LECTURAS MIÉRCOLES 5º TIEMPO DURANTE EL AÑO

LECTURAS MIÉRCOLES 5º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Reyes arandukápe oĩ háicha 10, 1-10

Mburuvicha guasu kuñáva Sabá pegua ohendu Salomón herakuã guasuha, ha oho Jerusalénpe oikuaa haguã mba’éicha ite pevépa iñarandu, ha ogueraha mba’e porandu hasýva ojejora haguã.

Omimbipa oguahẽvo, ikaméllo kuéra henyhẽ mba’e ryakuã porã, hetaiterei óro, pláta ha ita jeguágui. Oguahẽ rire Salomón rendápe oporandu ichupe opa mba’e oporanduse va’ekue, ha Salomón he’i ichupe mba’épa he’ise opa umi mba’e ha’e oikuaaséva. Peteĩ mba’énte jepe ndaipóri ha’e oikuaa’ỹva, opa umi ichupe oporandu va’ekuégui.

Mburuvicha guasu kuñáva Sabá pegua, ohechávo mba’éicha itépa Salomón imba’e kuaa, ha pe óga guasu ha’e omopu’ã va’ekue, umi tembi’u imesa pegua, umi mburuvichakuéra koty, hembiguáikuéra reko resãi guasu ha ijao jegua, umi ao oiporúva kaguy tykuaha, umi mymbahapy oikuave’ëva tupaópe, ijurujái opytávo, ha he’i mburuvicha guasu Salomónpe:

“Pe ahendu va’ekue che retãme ne rembiapokue ha ne arandu rehegua, añete ra’e; Ko’ágã ikatúma arovia aju haguére ahecha che resa tee rupi. Ahecha kuaa noñemombe’úi hague chéve mbyterénte jepe upe oĩvagui. Heta itereive mba’e reikuaa ha rereko pe che ahendu va’ekuégui.

Ovy’aiténepa ne rembirekokuéra ha umi ne rembiguái oĩ mantéva nde ykére ha ohendúva ne ñe’ẽ henyhẽva arandúgui! To jererohory Tupã nde Jára nde rayhu va’ekue ha ne moĩ Israel guapyhápe opa árape guarã, ohayhúgui Israélpe, ha ne moĩ mburuvicha guasúrõ reisãmbyhy haguã hekópe ichupekuéra reipurúvo teko joja!”

Upéi ome’ẽ Salomónpe 3.960 kílo óro, ha hetaiterei mba’e ryakuã porã ha ita jegua. Araka’eve noguahëi Israélpe heta ite mba’e ryakuã porã ogueru haguéicha mburuvicha guasu kuñáva Sabá pegua mburuvicha guasu Salomónpe.

Tupã Ñandejára Ñe’ẽ

SALMO ÑEMBOHOVÁI 36, 5-6. 30-31. 39-40

Opavave: Heko potĩva ñe’ẽ arandu memete.

Tupã Ñandejára pópe emoĩ nde rekove,
hese ejerovia, ha ha’e oñangarekóne nde rehe.
Kuarahýicha ojajáine nde reko joja,
araícha hesakãne nde reko potĩ. O.

Heko potĩva ñe’ẽ arandu memete,
ha opa mba’e he’i hendapete.
Tupã Ñandejára mbo’epy oĩ ipy’a pýpe,
ha noñepysãngái chéne. O.

Tupã Ñandejára oipytyvõ heko potĩvape,
hendápe ha’e kuéra oguahẽ kuaa ojejopy vai jave.
Tupã Ñandejára oipe’a ichupekuéra upe jejopy vaígui,
ha’ekuéra ojerovia haguére hese. O.

ALELUIA Cf. Jn 17,. 17ba

Aleluia.
Ne Ñe’ẽ Tupã Ñandejára añetegua
ore momarangatu pe añeteguápe.
Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 7, 14-23

Upe ramo guaare Ñandejára ohenói opavavépe ha he’i: Pe che rendúke opavave, peikuaa haguã. Mba’eve okáguio oikéva ndaikatúi ñane mongy’ávo. Pe ñande py’apýgui osẽvante pe ñane mongy’áva. Peẽ pende apysáva, pehendu.

Jesús oheja rire ichupekuéra ha oike hógape, hemimbo’e kuéra oporandu ichupe ko ombo’e va’ekuére, Ha’e he’i ichupekuéra: Ndapeikuaái nga’u piko mba’eve oikéva ñande juru rupi ndaikatuiha ñane mongy’ávo? Ndoikéi niko ñande py’apýpe, ñande ryépente, upéi osẽ jevy haguã ñande retégui.

Upéicha he’ívo he’ise opaichagua tembi’u ipotĩha. He’i avei: Pe osẽva ñande hegui, upéva hína pe ñane mongy’áva. Ñande py’apýgui niko osẽ mba’e ivaíva, jejuka, ñemoakãratĩ, teko vai, monda, japu, ha ñe’ẽ rei ñande rapicháre. Opa ko’ã mba’e vai osẽ ñande py’apýgui ha ñane mongy’a.

Ñandejára Jesucristo Ñe’ẽ