LUNES XIV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha 28, 10-22a

Jacob osẽ Bersébagui ha oipykúi Aram rape. Oguahẽvo peteĩ hendápe, kuarahy oikéma hína ha opyta upépe. Oñemoakãngyta peteĩ itápe ha oñeno oke.

Oke aja, ohecha iképe peteĩ mba’e ojejupiha, ojepysóva yvy guive yvága peve. Upe rupi oguejy ha ojupi Tupã Ñandejára remimbou.

Tupã Ñandejára oñembo’y hína ijykére, ha he’i ichupe: Che hína Tupã, nde ru kuéra Abraham ha Isaac Jára. Ame’ẽta ndéve ha ne ñemoñarépe ko yvy repytu’uha hína. Ne ñemoñare heta etereíta, yvy ra’ỹi yvy ári guáicha, ha ha’e kuéra iñasãita opa rupi ko yvy jerekuévo.

Nde ha ne ñemoñare rupi ojehovasáta tetã nguéra. Ne mandu’áke. Aiméta nendive, romo’ãta ivaívagui mamo rehohápe, ha rogueru jevýta  ko’a gotyo. Ndoroheja mo’ãi rejapopa ite peve ha’e va’ekue  ndéve.

Opáyvo Jacob he’i: “Tupä Ñandejára oĩ hína ra’e ápe, ha che ndaikuaái!” Okyhyje ha he’i: “Tuicha ite mba’épa ko aimeha! Oime va’erã niko Tupã Ñandejára róga ha yvága rokẽ hína!”

Opu’ã ko’ẽ mboyve, ohupi upe ita oñemoakãngyta hague ha omoñembo’y upépe mandu’arã. Upéi oñohẽ hese ñandyry ha omboyke Tupã Ñandejárape guarã. Upe táva héra ypy va’ekue  “Luz” ha ha’e ombohéra “Betel”.

Upérõ ome’ẽ Tupã Ñandejárape iñe’ẽ ha he’i ichupe: “Nde che moirũ ha che mo’ã ramo che rapépe, rejuhuka ramo chéve che rembi’u ha che aorã, che rerojera ramo tesãi reheve che ru rógape, ndéta hína Tupã che Jára. Ko ita amoñembo’y va’ekue  mandu’arã, ha’éta peteĩ reñemomba’e guasu renda. Ha opa mba’e chéve reme’ẽvagui, ame’ẽta ndéve 10gui peteĩ.”

Tupã Ñandejára Ñe’ẽ.

SALMO ÑEMBOHOVÁI 90, 1-4. 14-15b

Opavave: Tupã Ñandejára nde rehe che ajerovia.

Upe oikóva upe Yvatetegua ãme, ha oñemoĩva upe Ipu’akapáva guýpe,

he’i Ñandejárape: “Tupã, nde hína upe che mo’ãva, nde rehe che ajerovia.” O.

Ndohejái chéne re’a ñuhãme, térã mba’asy oporojukávape.

Nde aho’íne ipepópe ha iguýpe reñemo’ãne.

Heko jeroviaháva oñangarekóne nde rehe. O.

“Ha’e oñemoĩgui che pópe anohẽta ichupe jejopy vaígui,

ha’e che kuaágui añangarekóta hese.

Ajapysakáta hese chéve oñembo’évo, ojejopy vai ramo hendive aiméta che. O.

ALELUIA 2Tim 1, 10b

Aleluia.

Ñandejára Jesucristo ipu’aka manóre ha ombojajái pe tekove, Marandu porä rehe ae.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha   9, 18-26

Upe ramo Jesús rendápe oguahẽ peteĩ moakãhára  judíokuérava. Oñesũ henondépe ha he’i ichupe: Che rajy niko omano ramoite. Nde reho ramo remoĩ nde po hi’ári, oikove jevýta .

Jesús opu’ã ha oho hendive, ha hemimbo’ekuéra ndive.

Peteĩ kuña katu, hasýva ojapóma 12 áño ha huguy mantéva, oñemboja Jesús rehe hapykuéguio ha opoko ijao ruguáire. Pe kuña niko he’i ipy’apýpe: “Ijao rehénte jepe apokórõ, akueráta.” Jesús katu oñembojere, ha ohechávo pe kuñáme he’i ichupe: Néike, che rajy. Che rehe rejerovia haguére rekuera.

Ha upepete pe kuña okuera.

Ha oguahẽvo Jesús pe moakãhára  rógape, ohecha umi mimby mbopuha oñembosako’íva ñeñotỹrã ha hetápe ojahe’o joáva. He’i ichupe kuéra: Pesẽmba ko’águi. Ko mitãkuña niko nomanói, okénte hína.

Ha opukapa hese hikuái. Omosẽmba rire opavavépe, Jesús oike pe mitãkuña oĩháme. Ipojái ipóre ha upévo pe mitãkuña opu’ã. Ha opa upe jerekuévo herakuã pe ojehu va’ekue .

Ñandejára Jesucristo Ñe’ẽ.