LECTURAS DEL MARTES 12 DE NOVIEMBRE

LECTURAS DEL MARTES 12 DE NOVIEMBRE

Primera lectura:

Ko’ágä ñahendúta Tupã Ñandejára ñe’ẽSabiduría arandukápe oĩ háicha 2, 23-3, 9

Tupã Ñandejára ojapo yvypórape omano’ỹ haguã, ha ojapo ichupe ijoguahárõ.
Ha aña, ha’enteségui, omoinge mano ko yvy ape ári, ha umi hendive oĩva ohasa mante va’erã upe rupi.

Imarangatúva rekove oĩ Tupã Ñandejára pópe, ha teko asy ndohupity ichupe kuéra.
Tapicha tavýpe guarã ha’e kuéra omanóma, oimo’ã mba’e vaiha imarangatúva mano, ha ijeho ñande apytégui ñehundiha. Imarangatúva katu oiko py’a guapýpe.

Yvypórape guarã ha’e kuéra oho oñenupãvo, imarangatúva katu oha’arõ nomanóivo araka’eve.
Oñenupãmi ramo jepe tuicha mba’e iporãva ohupity.

Tupã Ñandejára oipy’a ra’ãvo ichupe ojuhu nomotĩri hague ichupe.
Óroicha omoĩ ichupe tatápe, ha ojuhu porã mymbahapy ojuhu porã háicha.
Upévare omimbipáne Tupã Ñandejára renondépe, ha ojehecháne tata pirirícha kapi’itýre.
Ombo jovakéne tetã nguérape ha heta yvypóra oguerekóne ipo guýpe, ha Tupä Ñandejára ha’éne huvicha guasu opa ára.

Hese ojeroviáva oikuaáne añetegua, ha oñemboyke’ỹva ichugui oĩne ijykére mborayhúpe.
Jeporiahuvereko ha jopói iporavopývape guarã.

Tupã Ñandejára Ñe’ẽ.

SALMO ÑEMBOHOVÁI 33, 2-3. 16-19

R. Amomba’e guasúta opa ára Tupä Ñandejárape.

Amomba’e guasúta opa ára Tupä Ñandejárape,
ichupe aropurahéita tapiaite.
Tupä Ñandejára ombovy’a che rekove.
Imboriahúva to hendu ha tovy’a! R.

Tupä Ñandejára oñangareko umi ijohéi
pyrévare, ha ohendu umíva ñembo’e.
Heko vaívagui katu ndoikuaaséi
mba’eve, umíva opava’erã tesaráipe. R.

Tupä Ñandejára ohendu umi ijohéi pyréva ñembo’e
ha oguenohẽ ichupe kuéra upe ojejopy vaihágui.
Tupä Ñandejára oñemboja umi ohasa asývare
ha oguenohẽ umi ikangypávape jejopy vaígui. R.

ALELUIA Jn 14, 23

Aleluia.
Ñandejára Jesucristo he’i:
“Pe che rayhúva nomboyke mo’äi che ñe’ë,
ha che Túva ohayhúta ichupe ha rohóta hendápe”.
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?

17, 7-10

Upe ramo Jesús he’i hemimbo’ekuérape:

“Pe oguerekóva hembiguái oguahẽva oyvyjokahágui ha oñangarekohágui hymba kuérare, he’i nga’úpa ichupe: ‘Ehasa ha eguapy ekaru?’ Nahániri, he’i katu ichupe: Ejapo chéve che karurã, ha eñemoĩ eñangareko che rehe che akaru ha amboy’u aja. Upéi nde ikatúne rekaru ha remboy’u.’

Ha upéi ave, ndojeaguyje me’ẽi upe tembiguáipe ojapo haguére umi he’i va’ekue ichupe. Péicha avei peẽ, ágä pejapopávo umi Tupã Ñandejára he’i va’ekue peẽme, peje va’erã: ‘Ore tembiguái ipituáva, rojapónte rojapo va’erã.’”

Ñandejára Jesucristo Ñe’ẽ.