LECTURAS DOMINGO 2º TIEMPO DURANTE EL AÑO

LECTURAS DOMINGO 2º TIEMPO DURANTE EL AÑO

LECTURA PETEÎHA:
Ko’ágã ñahendúta Tupã Ñandejára ñe’ẽ Samuel aranduka peteĩhápe oĩ háicha 3, 3b-10. 19

Upérõ Samuel oke tupaópe oĩháme Ñandejára karameguã. Pe mba’e rendy Tupãme oñemyendýva, ñe’ĩra gueteri ogue. Upéma ramo Ñandejára ohenói ichupe: Samuel!

Ha’e he’i: Mba’épa pa’i!

Pya’e oho Elí rendápe ha he’i ichupe: Ajúma. Mba’épa reipota!

Elí he’i ichupe: Norohenóiri kuri. Tereho eñeno jevy.

Samuel oho oñeno.

Ñandejára katu ohenói jevy ichupe: Samuel!
Samuel opu’ã oho Elí rendápe ha he’i ichupe: Ajúma. Mba’épa reipota!
Elí he’i ichupe: Che norohenóiri che ra’y. Tereho eñeno. Samuel ndoikuaái gueteri
Ñandejárape, ku noñe’ẽiva gueteri ichupe.

Tupã katu ohenói jevy Samuélpe ha ha’e oho Elí rendápe ha he’i ichupe: Ajúma.
Mba’épa reipota!

Upéma ramo Elí ohechakuaa Ñandejára ohenoiha pe mitã rusúpe, ha he’i ichupe: Tereho eñeno, ha Ñandejára ne renói ramo, ere ichupe: “Eñe’ẽ katu, ne rembiguái ne rendu!”.

Samuel oho jevy oñeno. Upéi oguahẽ Ñandejára, opyta, ha ohenói jevy ichupe, ojapóma haguéicha. Samuel, Samuel!
Samuel he’i ichupe: Eñe’ẽ katu, ne rembiguái ne rendu!

Samuel okakuaa ha Ñandejára oipytyvõ ichupe. Ha’e ndohejái ojapo’ỹ rehe mba’eve umi ichupe he’i va’ekuégui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 40, 2. 4ab. 7-10

Opavave: Ko’ápe aime Ñandejára, ajapo haguã ne rembipota.

Ñandejára rehénte ajerovia.
Che rendápe oñemboja ha che rendu.
Che jurúgui omoheñói purahéi pyahu,
ha Ñandejárape amomba’e guasu. O.

Rejerure rangue mymba juka ha mba’e kuave’ẽ,
térã mymba hapy tembiapo vai jeheja reirã,
hendaguépe reju che resape’a.
Upéva rehe ha’e ndéve: “Nde pópe añemoĩ”. O.

Ne rembiapoukapýpe he’íma voi
umi mba’e che ajapo va’erã.
Tupã che Jára, nde reipotávante niko che aipota,
ne rembiapoukapy areko che ágã ruguápe. O.

Ñandejára, nde reikuaa akirirĩ rangue,
opavavépe aikuaauka hague nde reko joja.
Nde reikuaa porã, che Ru. O.

LECTURA MOKÕIHA:
Motivación: Ñande hína Cristo pehengue ha ñande rete katu Espíritu Santo róga, he’i San Pablo. Upévare ñamomba’e guasu va’erã Ñandejárape ñande retépe.

Ñahendúta Tupã Ñandejára Ñe’ẽ San Pablo ohai va’ekue Corinto guápe 6.13c-15a.17-20

Che pehenguekuéra: Ñande rete ndaha’éi teko vaípe guarã, Ñandejárape guarãnte. Ha Ñandejára ñande retépe guarã. Ha Ñandejára omoingove jevy haguéicha Ñandejára Jesucrístope, ñandéve avei ñane moingove jevýta ipokatu rupi.
Ndapeikuaái nga’u piko pende rete Cristo rete voreha?

Ha oime ramo ojoajúva Ñandejára rehe, ijespíritu ojehe’a hese ha oiko peteĩ ramo hendive. Peñemo mombyrýke, aipo ramo, teko vaígui. Pe yvypóra ambue angaipa ojapóva nombyaíri hete, ha umi ojeitýva teko vaípe katu, hete imba’e teéva voi ombyai.

Ndapeikuaái piko peẽ, pende rete Espíritu Santo rogaha hína, Ñandejára ome’ẽ va’ekue peẽme, ha Espíritu Santo oikoveha pende pype? Peẽ ndaha’éi pende rekove jára tee. Ñandejára niko hepy rehe pende jogua va’ekue. Upéva rehe,
pemomba’e va’erã Tupãme pende retépe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 1, 41. 17b
Aleluia.
Oime rojuhu pe Mesíaspe, he’iséva Cristo; mborayhu ha añete ou Jesucrísto rupi.
Aleluia.

EVANGELIO
Motivación: Jesús ohasávo Juan Bautista he’i idisípulokuérape mávapa pe ohasáva, ha oho voi hapykuéri hikuái. Upéi ha’ekuérama oho ohenói iñirũ ha oraha Jesús rendápe.

Marandu porã Ñandejára Jesucristo rekove ha hemimbo’e San Juan omombe’u háicha 1, 35-42
Opavave: Romomba’e guasu ndéve, Ñandejára.

Upe árape Juan oĩ hína Betániape mokõi idisípulo ndive. Ha ohechávo Jesúspe ohasáva ohóvo hína, he’i: “Amóva hína Ñandejára ovecha Ra’y”. Juan disípulokuéra ohendúvo upéva, osẽ oho Jesús rapykuéri.

Upéi katu Jesús ojere omaña, ha ohecha chupe kuéra oúva hína hapykuéri. Osẽ oporandu chupekuéra: — Mba’éiko peheka.

He’i chupe hikuái: — Mbo’ehára, moõiko reiko.

Jesús he’i chupe kuéra: — Peju pehecha.

Ka’arúma upérõ. Ha oho hikuái Jesús ndive ohecha haguã moõpa oiko. Ha opyta hendive hógape pytũ meve. Peteĩva umi ohendu va’ekue Juánpe ha oho va’ekue Jesús rapykuéri niko héra va’ekue Andrés. Simón Pedro ryke’y va’ekue ha’e. Ha Andrés pya’e porã osẽ Simón rekávo. Ha ojuhúvo chupe he’i: —Oime rojuhu pe Mesías.

Upéi, Andrés ogueraha Simónpe, Jesús rendápe. Ha Jesús ohechávo chupe, he’i:—Nde niko Simón, Juan ra’y. Ko’ágã guive nde rérata Cefas, he’iséva Pedro.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.