LECTURAS MIÉRCOLES 2º TIEMPO DURANTE EL AÑO

LECTURA PETEÎHA:

Ko’ágã  ñahendúta Tupã Ñandejára ñe’ẽ Samuel arandukápe oĩ háicha         17, 1a. 2a. 4a. 8. 32-33. 37. 40-51

Filistéokuéra oñemboatypa ñorairõrã. Upéicha avei Saúl ha kuimba’e Israelgua oñemboatypa oñorairõ hagua filistéokuéra ndive.

Upéjave ose filistéokuéra pa’ũgui peteî kuimba’e ñorairõ hára hérava Goliat ha he’i ichupekuéra: marãiko pesẽ peñorairõsẽ, che niko filisteo añorairõkuaa, peẽ katu nahániri. Peiroravo peteĩ pende apytégui oñorairõ haguã che ndive.

 Upérõ David he’i Saúlpe: Ani avave ojepy’apy ko filistéore, che ruvicha guasu. Che añorairõta hendive.

Saúl he’i ichupe: Mba’éicha piko nde rehóta reñorairõ ko filistéo ndive? Ne mitãiterei, ha’e katu imitã guive voi oñorairõva.

Tupã Ñandejára che pe’a va’ekue león ha óso rãinguágui, che pe’áta avei ko filistéo pógui.

Upérõ Saúl he’i ichupe: Tereho katu ha Tupã Ñandejára ta ne moirũ! ipojái pe yvyra ipo peguáre, oiporavo 5 itasãi apu’a ysyrýgui ha omoinge ivosápe.

Upéi osẽ hi’ónda ipópe upe filistéope. Pe filistéo avei oñemboja mbegue katu oúvo David gotyo ha henonderã ou ipytyvõhára. Pe filistéo oma’ẽ David rehe, ha ohechávo peteĩ mitã rusu rova pytãmiha ijukýva, ojapo’i ichupe, ha he’i: Che piko jagua mba’e reju haguã chéve yvyra nde pópe?

Ha ojahéi hese itupã rérape. Upéi he’i ichupe: Eju ko’ápe tame’ẽ nere’õngue yryvu ha tymba ñarõme hembi’urã!

David he’i ichupe: Nde reju chéve kyse puku ha kyse yvuku reheve, che katu aju ndéve Tupã ipu’akapáva, Tupã Israelgua ñorairõhára Jára rérape.

Umívape nde remoñarõ reikóvo, ko’ágã  Tupã neme’ẽta che pópe ha ko árape voi rojukáta ha roñakã’óta. Ha filistéo ñorairõhára re’õnguekuéra ahejáta yryvu ha tymba ñarõme. Péicha opavave ko yvy ári oikuaáta oĩha Tupã Ñandejára Israélpe. Opa ko’ápe ijatýva oikuaáta Tupã Ñandejára ndoporope’aiha jejopy vaígui kyse puku térã kyse yvukúpe. Tupã Ñandejára hína pe oñorairõta ha pene me’ëtáva ore pópe.

Pe filistéo oñemongu’e ha osẽ Davídpe. Ha’e avei pya’e osẽ ha oñemoĩ filistéo renondépe, opo’ẽ ivosápe, oguenohẽ peteĩ ita, omoĩ hi’óndape, oha’ã pe filistéope ha ojapi ichupe isyva mbytetépe. Pe ita ojejakutu ha oike isyváre. Pe filistéo ho’a ovapývo. Péicha David ipu’aka pe filistéore. Peteĩ ónda ha peteĩ itápente David oity ichupe yvýre. Ha ndoguerekóigui kyse puku, pya’e oñemboja pe filistéo oĩháme, ohekýi ichugui  ikyse puku ha pype ojuka ichupe. Upéi oñakã’o.

Filistéo kuéra ohecháma ramo iñorairõha imbaretevéva re’õngue, oguevipa.

Tupã Ñandejára Ñe’ẽ

SALMO ÑEMBOHOVÁI      143, 1-2. 9-10

Opavave: To ñemomba’e guasu Tupã Ñandejárape!

To ñemomba’e guasu Tupã Ñandejára!

Ha’e upe oñangarekóva che rehe,

omombarete che jyva añorairõ haguã

ha upe che mbokatupyrýva ñorairõrã. O.

Ha’e ipy’a porã che ndive ha che mo’ã,

che pytyvõha ha che pysyrõva;

oñangareko che rehe ha che nohẽ jejopy vaígui.

Ha’e ha upe omoĩva tetãnguéra che po guýpe. O.

Tupã Ñandejára, purahéi pyahu ndéve apurahéita,

árpa púpe rogueropurahéita,

Nde rupi mburuvicha guasukuéra ipu’aka

Nde upe renohẽva ne rembiguái Davídpe jejopy vaígui. O.

ALELUIA   Cf. Mt 4, 23

Aleluia.

Ñandejára Jesucristo omoerakuã Marandu porã Sambyhy rehegua, oipohano ha omonguera

opaichagu hasývape.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha   3, 1-6

Upe ramo guare Jesús oike umi judío tupaópe, ha upépe oĩ peteĩ kuimba’e ipo ypíva. Ha oma’ẽ hikuái Jesús rehe, jahecha omonguerápa ichupe pytu’uha árape, ha ndoguerekóipa upéicha omoĩ vai haguã ichupe.

Upérõ Jesús he’i pe kuimba’e ipo ypívape. Epu’ã ha eñemoĩ pe mbytépe.

Upéi oporandu umi ambuépe: Mba’e mba’épa ikatu jajapo pytu’uha árape: ivaívapa, térãpa iporãva? Japoromonguera térãpa japorohundi? Ha’ekuéra katu okirirĩ.

Upérõ Jesús oma’ẽ pochy umi ijerére guáre, ha oguerombyasývo ipy’a hatãnguéra. He’i upe kuimba’épe: Eipyso nde po.

Pe kuimba’e oipyso ipo ha okuera. Upéi, umi fariséo osẽ oho. Oñepyrũ oñomongeta Herodes reheguakuéra ndive mba’éichapa ikatúta ojuka Jesúspe.

Ñandejára Jesucristo Ñe’ẽ