LECTURAS MARTES DÉCIMO TERCERO

LECTURAS MARTES DÉCIMO TERCERO

LECTURA PETEÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha   19, 15-29

Tupã Ñandejára ohundi mboyve Sodoma ha Gomorra, umi Tupã Ñandejára remimbou omyagẽ Lótpe ha he’i ichupe: Pya’éke epu’ã, eraha ne rembireko ha nde rajy mokõive ha pesẽ ko távagui ani oñehundi jepe pesẽ mboyve!

Lot imbegue, ha umi mokõi kuimba’e ipógui ogueraha ichupe, hembireko ha itajýra mokõivépe, távagui okápe, Tupã Ñandejára oiporiahuverekógui ichupe.

Upérõ peteĩ ha’ekuérava he’i: Pya’éke esẽ neremanoséi ramo. Ani rema’ẽ nde rapykuévo, térã repyta mamove ko ñúme. Tereho pya’éke yvyty gotyo, ani haguã remano.

Lot katu he’i ichupe: Anína upéicha karai! Heta itéma niko che pytyvõ asẽ haguã ivaívagui. Upe yvyty katu opyta mombyrýma chéve guarã; che rupity jepéta niko pe táva ñehundi ha amanóta aguahẽ mboyve. Apete niko oĩ peteĩ táva michĩmi ikatuhápe akañy. Upépentena tapyta.

Ha Tupä Ñandejára remimbou he’i ichupe: Iporã. Ejapo katu upéicha. Nde rehehápe nahundi mo’ãi upe táva michĩmi eréva. Eiko pya’éke! Cháke ndaikatúi ajapo mba’eve reguahẽ mboyve upépe.

Upévare upe táva oñembohéra Sóar.

Kuarahy iñapysẽma Lot oguahẽvo Zoárpe. Upéicha háguinte Tupä Ñandejára omongy sapy’a yvágagui asúfre rendy Sodoma ha Gomorra ári, ha ombokusugue ko’ã táva guasu ha ñu ijerére oĩva, opaichagua tekove ha ka’avo pypegua reheve.

Lot rembireko katu oma’ẽ hapykuévo ha oiko ichugui  ta’ãnga jukyguigua. Abraham opu’ã ko’ẽ mboyve ha oho pya’e upe oñemongeta haguépe Tupä Ñandejára ndive. Upépe oñemoĩ oma’ẽ Sodoma, Gomorra ha opa ijerekuévo, ha ohecha pe tatatĩ otimbóva tatakua guasúicha.

Tupã Ñandejára ombokusuguévo umi táva guasu umíva Lot oiko hague, imandu’a Abraham rehe, ha oguenohẽ upégui ityvýra amyrỹi ra’yre Lótpe ani haguã oñehundi.

Tupã Ñandejára Ñe’ẽ.

SALMO ÑEMBOHOVÁI  25, 2-3. 9-12

Opavave: Tupã Ñandejára, ne mborayhu añandu tapia ite

Eipyguara opa che rekove,

che apytu’û ha che py’a ite guive añandúva.

Nderejuhúi chéne mba’eve ivaíva.

Ne mborayhu oĩ che jerére opa árape, nde rehénte ajerovia. O.

Ani che rerekótei iñangaipáva, térã oporojukáva ramo.

Ha’e kuéra tembiapo vai ombojo’a,

ha hapichápe ombopo pegua

mba’e hendape’ỹ ojapo haguã. O.

Che rekove katu ipotĩ.

Che poriahuvereko ha che pe’a jejopy vaígui.

Tape porãme hatã añembo’y,

Ñandejárape amomba’éta umi hese ojeroviáva apytépe. O.

ALELUIA Sal 129, 5

Aleluia.

Aha’arõ Tupã Ñandejárape ha arovia Iñe’ẽ.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha   8, 23-27

Upe ramo Jesús ojupi peteĩ kanóape ha hemimbo’e kuéra oho hendive. Ha péicha háguinte, oipeju pe yguasúpe peteĩ yvytu ne ratãva, ha pe y pochy oikepa pe kanóape. Jesús katu oke hína. Upépe hemimbo’ekuéra omombáy Jesúspe ha he’i ichupe: Ore Jára, ore pytyvõ mína. Ja’yguy niko ñaína.

Jesús katu he’i ichupekuéra: Mba’ére piko péichaite peve pekyhyje? Pejerovia’ieterei niko Tupãre.

Upépe Jesús opu’ã ha oñembo’y. Oja’o pochy pe yvytu ha pe ýpe, ha opi pe yvytu ha oguapy pe y. Hemimbo’e kuéra katu oñemondyipa ha oporandu ojupe: Mávatepa kóva, ko yvytu ha yguasu jepe iñe’ë  rendúva ichupe?

Ñandejára Jesucristo Ñe’ẽ