LECTURAS: SÁBADO 4º DURANTE EL AÑO

LECTURAS: SÁBADO 4º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe.          13, 15-17. 20-21

Che pehẽnguekuéra:

Upévare ñamomba’e guasu tapia va’erã Tupã Ñandejárape Jesucristo rupi. Ko ñemomba’e guasu kóva hína pe jehasa asy ñaikuave’ẽ va’erã. Jarohory jevy jevy ichupe!

Ani pende resarái pejapo haguã iporãva ha pemboja’o haguã pende rapichápe opa perekóva. Ko’ã mba’e hína pe Tupã Ñandejára oguerohorýva.

Pene ñe’ẽ rendúke umi Jesús iglésia sãmbyhyhárape ha peñemoĩ ipoguýpekuéra. Ha’e kuéra niko oñangareko pende rehe kane’õ’ỹre, oikuaágui omombe’u va’erãha Tupã Ñandejárape opa ojapo va’ekue. Peñeha’ã taivevúi ichupe kuéra hembiapo, ani ipohýi. Péicha’ỹrõ, naiporãi chéne peẽme.

Tupã Ñandejára, py’aguapy me’ẽha, omoingove jevy va’ekue Ñandejára Jesúspe, pe Ovecha Rerekua Guasu, huguýpe omoañete va’ekue ñe’ẽ me’ẽ opave’ỹva, ta pene momarangatu ha ta pene mbopy’a porã opa mba’épe, pejapo kuaa haguã hembipota. Ha’e tojapo ñande hegui oipota háicha Jesucristo rupi. To ñemomba’e guasu Cristo opa ára. Amén.

Tupã Ñandejára Ñe’ẽ.

SALMO ÑEMBOHOVÁI    22, 1-6

R. Tupä Ñandejára che rerekua, mba’eve naikotevẽi.

Tupä Ñandejára che rerekua, mba’eve naikotevẽi.

Ñu rovyũ asýpe che mombytu’u, y satĩ ypýpe che moguahẽ,

che mombarete jevy. R.

Tape hekópe guáre che reraha héra rehehápe.

Ahasa ramo jepe ka’aguy ypytũ rupi,

ndakyhyjéi chéne Nde reimégui che ndive,

nde yvyra jekoha, nde rehe che mbojerovia. R.

Karu guasu chéve rejapo umi che rayhu’ỹva rovake,

che akãre reñohẽ mba’e ryakuã asy, ha upe hay’uha remoenyhẽ chovi. R.

Ne mborayhu ha ne mba’e recha kuaa,

rehechauka chéve aikove aja pukukue,

ha nde rógape Tupã Ñandejára, aikóne opa árape. R.

ALELUIA  Jn 10, 27

Aleluia.

Ñandejára Jesucristo he’i: Che ovechakuéra ohendu che ñe’ë,

Che aikuaa ichupekuéra ha ha’ekuéra oho che rapykuéri.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha.                  6, 30-34

Upe ramo Jesús remimbo’ekuéra oñemboaty Jesús ndive ha omombe’u ichupe opa mba’e ojapo ha ombo’e va’ekue.

Jesús he’i ichupe kuéra: Jaha japytu’umi ñane año peteĩ ojeiko’ỹháme. Heta etereígui umi ou ha ohóva niko ndaijái ichupekuéra okarúvonte jepe.

Upéicha Jesús ha hemimbo’ekuéra oho kanóape peteĩ ha’eñoháme. Heta oĩ ohecháva ha oikuaa ha’ekuéraha. Upérõ opa távaguio ojeho upe gotyo ha oguahẽ hikuái ha’e kuéra mboyve.

Oguejývo Jesús pe kanóagui, ha ohechávo hetaha umi ijatýva, oiporiahuvereko ichupekuéra, oĩgui ovecha herekua’ỹ vaicha. Ha oñepyrũ ombo’e ichupe kuéra heta mba’ére.

Ñandejára Jesucristo Ñe’ẽ