LECTURAS DOMINGO VIGÉSIMO NOVENO DURANTE EL AÑO

LECTURAS DOMINGO VIGÉSIMO NOVENO DURANTE EL AÑO

LECTURA PETEÎHA IS 45, 1. 4-6

Ko’ágã ñahendúta Tupã Ñandejára ñe’ẽ Isaías arandukápe oĩ háicha

Péicha he’i Ñandejára hembiporavo Círope. Ipo akatúagui ichupe ogueraha. Omoĩta ipo guýpe tetãnguéra, mburuvicha guasukuéra ku’a jokuaha ojoráta, táva rokẽnguéra oipe’áta ichupe, ikatu’ỹ haguãicha avave omboty. Che rembiguái Jacob ha che rembiporavo Israel rehehápe, rohenói nde réra tee rupi ha romoingo va’ekue mburuvicha ramo, nde ndachekuaái ramo jepe.

Che hína opa mba’e Jára, ndaipóri ambue. Che ñoite hína Tupã, ndaipóri ambue. Che rombo’e va’ekue reñorairõ kuaa haguã, nde ndachekuaái ramo jepe. Ojekuaa haguã opa rupi, kuarahy resẽ guive kuarahy reike peve, che ñoiteha, ndaiporiha ambue. Che opa mba’e Jára, ndaipóri ambue.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 95, 1. 3-5. 7-10ac

O.: Pemomba’e guasu Ñandejárape ha’e ipokatu ha omimbipa.

Pepurahéi Ñandejárape purahéi pyahu. Topurahéi Ñandejárape opa ko yvy. Pemombe’u opa tetã rupi ha maymávape, ha’e tuichaha, ha umi mba’e hechapyrãva ojapóva. O.

Ñandejára tuicha hína, ichupe ñamomba’e guasu va’erã, ichugui jakyhyjeve va’erã opa tupãgui. Umi mba’e tetã oguerekóva tupã ramo, umíva ta’ãnga reínte. Ñandejára katu yvága apohare hína. O. Pemomba’e guasu Ñandejárape opa tetãnguéra, pemomba’e guasu Ñandejárape ha’e ipokatu ha omimbipágui, pemomba’e guasu Ñandejárape héra tuichagui, itupao róga guýpe pemoguahẽ pene mba’e kuave’ẽ. O.

Pemomba’e guasu Ñandejárape ojehechaukáva heko marangatúpe. Opa yvypóra henondépe toryrýi. Toje’e opa tetã rupi: “Ñandejára ñande ruvicha guasu hína”. Ha’e oisãmbyhy teko jojápe tetã nguéra. O.

LECTURA MOKÕIHA 1 TES 1, 1-5b

Ñahendúta Tupã Ñandejára Ñe’ẽ San Pablo ohai va’ekue Tesalónica guápe.

Pablo, Silvano ha Timoteo romomaitei Jesucristo iglésia Tesalónica guápe, ojoajúva Tupã ñande Ru ha Ñandejára Jesucristo rehe. Tupã Ñandejára tohykuavo ipytyvõ ha ipy’a guapy pende ári. Opa araite rome’ẽva ore aguyje Ñandejárape pende rehe, ha ore mandu’a pende rehe ore ñembo’épe. Manterei ore mandu’a Ñandejára ñande Ru renondépe, mba’éichapa heta mba’e pejapo pende jerovia rupi, mba’éichapa pene mborayhu tuichagui hetápe peipytyvõ, ha mba’eichaite pevépa peha’arõ kuaa Ñandejára Jesucrístope.

Ore pehẽnguekuéra, ore niko roikuaa Ñandejára pende rayhuha ha pende poravo hague. Roikuaauka ypy ramo peẽme marandu porã niko, ndaha’éi va’ekue ñe’ẽme añónte, heta mba’e hechapyrãme katu, ohechaukáva Tupã ha Espíritu Santo pokatu, ha roikuaa porãgui añeteha.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Flp 2, 15-16

Aleluia. Ijapytépekuéra pemimbi peẽ mbyjáicha pyharépe. Peñemohatã kena pe marandu oporomoingovéva rehe. Upéicha, oúvo Cristo che py’a rory va’erã pende rehe, aikuaa pype nañani reíri ha namba’apo reíri hague. Aleluia.

EVANGELIO MT 22, 15-21

+ Marandu porã Ñandejára Jesucristo rekove ha hemimbo’e San Mateo omombe’u háicha.

Opavave: Romomba’e guasu ndéve, Ñandejára.

Peteĩ ára umi fariséokuéra oñembyaty ombopakova pire hag̃ua Jesúspe. He’ikase chupe hikuái mba’e he’i’ỹ va’erãva, omoĩ vai hag̃ ua chupe. Omondo hikuái idisípu-lokuéra, ha umívandi umi Herodes rapykuéri oiko hatãva.

He’i chupe hikuái: — Mbo’ehára, roikuaa niko nandejapuiha. Hekoitépe niko eporombo’e Tupã rape. Roikuaa avei nerepenaiha umi mba’e nderehe oje’évare. Ha upéi ave, neremañái avavére rehecha hag̃ ua mba’eichaguápa ha’e.

Ore roikuaase mba’épa nde ere. Oĩ porã piko japaga impuésto Césarpe, térãpa nahániri. Jesús katu ohecha kuaa omoñuhãseha chupe hikuái.

Osẽ he’i: — Peẽ tekove ahẽ, rova mokõi. Mba’éreiko pe che moñuhãse. Pehechauka chéve pe níkel peme’ẽva jepi. Ha ombohasa chupe hikuái peteĩ.

Jesús omaña hese, ha oporandu chupekuéra: — Máva ra’ãnga ha máva réra piko ko oĩva hese. Ha’ekuéra he’i chupe: — César.

Jesús he’i chupekuéra: — Néi, peme’ẽ Césarpe upe imba’éva, ha Tupãme upe imba’éva. Ohendúvo upéva okirirĩmbaite. Oheja chupe, ha osẽ ohopa hikuái.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.