LECTURAS DOMINGO 5º TIEMPO DURANTE EL AÑO

LECTURAS DOMINGO 5º TIEMPO DURANTE EL AÑO

LECTURA PETEÎHA:
Ko’ágã ñahendúta Tupã Ñandejára ñe’ẽ Isaías arandukápe oĩ háicha 58, 7-10

Pemboja’o pene rembi’u iñembyahýivape, hoga’ỹvape pende rógape pemoguahẽ, ijopívova pemonde ha ani peñemboyke pene pehẽnguégui.
Upéicha ramo che pohesapéta ko’ẽjúicha ha pya’eterei pekueráta pene mba’asýgui, pende reko joja ohóta pene renonderã ha Ñandejára reko mimbipa pende rapykuéri.
Upéramo pesapukáita ha Ñandejára pene rendúta, pejeruréta pytyvõ ha he’íta: “Ápe aime”.

Peipe’a ramo mba’e pohýi oporojopýva, ndapeporoguerekói ramo tesápe ha na pende juru pochýi ramo, pemboja’o ramo pene rembi’u iñembyahýivape ha pejuhu ramo oikotevẽvape, pene mba’e resapeha hendýta pytũmbýpe, ha nde pype iñypytũva asaje pytéicha hesakãta.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 112, 4-9
Opavave: Heko potĩva rape pytũmbýpe jepe hesakã.

Pytũmbýpe jepe oĩ ohesapéva heko potĩvape,
ha upéva ipy’a porã, oporoporiahuvereko ha hekojoja.
Ovy’a upe ipy’a ite guive oiporukáva hapichápe,
ha opa oguerekóva ogueroguata hekópe. O.

Heko jojáva ndojecha vai chéne,
opa ára oikóne hese mandu’a.
Ha’e ndokyhyjéi oñehenduka ramo guarã ichupe ivaíva,
ha’e ojerovia mbarete Ñandejára rehe. O.

Ndaipy’a mokõiri ha mba’evégui ndokyhyjéi,
ha oikuaa porã umi hese ija’e’ỹva oñehunditaha.
Imba’évagui ome’ẽ imboriahúvape, ha ipojera opa ára.
Tuicha ha herakuã porãne. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩhápe Corinto guápe 2, 1-5

Che pehenguekuéra: ku aha ramo guare añe’ẽ pene ndive Ñandejára rembipota rehe, nda hechaukái va’ekue che arandu ha che ñe’ẽ kuaaha. Ha aimévo pende apytépe ndaikuaaséi va’ekue mba’eve ndaha’éi ramo Jesucristo rehegua. Ha ja’e porãse ramo guarã, Jesucristo ojehupi va’ekue kurusu rehe reheguánte aikuaase.

Añemoĩ va’ekue pene renondépe che kangy ha aryrýi kyhyjégui, ha añe’ẽvo ha amombe’úvo peẽme upe marandu, ndaiporúi ñe’ẽ arandu ajereroviauka haguã.

Nahániri. Peẽ che guerovia ahechaukávo peẽme Espíritu Santo ha Ñandejára pokatu, pende jerovia oĩ haguã Ñandejára pokatu rehe, ha ani yvypóra arandúre.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 8, 12
Aleluia.
Jesús oñe’ẽ jevy opavavépe ha he’i ichupekuéra:
Che hína yvypóra resapehára. Pe che moirũva oguerekóta
pe tesape oporo moingovéva, ha ndoiko mo’ãvéima pytũmbýpe.
Aleluia.

EVANGELIO
Marandu porã Ñandejára Jesucristo rekove ha hemimbo’e San Mateo omombe’u háicha 5, 13-16
Opavave: Romomba’e guasu ndéve, Ñandejára.

Upérõ Jesús he’i idisípulo kuérape: – Peẽ niko ku jukýicha hína ko yvy apére. Pe juky nahe’ẽvéi ramo niko ndikatuvéima ñamohe’ẽ jey. Mba’everãma na’iporãi. Ñamombo okápe ha oñepyrũmba hese.

Peẽ niko ku mba’e rendýicha hína ko yvy apére. Peteĩ táva oĩva sérro ru’ãme niko ndaikatúi jajaho’i. Avave niko nomyendýi lampĩu ha upéi omoĩ kambuchípe térã tupa guýpe. Yvate katu omoĩ, ohesape hag̃ua opa pe óga ryepy. Péichake avei peẽ. Peñeha’ã pehesape opavave renondépe, ha tojehecha pene rembiapo porãngue, ha tomomba’e guasu pende Ru, yvágape oĩvape.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.