LECTURAS: MARTES III DE CUARESMA

LECTURAS: MARTES III DE CUARESMA

Ko’ágã ñahendúta Tupã Ñandejára ñe’ẽ Daniel arandukápe oĩ háicha     3, 25-26. 34-43

Azarías, hérava avei Abed-Negó, pe oñembo’yhápe tata mbytépe, oñembo’e kóicha: Rejererohory va’erã nde, Tupã ore rukuéra ypykue Jára.

Ndéve ojepurahéi va’erã
ha nde réra oñemomba’e guasu opa árape guarã.

Nde réra rehehápe, ani
ore reja opa árape guarã.

Ani remboyke ñe’ẽ me’ẽ rerekóva ore ndive.

Nde poriahuvereko ani remboyke ore
hegui, ne irũ tee Abraham, ne rembiguái Isaac, ha nde ra’y marangatu Jacob rayhupápe.

Ichupe kuéra reme’ẽ va’ekue ne Ñe’ẽ iñemoñare hetataha mbyja ita
yvágape guáicha, ha yvy ku’i ra’ỹi yguasu rembe’ýpe guáicha.

Ore Jára, tetã michĩvéva yvy arigua niko oiko va’ekue ore
hegui.

Ha ko’ágã roiko toryjárõ ko yvy
jerekuévo ore angaipáre.

Ndaipóri véima ko’ã árape
mburuvicha, maranduhára, ha karai guasu kuéra.

Ndojehecha véima ko’ã árape
mymbahapy ha mymbajuka, mba’e kuave’ẽ ha insiénso ojehapy ramo ndéve.

Ndaipóri véima mamo romoguahẽ haguã ndéve ore ñemity ngue
tenondere, umíva rupi rohupity haguã ne pytyvõ.

Opáichavo, erohory oréve ore
ñembyasy ore py’a ite guive ndéve romoguahẽva, rerohory háicha mymbahapy oñekuave’ẽ ramo ndéve ovecha mácho térã tóro,
térã ovecha ra’y eta oñemongyra pyre.

Ta upéicha kena ko’ágã ne renondépe
ore mba’e kuave’ẽ, ha toroiko nde rape rehe ore py’a ite guive.

Araka’eve niko ndoikóiva ñemotĩme umi nde rehe ojeroviáva.

Ha ko’ágã katu roikose
nde rapére ore py’a ite guive.

Ndéve romomba’e ore, ha
rojapose upe ndéve ne mbovy’áva.

Ani ore reja roñemotỹ,
ema’ẽ uvei ore rehe py’a porãme, ha ore poriahuvereko
nde py’a ite guive.

Orepe’a kena ivaívagui,
mba’e hechapyrãva kena ejapo ore rehe, nde réra rehehápe, Tupä Ñandejára.

Tupã Ñandejára Ñe’ẽ.

SALMO ÑEMBOHOVÁI 24, 4-5a. 6-9

R. Tupã Ñandejára, ani nde resarái ne mborayhu ha nde poriahuverekógui.

Tupã Ñandejára,
ehechauka chéve umi nde rape,

ha umíva rupi che
sãmbyhy.

Che mbo’e umi mba’e
añeteguáva rehe.

Tupã nde niko che Jára che pysyröhára. R.

Che angaipágui katu
eñemboesarái,

ha mba’e vai ajapo
va’ekuégui che mitã ramo guare.

Che Jára, ani nde resarái che hegui, ne mborayhu niko tuicha. R.

Tupã Ñandejára niko imba’e porã ha imarangatu, upévare ohekombo’e heko vaívape.

Imboriahúvape oisãmbyhy ani haguãtei ojavy, ha hapére ichupe kuéra omboguata. R.

VERSÍCULO ANTES DEL EVANGELIO  Cf. Jl 2, 12-13

Pende py’a ite guive pejevy che rendápe che mba’e porä ha aporoiporiahuverekóre.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha.                                                   18, 21-35

Upe ramo
Pedro oñemboja Jesús rendápe ha he’i ichupe: Che Jára, mbovy jevyvépa che
rapicha rembiapo vaikue aheja rei va’erã ichupe? Iporãma piko 7 jevyve aheja
rei ramo?

Jesús he’i
ichupe: Nahániri. Iporãta 70 jevy 7 reheja rei ramo. Upévare, Tupã Ñandejára
sãmbyhy yvága pegua niko kóicha hína.

Oĩ va’ekue peteĩ mburuvicha guasu oikuaa porãséva mba’éichapa umi ichupe omba’apóva oĩ hendive viru porúpe. Ha oñepyrũvo ohecha peteĩ teĩ, ojereru ichupe peteĩ heta eterei viru omyengovia’ỹ va’ekue ichupe. Ha upéva ndoguerekóigui mba’eve, pe mburuvicha guasu he’i oñeme’ẽ haguã ichupe hepýre tembiguái ramo ambuépe, ta’ýra kuéra ha opa oguerekóva reheve.

Péicha omyengovia haguã pe viru oiporu va’ekuére. Upépe, pe kuimba’e oñesũ huvicha renondépe ha ojerure asy ichupe he’ívo: “Che ruvicha, che ra’arõna. Ame’ẽmba jevýta niko ndéve.” Pe mburuvicha guasu oiporiahuvereko ichupe. Oheja rei ichupe pe viru

oiporu va’ekue ha oheja oho. Pe kuimba’e osẽvo okápe katu, ojuhu peteĩ hapicha oipuru va’ekue ichugui  viru sa’imi. Opo voi ijajúrare ojuvy haguãicha ichupe, he’ívo: “Emoengovia chéve pe aiporuka va’ekue ndéve”.Pe hapicha oñesũ henondépe ha ojerure asy ichupe he’ívo: “Che ra’arõna. Ame’ẽmba jevýta niko ndéve.”

Ha’e katu ndoikuaaséi ichugui  mba’eve. Omyakãsã ha ombotyuka koty ypytũme omoengoviapa peve pe viru oiporu va’ekue.Ohechávo upéva, umi hapicha kuéra ombyasy eterei. Oho hikuái mburuvicha guasu rendápe ha

omombe’upa ite ichupe pe ojehu va’ekue. Upe marõ pe mburuvicha guasu ohenoiuka pe kuimba’épe ha he’i ichupe: “Nde tembiguái ahẽ! Che aheja rei ndéve pe ikatu’ỹ va’ekue remyengovia, rejerurégui chéve. Ha nde reiporiahuvereko va’erã mo’ã avei nde rapichápe, che roiporiahuvereko haguéicha.”

Pe mburuvicha guasu ipochy eterei pe kuimba’e ndive. Omyakãsã ha ombotyka koty ypytũme omyengoviapa peve ichupe pe viru ome’ẽ va’ekue ichupe.

Upéi Jesús he’i: Péicha
avei che Túva yvágape oĩva ojapóta pende rehe, pende py’a ite guive
napeheja reíri ramo pende rapichápe, pe ojapóva pende rehe.

Ñandejára Jesucristo Ñe’ẽ.