MARTES CUARTO DE PASKUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha                           

11, 19-26

Omano rire Esteban, oñepyrũ upe ñepu’ã umi Jesús reroviahare, ha upévare okañy hikuái Fenicia, Chipre ha Antioquíape. Upe rupi omoerakuã hikuái umi Israel guávape upe marandu porã ha umi Israelgua’ỹvape katu nahániri.

Opáichagua, oĩ Jesús reroviaha Chipre ha Cirenegua oguahẽva Antioquíape ha oñe’ẽ avei umi Israel gua’ỹvape, omoerakuãvo upe marandu porã Ñandejára Jesús rehegua. Tupã Ñandejára pokatu oĩ hendivekuéra, ha upéicha rupi heta umi ojehejáva ijerovia yma guarégui ha oguerovia Ñandejárape.

Iglésia Jerusalén pegua oikuaávo upéva, omondo Bernabépe Antioquíape. Oguahẽvo Antioquíape Bernabé ohecha mba’éichapa Tupã Ñandejára ohovasa ra’e ichupe kuéra, ha ovy’a eterei. He’i ichupekuéra oñembopy’a peteĩ haguã ipy’aite guive Ñandejára ndive. Bernabé va’ekue kuimba’e marangatu henyhẽva Espíritu Sántogui ha jeroviágui. Ha upéicha rupi heta umi ojerovia va’ekue Ñandejárare.

Upéi Bernabé oho Társope Saulo píari, ha ojuhu rire ichupe, ogueraha Antioquíape. Upépe opyta ha oñemboaty hikuái upepegua iglésia ndive peteĩ áño pukukue, ombo’évo hetápe. Antioquíape oñepyrũ va’ekue oñembohéra “cristiano”, umi Cristo rehe ojeroviávape.

Tupã Ñandejára Ñe’ẽ.

SALMO ÑEMBOHOVÁI 86, 1-7

Opavacce:Tupã Ñandejára omopu’ã hogarã umi yvyty marangatúpe.

O bien:

Aleluia.

Tupã Ñandejára omopu’ã hogarã umi yvyty marangatúpe.

Opa Israel táva apytégui Sión hína upe ha’e ohayhuvéva.

Heta mba’e neporãva niko oje’e, nde rehe, Tupã Ñandejára táva. O.

“Egipto ha Babilonia ne ndive oĩ.

Filistea, Tiro ha Etiopía nde rehegua voi.”

Kóicha oje’éne táva Sión rehe:

“Kóva ha amóva niko upépe ára resa ohecha va’ekue.

Upe Yvatetegua, ha’ete voi, pe táva omopu’ã.” O.

Tupã Ñandejára omoĩvo tetã nguéra réra kuatiáre, he’íne umívare:

“Kóva niko upépe ára resa ohecha va’ekue.”

Purahéi ha jerokýpe he’i joáne hikuái:

Ko’ápe ajuhu opa mba’e iporãva. O.

ALELUIA Jn 10, 27

Aleluia.

Ñandejára Jesucristo he’i:

“Che ovechakuéra ohendu che ñe’ë,

che aikuaa ichupekuéra ha ha’e kuéra oho che rapykuéri”.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Juan omombe’u háicha.                                                  10, 22-30

Upe ramo gaure Jerusalénpe omboarete hikuái Tupao oñemboyke jevy ramo guare Tupã Ñandejárape. Jesús katu oguata oikóvo Tupao rupi, Salomón rogaguy heraha rupi.

Upépe, umi judío kuéra oñembojerepa hese ha oporandu ichupe: Araka’e peve piko ore rerekóta roikuaa porã’ỹre mba’épa ro’e va’erã nde rehe? Emombe’u porãntena oréve. Ndepa hína pe Mesías?

Jesús he’i ichupe kuéra: Ha’éma niko peẽme, ha nda che reroviaséi. Umi mba’e che ajapóva che Ru ohejágui chéve ajapo, ohechauka porã mávapa che. Peẽ katu ndapegueroviái, ndaha’éigui peẽ che ovecha. Che ovecha kuéra niko oikuaa che ñe’ẽ ha ou che rapykuéri, ha che aikuaa ichupe kuéra. Che ame’ẽ ichupe kuéra tekove opa ára guarãva, ha araka’eve ha’e kuéra noñehundi mo’ãi, ha avave ndoipe’a mo’ãi che hegui. Upe che Ru ome’ẽva chéve tuichave opa ite mba’égui, ha avave ndaikatu mo’ãi oipe’a ipógui. Che Ru ha che peteĩnte.

Ñandejára Jesucristo Ñe’ẽ.