LECTURAS MIÉRCOLES EPIFANÍA RIRE

LECTURAS MIÉRCOLES EPIFANÍA RIRE

LECTURA PETEÎHA:

Kuatiañe’ẽ peteĩha San Juan ohai va’ekue 1 Jn 4, 11-18

Che pehẽngue kuéra pohayhúva, Tupã Ñandejára ñande rayhu haguére péicha ite peve, ñande avei jajoayhu va’erã. Tupã Ñanadejárape avave ndohechái va’erã, opáichavo jajoayhúrõ Tupã Ñandejára oĩ ñande pype ha imborayhu oĩ hekopete ñande pype.

Jaikuaa ñande ñaimeha Tupã Ñandejárape ha ha’e oĩha ñande pype, ha’e ome’ẽ haguére ñandéve Ijespíritu. Ha che voi ahecha va’ekue ha amombe’u pe Túva ombou hague Ta’ýrape oipysyrõ haguã yvypóra kuérape. Opa he’íva Jesús Tupã Ra’yha, oĩ Tupã Ñandejára ndive ha Tupã Ñandejára oĩ hendive.

Upéicha jaju jarovia ha jaikuaa Tupã Ñandejára ñande rayhuha. Tupã hína mborayhu, ha oikóva mborayhúpe oiko Tupãme ha Tupã Ñandejára ipype. Ha upéicharõ Tupã mborayhu oĩ hekopete ñande pype, jakyhyje’ỹ haguã mbojovake árape, ñandégui ko yvy ári Jesucristo chagua. Oĩháme mborayhu ndaipóri kyhyje.

Upéva rangue upe mborayhu hekopeguáva omosẽ okápe kyhyje, pe kyhyje niko ogueru jepy’apy. Upévare pe okyhyjéva ndoporohayhúi gueteri hekópe.

Tupã Ñandejára Ñe’ẽ.

SALMO ÑEMBOHOVÁI 71, 1-2. 10-13

Opavave: Tupã Ñandejára, eme’ẽ mburuvicha guasúpe teko joja

Tupã Ñandejára, eme’ẽ mburuvicha guasúpe teko joja
ha mburuvicha guasu ra’ýpe teko potĩ,
ikatu haguãicha ne retã oisãmbyhy hekopete,
ha imboriahúvape ohecha kuaa. O.

Mburuvicha guasu Tarsis ha tetã mombyrygua tomba’e me’ẽ ichupe opa árape, mburuvicha guasu Sabá ha Sebá pegua to me’ẽ ichupe hetã mba’e. Opavave mburuvicha to ñemomichĩ henondépe. Opavave tetã toñemoĩ ipo guýpe. O.

Oguenohẽta imboriahúva ojerure vove ichupe jejopy vaígui,
ha oikotevẽvape ndorekóiva mamo oho haguã.
Oiporiahuverekóne imboriahúvape
ha ichupe oguenohẽne jejopy vaígui. O.

ALELUIA

Aleluia.
Terakuã porã ndéve, Cristo, oñemombe’úva umi
nda itupã rayhúivape; terakuã porã ndéve
Cristo, opa ite hendápe rejereroviáva.
Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 6, 45-52

Upe ramo okarupa rire umi cinco mil yvypóra ijaty va’ekue ohendu ha ohecha haguã Jesúspe: Ha’e he’i hemimbo’ekuérape ojupi haguã peteĩ kanóape ha ohasa haguã henonderã y mboypýri, Betsaida gotyo. Upe aja ha’e he’íta opavavépe oho haguã hógape. Omondopa rire opavavépe hógape, Jesús ojupi peteĩ yvytýpe oñembo’e haguã.

Pyhare oguahẽvo, pe kanóa ohupitýma pe y mbyte rupi. Pe y pochy katu oñenupã pe kanóa tĩre, ohuguaitĩgui ohóvo hikuái yvytu, ha ohecha umi kanóa pegua oho mbegueha, yvytu ojokógui ichupekuéra.

Ko’ẽ mbotávo, Jesús oñemboja hendápekuéra oguatahápe pe y apére. Ha oñemotenondese hese kuéra. Hemimbo’ekuéra ohechávo oguataha pe y apére, oimo’ã hikuái póra, ha osapukái, opavave ohechágui ichupe ha oñemondýi. Jesús katu pya’e oñe’ẽ ichupe kuéra he’ívo: Chénteko, ani pekyhyje!

Ojupi kanóape ha opi pe yvytu, ha ha’ekuéra ijurujái opytávo, ndoikéigui iñakãme nguéra pe mba’e rechapyrã pankuéra rehegua, pe iñe’ã nguéra niko iñypytũ.

Ñandejára Jesucristo Ñe’ẽ.