LECTURAS DOMINGO VIGÉSIMA CUARTA SEMANA

LECTURAS DOMINGO VIGÉSIMA CUARTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 32, 7-11.13-14

Upe ramo, Ñandejára he’i Moiséspe: Nde, pya’e eguejy ne retãgua renohẽ va’ekue Egíptogui ojapo ivaíva. Pya’eterei ojei hikuái che rapégui. Ojapo tóro ra’y órogui, oñesũ henondépe, ogueru ichupe imba’e kuave’ẽ ha he’i joa: “Israel, kóva hína Tupã ne renohẽ va’ekue Egíptogui”.

Ñandejára he’i avei Moiséspe: Ahecha ha’ekuéra oikoseha iñakã rehénte voi. Eheja tahendy che pochy ha tambokusugue ichupekuéra, nde hegui katu ajapóta peteĩ tetã guasu. Moisés katu oha’ã ombopochy jera Tupã Ijárape ha he’i: ¿Mba’e rehe piko che Jára rehejáta hendy nde pochy ne retã guáre, renohẽ va’ekue Egíptogui tuicha pokatu reheve ha pyapy mbaretépe?

Ne mandu’ána ne rembiguái Abraham, Isaac ha Jacob rehe, ichupekuéra niko reme’ẽ va’ekue ne ñe’ẽ erévo: “Ambohetáta pene ñemoñare mbyjaita yvágape guáicha. Ko yvy ha’e va’ekue ame’ẽtaha peẽme, ame’ẽta pene ñemoñarépe imba’e tee ramo opa ára guarã”.
Ohendu rire Moisés pe Ñandejára ombyasy ha oheja rei hetãgua rembiapo vaikue.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 50, 3-4. 12-13. 17. 19
Opavave: Ñandejára, embopyahu che rekove ha ta imarã’ỹ.

Ñandejára, che poriahuvereko, nde niko ne mba’e porã.
Che poriahuvereko ha eipe’a che árigui che rembiapo vaikue.
Che johéi porã teko vaígui, che mopotĩ che angaipágui. O.

Ñandejára, embopyahu che rekove ha ta imarã’ỹ,
che py’a toñembopyahu ha ta imbarete.
Anítei che mosẽ ne renondégui,
térã reipe’a che hegui nde pytu marangatu. O.

Ñandejára, che juru eipe’a ha ndéve roguero purahéine.
Taikuave’ẽna ndéve py’a rasy oñemomichĩva,
upéva katu rehecha ramo Ñandejára. O.

LECTURA MOKÕIHA:
Ko’ágã ñahendúta Tupã Ñandejára Ñe’ẽ San Pablo ohai va’ekue Timotéope 1, 12-17

Che ra’y rohayhu etéva: Ame’ẽ che aguyje pe che mombarete va’ekuépe, Ñandejára Jesucristo pe, che rerekóva ijeroviaha ramo ha che moĩ va’ekue amba’apo haguã ichupe guarã. Ha’e rire ramo jepe hese heta mba’e vai yma, amuñámi ha ajahéimi hese, Ñandejára che poriahuvereko, nda ha’éigui gueteri va’ekue che heroviaha ha ndaikuaái ajapóva. Ñandejára heta ohykuavo che rehe imborayhu, che momba’e ha ome’ẽ chéve pe mborayhu ikatúva jaguereko Jesucristo rupi.

Ko ha’étava añetegua ha opavave oguerovia va’erã katuete: Jesucristo ou hague ko yvy ári osalva haguã angaipa apohápe, ha umíva apytépe, che aime tenondete. Ñandejára katu che poriahuvereko, Jesucristo ohechauka haguã che pype, opa mba’e ogueropu’aka kuaaha. Ha upéicha, che ajehecha umi oguerovia va’erã ichupe rechaukaha ramo, ohupity haguã jeikove opave’ỹva.

Upéva rehe terakuã porã ha teko mimbipa opa ára guarã Ñandejárape, mburuvicha guasu omano’ỹva, ojehecha’ỹva ha peteïnteva! Amén.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA 2Cor 5, 19
Cristo rupi Ñandejára ñane moingo porã jevy hendive, oheja reívo yvypóra angaipa, ha ome’ẽvo oréve iñe’ẽ ojeiko porã jevy haguã hendive.

EVANGELIO
Marandu porã Ñandejára Jesucristo rekove ha hemimbo’e San Lucas omombe’u háicha 15, 1-32
Opavave: Romomba’e guasu ndéve, Ñandejára.

Upérõ, Jesús ombo’e jave hína, oñemboja hendápe umi impuésto okovráva Róma peguarã, ha ijapytépekuéra gente reko vai atýra.
Umi Moisés léi ombo’éva ha fariséo katu osẽ oñe’ẽ Jesús rehe. He’i hikuái: — Kóva niko oiko gente reko vai ndive, ha okaru ave hendivekuéra.

Upépe Jesús omombe’u chupe kuéra ko káso: [Ja’éntena perekoha 100 ovecha, ha okañy mba’e pende hegui peteĩ. Mba’épa
pejapóne. Ndapeheja mo’ãinga’u piko umi 99, ha pesẽ peheka pe okañy va’ekue.

Ágã pejuhúvo, pehupíne pende apére, ha vy’apópe pejevy pende rógape. Pehenóine pene irũme ha umi pende róga jere rupi oikóvape, “Pejúpy javy’a. Ajuhúma niko pe che ovecha okañy vaekue.”

Che ha’e peẽme, péicha avei ojehuha yvágape. Tuichave vy’a oiko upépe hína peteĩ heko vaíva oñembojáva Ñandejára rehe, umi 99 heko marangatúvagui rehe, oimémava voi Ñandejára ndive.

“Yrõ katu, peteĩ kuña oguerekóva 10 viru ha okañy ichugui peteĩ, nomoendýipa peteĩ tataindy ha oitypei porãite asy hóga ojuhu peve. Ha ojuhúvo, ombyaty iñirũnguéra ha opa hóga yke rehe guápe, ha he’i ichupekuéra: ‘Pevy’a che ndive, ajuhúma pe viru okañy va’ekue che hegui.’ Ha’e peẽme, peichaha avei oĩ vy’a Ñandejára ángel kuéra apytépe peteĩ angaipa apoha ohejáva hembiapo vaíre”.

Jesús omombe’u avei kóva ko káso:] Oiko vaekue ndaje raka’e peteĩ karai ita’ýra mokõiva. Pe imitãvéva he’i itúvape: “Eme’ẽmana chéve pe chéve otokáva.” Ha osẽ túva omboja’o ta’ýrakuérape opa oguerekóva. Nda’aréiete rire, pe imitãvéva ovendepa pe túva ome’ẽ va’ekue chupe.

Mombyry voi oho, tetã ambuépe. Upépe oiko iñakãre, omombopa rei ipláta ojejoko’ỹre. Ohundipa oguerekóva ha oso. Upéi katu ou peteĩ ñembyahýi guasu pe tetãme, ha oñepyrũ iñembyahýi. Osẽ oheka hembiaporã, ha peteĩ karai omomba’apo chupe. Omondo chupe oñangareko haguã hymba kurére. Ha iñembyahýigui, hi’ãnteva chupe ho’u pe kure rembi’u. Avavénte nome’ẽi chupe.

Ipahápe ohechakuaa sapy’a ivýro hague. He’i ipy’apýpe: Mboy piko oime ógape omba’apóva ha hembypáva chupekuéra ho’u arã. Che katu ápe amano ñembyahýigui hína. Aha jeýta che ru rógape, ha ha’éta chupe: “Che ru, ivaíva niko ajapo Ñandejára renondépe, ha ne ndive ave. Apytáta amba’apo ndéve, anivénte che rereko nde ra’y ramo.”

Ha opu’ã ha oho itúva rógape. Mombyry guive, itúva ohecha sapy’a chupe, ha oñopũ chupe ikorasõ. Odipara osẽ ohuvãitĩvo, oañuã ha ohetũmba chupe. Ta’ýra he’i chupe: “Che ru, che rembiapo vai niko Ñandejára renondépe, ha ne ndive ave.Che niko ndaha’e véima nde ra’y”.

Túva katu he’i hembiguái kuérape: “Pya’e peru ao iporãvéva ha pemonde ko che ra’y. Peme’ẽ chupe kuãirũ ikuã rehe guarã ha sapatu ipy rehe guarã. Upéi katu pejuka ku vakara’y ikyravéva, ha javy’apa oñondive. Ko che ra’y, omanóma va’ekue niko ko’ágã oikove jey. Okañy va’ekue ha ko’ágã jajuhu jey.” ha oñepyrũ ovy’a hikuái.

Upe aja katu, pe ta’ýra tuichavéva omba’apo hína ra’e ñúme. Ha oguãhẽvo oúvo hógape, ohendu sapy’a musikapu rory ha jeroky oikóva hína. Ohenói peteĩ hembiguáipe ha oporandu chupe: “Mba’éiko oiko hína”. He’i chupe pe tembiguái: “Nde ryvy niko péina ou jeýma, ha hesãimba porã. Nde ru oime ojukayka kuri ku vakara’y ikyravéva.”

Upéva ohendúvo, pe tyke’ýra ipochy ha noguãhẽi hógape. Ha osẽ itúva he’i chupe oike haguã. Ha’e katu he’i itúvape: “Nde niko reikuaa porã mboy áñoma amba’apo hague ndéve ápe. Opa mba’e eréva chéve niko ajapo, ha reipotáva ave. Péicha avei, araka’eve nereme’ẽiva chéve peteĩ kavara ra’ymínte jepe che irũnguéra ndive rombichy haguã. Ha péina oguãhẽ sapy’a amo nde ra’y omombopa rei vaekue
ipláta kuña rapykuéri, ha rejuka ku vakara’y ikyravéva.

Itúva katu he’i chupe: “Che ra’y, nde niko tapiate reiméva che ndive. Ha opa mba’e arekóva niko ne mba’énte voi. Mba’éicha piko aipo ndajavy’a mo’ãi. Nde ryvy niko omano va’ekue ha ko’ágã oikove jey, okañy vaekue ha ko’ágã jajuhu jey.

Ñandejára Jesucristo Ñe’ẽ.

Opavave: Romomba’e guasu ndéve, Ñandejára Hesukrísto.