LECTURAS MARTES DUODÉCIMA SEMANA

LECTURAS MARTES DUODÉCIMA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ mokõiha Reyes arandukápe oĩ háicha 19, 9b-11. 14-21. 31-35a. 36

Sanaquerib omondo hembijokuái Ezequías rendápe, ha he’iuka ichupe: “Ne Tupã, nde rejeroviaha, he’i ndéve Jerusalén ndo’a mo’ãiha che pópe; aníke rerovia cháke ne mbotavy hína. Rehendúmane ra’e mba’épa ojapo Asiria ruvicha guasu kuéra opa umi tetã ohundise va’ekuére. Ha piko nde rehe nda che pu’aka mo’ãi?

Ezequías oipyhy upe kuatiañe’ẽ umi tembijokuái oguerúva, ha ohecha mba’épa he’i. Upéi oho tupaópe, oipyso upe kuatiañe’ẽ Tupã Ñandejára renondépe, ha oñembo’e kóicha: “Tupã Israel Jára, keruvim ári reguapýva, ndénte hína opa tetã yvy arigua Tupã.

Nde rejapo va’ekue yvága ha yvy. Ejapysaka ore Jára. Ema’ẽ ha ehendu mba’épa he’iuka chéve Senaquerib. Opa umi mba’e he’ívape niko nde rehénte ojahéi, Tupã Ñandejára reikovéva. Añetéko hína, ore Jára, umi Asiria ruvicha guasu ohundi hague opa umi tetã, ha ijyvy, Ha’e kuéra omombo tatápe itupã nguéra, ndaha’éiva voi tupã, yvypóra rembiapokue uvei, ojapo va’ekue yvyra ha ita Pehẽngue guinte. Upévare oñehundi. Ha Ko’ágã, Tupã ore Jára, ore pe’a ipógui nde pu’aka rupi, toikuaa tetã nguéra yvy arigua, ne ñoiteha, ore Jára, pe Tupã añetegua.”

Upérõ, Isaías Amós ra’y, he’iuka Ezequíaspe: “Kóicha he’i Tupã Israel Jára: ‘Reñembo’e niko chéve Asiria ruvicha guasu Senaquerib rehe.’”
Ko’ãva hína umi mba’e Tupä Ñandejára he’i va’ekue Asiria ruvicha guasúre: “Nde apo’i ha oñembohory nde rehe kuñataĩ Sión. Nde atukupépe, Jerusalén oñakã mbovava nde rehe. Peteĩ hembyremi opytátagui Jerusalénpe ha yvyty Siónpe. Tupã Ñandejára ipu’akapáva upéva ojapóta, ohayhu rendýgui ichupe kuéra.”

Upévare kóicha he’i Tupä Ñandejára Asiria ruvicha guasúre: “Ndoike mo’ãi Jerusalénpe. Peteĩ hu’ýnte jepe ndopoi mo’ãi hese. Nondyry mo’ãi hese tete mo’ãha reheve, ha nomopu’ã mo’ãi ijerére jupiha. Oho jevýta upe tape ou hague rupi, oike’ỹre ko távape. Che, opa mba’e Jára, ame’ẽ che ñe’ẽ. Che amo’ãta ko távape ivaívagui, che rembiguái David ha che rehehápe voi.”

Upe pyharépe voi Tupã Ñandejára remimbou oho asírio kuéra rekohápe ha upépe ojuka 185.000 kuimba’épe; upe ára ambuépe iko’ẽ joa he’õngue. Upe marõ, Asiria ruvicha guasu Senaquerib, omopu’ã hekoha ha ojevy Nínivepe.

Tupã Ñandejára Ñe’ẽ.

SALMO ÑEMBOHOVÁI 47, 2-4. 10-11

Opavave: Ajépa tuicha ite Ñandejára, Tupãme jaropurahéi va’erã,

Ajépa tuicha ite Ñandejára, Tupãme jaropurahéi va’erã,
itáva ha ijyvyty marangatúpe.
Ajépa iporã ite yvyty Sión, amo yvate gotyo opu’ãva.
Opa ko yvy niko ombovy’a. O.

Upépe oiko mburuvicha guasu yvyty Siónpe,
Upépe oiko mburuvicha guasu tuichavéva.
Tupã Ñandejára omo’ã opa ite hendápe oguahẽvape,
Tupã Ñandejára, óga guasúpe oikóva, kóicha ojekuaauka. O.

Tupã Ñandejára, ne mborayhu rehe ore mandu’a tupaópe.
Tupã Ñandejára, opa rupi ne rerakuã,
ha maymávante ne momba’e.
Teko joja mante heñói nde pógui. O.

ALELUIA Jn 8, 12
Aleluia.
Ñandejára Jesucristo he’i: “Che hína pe ohesapéva yvy ape ári; pe che moirüva orekóta mba’e resapeha Tekove rehegua”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 7, 6. 12-14

Upe ramo Jesús he’i hemimbo’ekuérape: Ani peme’ẽ umi mba’e imarangatúva jaguápe, aníntemo ojere pende rehe ha pende su’upa. Ani peity pene mba’e jeguaka kurépe, aníntemo opyrũmba rei hese.

Upévare, pejapo pende rapicháre upe peẽ peipotáva ha’ekuéra ojapo pende rehe. Upévape he’ipa itéma Moisés rembiapoukapy ha maranduhárakuéra kuatia Ñe’ẽme oĩva.

Peikéke pe okẽ po’i rupi. Cháke ipe hína upe okẽ ha ipe upe tape ohóva aña retãme. Ndahasýi upe tape rupi jaiko ha heta umi oikéva upe okẽ rupi. Upe okẽ ha upe tape ohóva tekovetépe katu ipo’i ha hasy upe rupi jaiko. Ha pokã umi ojuhúva pe okẽ.

Ñandejára Jesucristo Ñe’ẽ.