩme: mayma Ichupe ogueroviáva Oikove haguã tapiaite.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha    21, 33-46

Upe ramo Jesús he’i pa’i ha umi itujávape: Pehendu avei kóva: ‘Oiko va’ekue peteĩ karai oñotỹuka va’ekue peteĩ parralty ijyvýpe. Omongorapy ha upéi ojapouka oñeñami haguãme umi parral a. Omopu’ã avei peteĩ óga yvate, upégui ou haguã omaña  oñangarekóva ijyvýre.

Upéi katu, oiporuka hepýre mba’apohahárakuérape, ha oho mombyry. Ha oguahẽvo ára parral a ojepo’o haguã, pe karai omondo hembiguáikuérape umi mba’apohára rendápe, ojerurévo pe ichupe ohupitýva.

Umi mba’apohárakuéra katu ojeity umi tembiguái ári ha peteĩme oinupã heta, pe ambuépe ojuka, ha ambuépe katu itápe ojapi ojuka peve. Pe karai katu omondo hetave hembiguai kuérape, ha umi mba’apohára ojapo hesekuéra umi ambuére ojapo haguéicha.

Ipahápe omondo ta’ýra teépe. He’i ipy’apýpe: “Che ra’ýpe niko omomba’éta.” Ohechávo hikuái pe yvy jára ra’ýpe, umi mba’apohára he’i: “Pévape opytapáta hína opa mba’e. Jajuka ha topyta ñandéve ko yvy.” Ha ojeity hi’ári hikuái, oguenohẽ pe parral týgui ha ojuka ichupe.

Upéi Jesús oporandu: Mba’épa hi’ã peẽme ojapotaha pe yvy jára?

Ha he’i hikuái ichupe: Ojukapáne umi tekove ahẽme, oiporiahuvereko’ỹre ichupe kuéra. Upéi ome’ẽne pe ijyvy ambue mba’apohárape ome’ẽtáva ichupe pe imba’erãva.

Upépe Jesús he’i ichupekuéra: Peẽ niko peikuaa Ñandejára ñe’ẽ he’iha:

“Upe ita omboykéva umi óga mopu’ãhára upéva ári ko’ágã oñemopu’ã.

Tupã Ñandejára upéicha ojapo ha ore jurujái rohechávo.”

Upévare ha’e peẽme, Tupã Ñandejára sãmbyhy ojepe’áta pende hegui ha oñeme’ẽta ambuépe, ome’ẽtava hi’a heko itépe. Ha oimeraẽva ho’áva pe ita hi’ári, opẽmba itéta. Ha oimeraẽva ári ho’a ramo pe ita, omongu’ipa itéta ichupe.

Umi pa’i ruvicha ha fariséokuéra ohendúvo umi ñe’ẽ mbojoja Jesús omombe’úva, ohecha kuaa hesekuéra he’iha. Ha omyakãsãse hikuái Jesúspe. Okyhyjénte opavavégui, oguerekógui ichupe hikuái maranduhára ramo.

Ñandejára Jesucristo Ñe’ẽ.