LUNES TRIGÉSIMO SEGUNDO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Sabiduría arandukápe oĩ háicha       1, 1-7

Tetã sãmbyhyhára pehayhúke teko joja. Pene mandu’a hekópe Tupã Ñandejárare, ha peheka ichupe pende py’a ite guive.

Ha’e ojejuhukáne umi ichupe oipy’a ra’ã’ỹvape, ha ojekuaaukáne umi hese ojeroviávape.

Py’a mokõi oporomo mombyry Tupã Ñandejáragui, ha ipokatu oñeha’ãvo ojekuaa omokañy itavývape. Arandu ndoikéi mba’e vai apoha py’apýpe, ha heko ky’áva retépe ndoikói.

Espíritu marangatu, ñane mbo’éva, ojere japúgui ha ojei výro reígui, ha oñeñandu ndaijái teko joja oĩ’ỹháme.

Arandu niko espíritu ohayhúva yvypórape, ha ndoheja rei mo’ãi iñe’ẽ guasúvape.

Tupã Ñandejárape guarã hesakã opa oñandúva, oikuaa opa ipy’ápe oguerekóva, ha ojapysaka opa mba’e he’ívare.

Tupã Ñandejára Espíritu omoenyhẽ ko yvy ha oguereko ipópe opa mba’e, oikuaapa opa oje’éva.

Tupã Ñandejára Ñe’ẽ.

SALMO ÑEMBOHOVÁI   138, 1-10

Opavave: Tupã Ñandejára che mboguata tape ikarẽ’ỹvare.

Ore Jára, nde reipyguara che reko ha nde che kuaa.

Nde reikuaa aguapy ha apu’ã ramo,

mombyry guive reikuaa upe che akãme arekóva.

Reikuaa aguata térã aguapy ramo, opa mba’e ajapóva reikuaa. O.

Ñe’ẽ ne’ĩra gueteri osẽ che jurúgui, ha nde, che Jára, reikuaáma upe ha’étáva hína.

Che kupépe ha che renondépe, upépe reime.

Nde pópe che rereko, che rehe reñangareko. Nde che kuaa porãeterei. O.

Mba’e hesakã’ỹva chéve ha ija’ỹva che akãme.

Mba’éicha piko añemo mombyrýta nde hegui?

Moõ piko ikatúta akañy nde hegui?

Yvágape ajupi ramo, upépe reime.

Omanóva ohohápe aguejy ramo, upépe reime. O.

Ko’ẽtĩ gotyo aveve ramo aha,

térã kuarahy reike gotyo yguasu

rembe’y rupi aha ramo aiko,

upépe jepe, nde che sãmbyhýne, che rehe reñangarekóne. O.

ALELUIA Flp 2. 15d. 16a

Aleluia.

Pehesapéke umi tesapeha ratáicha yvypóra apytépe,

pehechaukávo Marandu porä orekóva Tekove.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha     17, 1-6

Upe ramo Jesús he’i hemimbo’ekuérape: “Ndaikatúi ojejoko oĩvo heta mba’e oporoitýva teko vaípe, ha to jerekóke umi yvypóra oitýva hapichápe, teko vaípe. Iporãve va’erã oitýrõ ichupe hikuái yguasúpe ita guasu ijajúri, ha’e oity rangue angaipápe peteĩ jepe umi michĩmívape.” Pejererekóke peẽ.

Nde rapicha heko vaírõ, emongavaju ichupe. Ohejárõ heko vaikue katu, eheja rei ichupe. Ta hembiapo vai jepe ra’e nde rehe 7 jevy peteĩ árape. Ha 7 jevy oho ramo he’i ndéve reheja rei haguã ichupe, reheja reí va’erã.

Umi apóstol ojerure Ñandejárape: Eme’ẽve oréve pe jerovia.

Jesús he’i ichupe kuéra: Pende jerovia michĩ ramo jepe oimeraẽ mba’e ra’ỹi michĩve vaicha, pejéta peteĩ yvyra mátape: “Ejehapo’o upégui ha eñemohenda yguasúpe”, ha ojapóne pejéva.

Ñandejára Jesucristo Ñe’ẽ.