LUNES SEMANA XXVII DURANTE EL AÑO

LUNES SEMANA XXVII DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Galacia guápe      1, 6-12

Che pehẽnguekuéra:

Che mbopy’andýi peñe momombyry pya’ete hague Tupã Ñandejáragui, pene renói va’ekue  ohechaukávo peẽme ipy’a porã Jesucristo rupi, ha pehasa hague ambue marandúpe.

Añetehápe, ndaha’éi oiméva ambue marandu. Oiménte niko umi pene moakã tavýva ha omboaiséva Jesucristo marandu porã. Ha oimérõ ohendukáva peẽme marandu ndaha’éiva ore romoasãi va’ekue, toho aña retãme.

Marãve ndoikói che ramo, térã peteĩ Tupã Ñandejára remimbou ramo. Ha’éma haguéicha voi peẽme ko’ágä  ha’e jevy peẽme: Oimérõ omosarambíva pende apytépe marandu porã ndaha’éiva pe oguahẽma va’ekue  peẽme, toho aña retãme. Che ndahekái yvypóra ojuhu porã che rembiapo, Tupã Ñandejára ojuhu porãnte che aipota.

Che ndahekái apyta porã yvypóra ndive. Apyta porãse rire, ndaha’éi va’erã mo’ã Jesucristo rembiguái. Peikuaáke kóva, che pehẽngue  kuéra: pe marandu porã che amoasãiva, ndaha’éi yvypóra ojapo va’ekue. Noguahẽi chéve ha ndaikuaái va’ekue  mba’eveichagua yvypóragui. Jesucristo ite voi katu oikuaauka va’ekue  chéve.

Tupã Ñandejára Ñe’ẽ.

SALMO ÑEMBOHOVÁI 110, 1-2. 7-9. 10c

Opavave: Tupa Ñandejára ndahesaráiri iñe’ẽ marangatúgui

Che py’a ite guive arohory Tupã Ñandejárape,

aty guasu ha hekojojáva atyhápe.

Tuicháko hína umi Tupä Ñandejára rembiapokue,

ha umi oguerojepy’a mongeta hese. O.

Añete ha teko joja pegua meme hembiapokue,

hembiapoukapýre jajerovia kuaa.

Añete ha tekojojápe oñembohapo,

ha naiñambuéi chéne araka’eve. O.

Hetã guápe ha’e oguenohẽ jejopy vaígui, ha ome’ẽ iñe’ẽ opa árape guarã.

Tupã Ñandejára niko imarangatu ha jakyhyjeha.

To ñemomba’e guasu Tupãme opa ára. O.

ALELUIA Jn 13, 34

Aleluia.

Ame’ë peëme peteï tembiapoukapy pyahu:

pejoahu ojoapytépe, Che pohayhu haguéicha.

Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Lucas omombe’u háicha      10, 25-37

Upe ramo peteĩ Moisés rembiapoukapy mbo’eha oho oñe’ẽ Jesús ndive, ha oha’ã haguã ichupe oporandu: Mbo’ehára, mba’e piko ajapo va’erã areko haguã jeikove opa’ỹva?

Jesús he’i ichupe: Mba’épa oĩ tembiapoukapýpe? Mba’e piko pehecháva kuatiápe?

Upe Moisés rembiapoukapy mbo’eha he’i: Ehayhu Tupã nde Járape ne nde py’a ite guive, ne ánga rugua guive ha opa ne arandukue reheve, ha ehayhu nde rapichápe rejehayhu háicha nde.

Ha Jesús katu he’i: Ere porã, rejapórõ upéicha, reikovéta.

Pe tembiapoukapy mbo’eha katu, omoĩ porãsévo imba’e porandu, he’i Jesúspe: Ha máva piko pe che rapicha?

Aipórõ Jesús he’i ichupe: Peteĩ karia’y oguata ohóvo Jerusalén rapéguio Jericó gotyo, ha peteĩ mondaha aty ohape joko ichupe, ha oipe’a ichugui  ijao peve. Oinupã hikuái ha oheja ichupe omano ha nomanóime. Peichahágui rei peteĩ pa’i ohasa upe rupi, ha ohechávo ichupe ojere ichugui  ha ohónte ha ndopytái. Peteĩ levíta avei oguahë upépe, ha ohecha vove, ojere ichugui  ha ohónte avei tenonderã.

Peteĩ kuimba’e Samariagua katu, ohóva hína upe tape upévare avei, ohechávo oiporiahuvereko ichupe. Oñemboja hese, oipohano ñandyry ha vínope ha ojokua ichupe umi ojekutu hague rupi.

Upéi ohupi ichupe ikavaju tee ári, ogueraha peteĩ óga ojepytahápe ha oñangareko hese.

Upe riregua ko’ẽme, upe Samariagua oguenohẽ mokõi ára mba’apokue repy ha ome’ẽ upe óga járape, ha he’i ichupe: Eñangareko ko karia’ýre. Ndohupitypáirõ viru, che ahepyme’ẽta ndéve upéi ajevývo.

Ha néi, mávapa ko’ãvagui, ndéverõ guarã pe karia’y rapicha, ohape joko va’ekue  umi mba’e vai apoha? Upe Moisés rembiapoukapy mbo’eha he’i: Pe oiporiahuvereko va’ekue  ichupe.

Jesús katu he’i ichupe: Néi, tereho ha ejapo nde ave upéicha.

Ñandejára Jesucristo Ñe’ẽ