LECTURAS DOMINGO 23º DEL TIEMPO ORDINARIO

LECTURAS DOMINGO 23º DEL TIEMPO ORDINARIO

LECTURA PETEÎHA:
Ko’ágã ñahendúta Tupã Ñandejára ñe’ẽ Sabiduría arandukápe oĩ háicha (9, 13-18)

Máva piko ikatu oikuaa mba’épa ojapo Ñandejára, térã oimo’ã mba’e mba’épa oipota?
Yvypóra remiandu niko, ndaha’epái jeroviaha, ha na’añetepái.
Ñande rete ituju va’erãva ñane ángape ipohýi, ha ojopy ñane apytu’ũ jepy’apy opaichaguápe. Hasy jaikuaa haguã opa yvy ári oĩva, ha pe ikatúva jahupity hasýpe ñamyesakã, ha oimépa ohecha va’ekue mba’épa yvágape oĩ?
Máva nga’úpa oikuaáta ne rembipota, nde voi nereme’ẽi rire, pe arandu ha rembou pe yvatégui nde espíritu marangatu?

Péicha rupi naikarẽvéi yvypóra rape ha upéicha ha’e oikuaa ne rembipota, ha arandu rehe ae osẽ
jejopy vaígui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI (89, 3-6. 12-14. 17)
Opavave: Ñandejára, nde hína upe ore mo’ãva.

Nde upe yvypóragui rejapóva oiko haguã ichugui yvy
ichupe kuéra erévo: “Tapeho jevy yvýpe pepa”.
Mil áño niko ndéve guarã ku ára ohasa va’ekuéicha,
opa jevýmava, térã ku pyhare mbykýicha, pya’e ohasáva. O.

Ku jake ramo guáicha sapy’aite reraha ichupe kuéra,
ku ñana heñói vaicha, ko’ẽ vove.
Pyhare heñói ha ipoty, ka’aru haviru ha ipiru. O.

Ehechauka oréve ore rekove mbykyha ikatu haguã ore akã guapy.
Ore Jára, eju ore rendápe! Araka’e peve piko reñeha’arõukáta?
Ore poriahuverekóna ore niko ne rembiguái hína. O.

Ára ko’ẽ rehe ore myenyhẽ ne mborayhúgui
ikatu haguã ore py’a rory roikove aja pukukue.
Ñandejára imba’e porãva ta ñande rovasa ha ta ñane pytyvõ
ñasẽ porã haguã opa mba’épe. O.

LECTURA MOKÕIHA:
Ko’ágã ñahendúta Tupã Ñandejára Ñe’ẽ San Pablo ohai va’ekue Filemonpe (9b-10. 12-17)

Che pehengue rohayhu etéva: Che, Pablo, che tujámava, ha ko’ágã aiméva hína kárselpe Cristo rehehápe, ajerure ndéve ejapomi techapyrã che ra’y Onésimo rehe, añeñandúgui itúva ramo ñande jeroviápe, ko kárselpe.

Amondo jevy ndéve, ha’e niko che ra’y ahayhúva. Che niko aipota va’erã mo’ã opyta ko’ápe che ndive, che pytyvõ haguã nde rangue, aime aja kárselpe, Cristo marandu rehehápe. Ha niko ndajaposéi mba’eve nde remonei mboyve, ikatu haguã che pytyvõ, nda ha’éi che pytyvõ va’erãgui, che pytyvõséguinte.

Ikatu niko oime Onésimo ojei nde hegui ra’e sapy’ami, rereko haguã ichupe upe rire opa ára guarã, ndaha’e véima tembiguáicha, iporãvéva tembiguáiguima katu, peteĩ ne pehẽngue rehayhúvaicha. Che ahayhu eterei ichupe. Ha nde, rehayhuve va’erã katu ichupe, ha ndaha’éi yvypóraicha añónte. Ne pehẽngue Ñandejára reheguáva ramo katu avei.
Aipo ramo, che rereko ramo ne pehẽngue ramo Cristo reroviaha reheguáva ramo, emoguahẽ ichupe, che moguahẽ ramo guáicha chéve voi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA (Sal 118, 135)
Ehechakuaa kena chéve Ñandejára, ha ehechauka chéve ne rembipota.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha (14, 25-33)
Opavave: Romomba’e guasu ndéve, Ñandejára.

Upérõ heta umi ohóva oikóvo Jesús ndive mamo ohoha rupi. Upéma ramo he’i chupekuéra: Peikosérõ che disípulo ramo, che rayhuve va’erã chéve pende rúgui, pende sýgui, pene rembirekógui, ha opa pene famíliakuéragui. Ndaikatúi peiko che disípulo ramo pene rakate’ỹ ramo pende rekovére. Na peiméi ramo pehupi haguã pende kurusu ha che moirũ, ndaikatúi peiko che disípulo ramo.

Ja’éntena pemopu’ãseha peteĩ tórre. Mba’e pejapo raẽ. Peguapy pehecha mbovýpa pende rupytýta peikuaa haguã perekópa hepyrã. Peicha’ỹrõ, peñepyrũ kuaa pemopu’ã ha ágã upéi tape ku’a rupi peso. Ha upéi ojepukapa pende rehe. Osẽne he’i hikuái, “Ajépako nde výro. Reñepyrũ ha ndaikatúi ejapopa”.

Ha mba’épa ojapóne peteĩ rréi 10 mil soldádonte oguerekóva ha osẽséva oñorãirõ 20 mil oguerekóva ndive ha oúva hína hi’ári. Ohecha raẽta ikatúnepa ipu’aka pe oguerekóva reheve. Ha ohecha kuaávo ndai’ipu’aka mo’ãiha hapicháre, mombyrymi guive omondóne hendápe hembijokuái oñomongeta anivéma haguã oiko vai.

Upévare ha’e peẽme, peikosérõ che disípulo ramo, pehejapa va’erã opa mba’e perekóva.

Ñandejára Jesucristo Ñe’ẽ.

Opavave: Romomba’e guasu ndéve, Ñandejára Jesucristo.