LECTURAS VIERNES EPIFANÍA RIRE

LECTURAS VIERNES EPIFANÍA RIRE

LECTURA PETEÎHA:

Ñahendúta Tupã Ñandejára Ñe’ẽ San Juan ohai va’ekue 1 Jn 5, 5-13

Che ra’ykuéra pohayhuetéva: Upe ogueroviáva Jesús Tupã Ra’yha, ipu’aka yvypóra rekóre. Jesucristo jeju ko yvy ári ojechauka va’ekue y ha tuguýpe. Ndaha’éi ýpente, y ha tuguýpe uvei. Pe Espíritu voi oikuaauka kóva ha Espíritu hína añete. Oĩ mbohapy oikuaaukáva ko mba’e: Espíritu, y ha tuguy ha mbohapyve oĩ oñoñe’ẽme.

Jarovia umi mba’e yvypóra he’íva, upe Tupã Ñandejára he’íva katu heroviapyve, ha’e oikuaaukágui Ta’ýra reheguáva. Pe ojeroviáva Tupã Ñandejára Ra’ýre, oguereko ipy’ápe voi ko ojekuaauka va’ekue.

Pe oguerovia’ỹva Tupã Ñandejárape katu ombojapu ichupe, ndogueroviáigui pe Tupã oikuaauka va’ekue Ita’ýra rehegua. Ko ojekuaaukáva hína, Tupã Ñandejára ome’ẽ hague ñandéve jeikove opa’ỹva, ha avei ko jeikove oĩha Ita’ýrape. Pe oguerekóva Tupã Ñandejára Ra’ýpe, oguereko avei ko jeikove, ha ndoguerekóiva Tupã Ñandejára Ra’ýpe katu, ndoguerekói upe jeikove.

Ahai kóva peẽme peroviáva Tupã Ñandejára Ra’ýpe, peikuaa haguã peguerekoha jeikove opa’ỹva.

Tupã Ñandejára Ñe’ẽ.

SALMO ÑEMBOHOVÁI 147, 12-15. 19-20

Opavave: Jerusalén, erohory Tupä Ñandejárape.

Jerusalén, erohory Tupã Ñandejárape,
Sión emomba’e guasu Tupãme.
Ha’e omboty hatã ne rokẽ nguéra ha ohovasa
nde ra’y ha nde rajykuéra nde pype. O.

Ha’e ogueru py’aguapy nde yvýpe,
ha nemoyvatã trígo iporãvévape.
Ha’e ombou iñe’ẽ ko yvýpe
ha upe he’íva py’a oguahẽ. O.

Jacóbpe ha’e oikuaauka hembipota.
Israélpe ha’e ome’ẽ hembiapoukapy.
Ambue tetã ndive ha’e upéicha ndojapói,
ndoikuaaukái ichupekuéra hembiapoukapy. R.

ALELUIA

Aleluia.
Tupã Ñandejára omombe’u va’ekue Marandu Porã Sambyhy rehegua ha omonguera opaichagua hasývape.
Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 5, 12-16

Upe ramo peteĩ árape, oĩ jave hína Jesús peteĩ távape, oguahẽ peteĩ kuimba’e hasýva, ipire ai vaíva. Ohechávo Jesúspe, ojeity ha omboja isyva yvýre. Ha ojerure asy ichupe: Che Jára, nde reipotárõ che mongueráne che mba’asýgui.

Jesús opoko hese ha he’i: Aipota. Ekuera!

Ha upepete okuera pe imba’asýgui. Ha Jesús he’i ichupe: Ani emombe’u avavépe. Terehónte ejechauka pa’ípe, ha eikuave’ẽ Tupã Ñandejárape umi mba’e Moisés he’i va’ekue oñekuave’ẽha, ojehecha haguã rekueramaha.

Opáichavo, Jesús herakuã guasuve ko’ẽ ko’ẽre ha heta oñembyatýva ohendu haguã ichupe ha omonguera haguã ichupekuéra imba’asýgui. Jesús katu oho umi avave oĩ’ÿha rupi oñembo’e haguã.

Ñandejára Jesucristo Ñe’ẽ.