LUNES SEXTO DE PASCUA

LUNES SEXTO DE PASCUA

LECTURA PETEÏHA:

Ko’ágã ñahendúta Tupã Ñandejára ñe’ẽ Apóstokuéra rembiapokuépe oĩ háicha    

                            16,11-15

Rojupi ygápe Tróadepe ha ropia’ỹe roho yvy y mbyte pegua Samotráciape, ha upe ára mbuépe roguahẽ Neápolispe. Upépe roho Romaguáva táva Filipos, Macedoniagua táva Tenondevévape. Upépe ropyta ára mbovymi. Peteĩ pytu’uha árape rosẽ okaháre y rembe’ýpe, oñeñembo’ehápe jepi rupi.

Roguapy ha roñe’ẽ marandu porã rehe kuña nguéra oñemboaty va’ekuépe. Peteĩ ha’ekuérava héra Lidia, upéva Tiatiragua, poyvi pytã sãime oñemúva. Ko kuña omomba’e guasúva Tupãme, ohendu hína, ha Ñandejára omokyre’ỹ ichupe ojapysaka porã haguã upe Pablo he’ívare.

Oñemongaraiuka opa hogagua ndive ha upéi he’i oréve: Perovia ramo añetehápe che ajeroviaha Tupã Ñandejárare, peju pepyta che rógape. Ha ore reraha hógape.

Tupã Ñandejára Ñe’ẽ.

SALMO ÑEMBOHOVÁI  149, 1- 6a. 9b

Opavave: Toñemomba’e guasu Tupä Ñandejára.

O bien:

Aleluia.

Pepurahéi Tupã Ñandejárape purahéi pyahu,

umi hese ojeroviáva atýpe ichupe to ñemomba’e guasu.

Israelgua to guerohory ijapo harépe,

Siongua to guerohory huvicha guasúpe. O.

Héra rehehápe pejeroky,

tambor ha árpa púpe ichupe pepurahéi.

Tupã Ñandejára niko ohayhu hetã guápe,

imboriahúvape oguenohẽ jejopy vaígui. O.

Ta hory hesehápe umi imarangatúva,

oñenoháme jepe ichupe topurahéi.

Ijurúgui tañahendu omomba’e guasúrõ Tupãme,

umi hese ojeroviáva kóicha osẽ porãta. O.

ALELUIA Jn 10, 27

Aleluia.

Ñandejára Jesucristo he’i:

“Pe Espíritu añetegua oñe’ëta che rehehápe ,

ha peë avei peñe’ëta che rehehápe avei poromomarandu haguä”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha  15, 26 – 16, 4

Upe ramo ohasa mboyvemi Tupã Ñandejára ykére, Jesús he’i hemimbo’ekuérape:

“Pene Pytyvõhára oúta, pe Espíritu oikuaaukáva mba’éichaguápa Tupã Ñandejára ha oúva che Rúgui. Ichupe amboúta peẽme che Rúgui ha ha’e oñe’ẽta che rehehápe. Ha peẽ avei peñe’ẽta che rehehápe, peime haguére che ndive iñepyrũmby guive.

Ha’e peẽme ko’ã mba’e ani haguã ikangy pende jerovia che rehe. Peñemosẽta umi Tupã Ñandejárape oñemomba’e guasu haguã oñeñemboaty hágui, ha oguahẽ va’erã ára ou ramo pende jukáva, ogueroviáne ojapoha iporãva Tupã Ñandejárape guarã. Péicha ojapóne hikuái nda ore kuaái haguére. Ndoikuaái che Rúpe ha nda che kuaái chéve. Ha’e peẽme ko’ã mba’e, ágã oguahẽ vove upe ára pene mandu’a haguã che amombe’u hague peẽme.

Nda’éi kuri peẽme iñepyrũmbýpe, aimégui pene ndive upérõ”.

Ñandejára Jesucristo Ñe’ẽ.