LECTURAS: DOMINGO 4º DURANTE EL AÑO

LECTURAS: DOMINGO 4º DURANTE EL AÑO

LECTURA PETEĨHA:

Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha  18, 15-20

Moisés he’i hetãguápe:

Ñandejára oiporavóta pende apytégui peteĩ proféta cheichagua ha ichupe pene ñe’ẽ rendu va’erã.

Peẽ pende aty ramo guare yvyty Horeb renondépe, pejerure va’ekue ani haguã Ñandejára oñe’ẽ jevy peẽme ha ani haguã pehecha jevy pe tata guasu, pekyhyjégui pemano ramo guarã.

Upéma ramo Ñandejára he’i va’ekue chéve: Nda reíri okyhyje hikuái.

Aiporavóta ijapytéguikuéra peteĩ proféta ndeichagua. Ha’éta ichupe upe he’i va’erã ha he’íta Israel ñemoñarépe opa mba’e che aipotáva ojejapo. Opa umi ndoikuaaséivape mba’eve ha’e he’ívagui, aporandúta hembiapokue rehe. Ha oĩ ramo peteĩ proféta he’íva che rérape upe che nda’éiva, térã oñe’ẽva Tupã gua’u kuéra rérape, omanóta.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI   95, 1-2. 6-9

Opavave: Pehendu nga’u ra’e Ñandejára Ñe’ẽ

Peju japurahéi Ñandejárape vy’a pópe.

Japurahéi upe jejopy vaígui ñane renohẽvape.

Ñaguahẽ hendápe ha ichupe ñamomba’e, ichupe japurahéi. O.

Peju ñañesũ ha ñamomba’e guasu ichupe.

Ñañesũ ñande apohare, Ñandejára renondépe.

Ha’e hína Ñandejára, ñande katu hetãgua ha ovecha iñu megua. O.

Pehendu nga’u ra’e he’i ramo:

“Ani pende py’a hatã Meribápe guaréicha,

Masápe pejapo haguéicha, yvy ojeiko’ẽháme.

Upe ramo pende rukuéra ypykue opu’ã va’ekue che rehe

ohecha ramo jepe umi mba’e ajapo va’ekue. O.

LECTURA MOKÕIHA:                  

Ñahendúta Tupã Ñandejára Ñe’ẽ San Pablo ohai va’ekue Corinto guápe   7, 32-35

Hi’ãnte chéve poipe’a jepy’apýgui. Omenda’ỹva ojepy’apy umi Ñandejára reheguáva rehe, ha oheka ombohory haguã ichupe. Pe omendáva katu ojepy’apy ko yvy reheguáva rehe, ha ombohoryse hembirekópe ha upéicha mokõi hendápe ojepy’apy.

Upéicha ave, kuña na iména véimava ha kuñataĩ omenda’ỹva ojepy’apy Ñandejára reheguáva rehe, imarangatúgui hetépe ha ijespíritupe. Ha umi kuña omendáva katu, ojepy’apy ko yvy reheguáva rehe ha ombohoryse iménape.

Nda’éiko peẽme ko’ã mba’e, ani haguã pejapo, iporã haguã peẽmente, ha peiko porã haguã hekópe, pemba’apóvo Ñandejárape peiko rei’ỹ rehe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA   Mt 4, 16

Aleluia.

Umi yvypóra nde pypegua, oiko va’ekue pytũmbýpe, ohecha tesape tuicháva.

Tesapeha ohesapéva umi omanóma va’ekuéicha oikóvape.

Aleluia.

EVANGELIO

Marandu porã Ñandejára Jesucrísto  rekove ha hemimbo’e San Marcos omombe’u háicha          1, 21-28

Opavave: Romomba’e guasu ndéve, Ñandejára.                                                   

Upérõ oguahẽ hikuái Cafarnaúmpe. Sábado árape Jesús oike tupaópe, ha oñepyrũ oporombo’e. Opavave ohecháramo joaite mba’éichapa ha’e ombo’e chupekuéra. Jesús niko nombo’éi umi Moisés léi ombo’e háicha.

Ha’e oporombo’e ku noikotevẽíramo guáicha avavére oporombo’e haguã. Ha upe judíokuéra tupaópe, oĩ peteĩ kuimba’e demóño poguýpe, ha upéva osapukái: Mba’ére piko reñemoĩ ore rehe, Jesús Nazaretgua. Reju piko ore rundívo. Che roikuaa. Ndehína pe imarangatúva, Tupã omboúva.

Jesús oja’o pe espíritu añáme ha he’i chupe: Ekirirĩ ha esẽ pe kuimba’égui!

Pe aña oityvyro mbarete pe kuimba’épe, ha osapukái hatãvo osẽ chugui. Opavave oñemondýi ha he’i joa ojupe: Mba’eichagua ñe’ẽ piko ãva. Oikuaa porãhápe ha mbaretépe ko kuimba’e he’i umi añáme osẽ haguã, ha ha’ekuéra ojapo ha’e he’íva!

Pya’e voi herakuã Jesús opa rupi Galiléa jerekuévo.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.