MARTES NOVENA SEMANA

MARTES NOVENA SEMANA

Ñahendúta Tupã Ñandejára Ñe’ẽ San Pedro ohai va’ekue                           3, 11b-15a. 17-18

Che pehẽnguekuéra:

Peipotákena toguahẽ pe ára Tupã Ñandejára oporo mbojovaketaha, ha peñeha’ã to guahẽ pya’e. Upéva upe árape, yvága oñehundíta tatápe, ha opa mba’e yvága pegua hykúne tata rendýpe. Ñande katu ñaha’arõ peteĩ yvága ha yvy ipyahúva, Tupã Ñandejára he’i va’ekue ome’ẽtaha. Ha upépe opa ite mba’e oikóta Tupã Ñandejára oipota háicha.

Upévare che pehẽnguekuéra ahayhu etéva, peñe ha’ãmba itéke ani Tupã Ñandejára pende juhu mba’eve ivaívape. Ta pende juhu uvei peimeha hendive py’a guapýpe, ko’ã mba’e peha’arõ aja. Peikuaáke, Jesucristo ñane ra’arõ kuaágui ikatuha ñane pysyrõ. Ko’ã mba’ére voi niko Pablo ku ñane irũ jahayhu etéva, omondo va’ekue peẽme kuatia ha’e ohai va’ekue, arandu Tupã Ñandejára ome’ẽ va’ekue ichupe reheve.

Che pehẽngue kuéra ahayhu etéva, peẽ niko peikuaáma voi ko’ã mba’e ojehu mboyve. Peñangarekóke pende jehe ani umi heko añáva pene mbotavy ha pende reraha, ha péicha pe’a upe peime porãhágui. Peikuaa porãve uvei Ñandejára Jesucristo ñande pysyrõhárape, ha ta peikuaave imborayhu. Ñamomba’e guasu ichupe Ko’ágä  ha opa ára. Amén.

Tupã Ñandejára Ñe’ẽ.

SALMO ÑEMBOHOVÁI      89, 2-4. 10. 14. 16)

R. Tupä Ñandejára, nde hína ore jeroviaha.

Umi yvyty opu’ã mboyve,

ko yvy ha yvyvóra ojejapo mboyve,

yma ite guive opa árape guarã,

nde hína Tupã Ñandejára. R.

Nde upe yvypórape remondóva oiko haguã ichugui  yvy

ichupe kuéra erévo: “Tapeho jevy yvýpe pepa.”

Mil áño niko ndéve guarã ku ára ohasa va’ekuéicha,

opa jevýmava, térã ku pyhare mbykýicha, pya’e ohasáva. R.

Amo 70 áño rupi jaikove, imbaretevéva ohupity 80,

heta ñamba’apo pohýi ha jahasa asy rei,

umíva pya’e ohasa ha upéicha avei ñande rekove. R.

Ára ko’ẽre ore moenyhẽ ne mborayhúgui

ikatu haguã ore py’a rory roikove aja pukukue.

Ne rembiguáikuéra apytépe to jehecha ne rembiapo,

ha ita’ýra kuéra apytépe nde reko mimbipa. R.

ALELUIA Cf. Ef 1, 17-18

Aleluia.

Ñandejára Jesucristo Túva to hesape ñane korasö

ñamomba’e haguä ha’arömby upe ñañe henóiva ipype.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                 12, 13-17

Upe ramo omondo hikuái Jesús rendápe mbovymi fariséo ha Herodes ndiveguáva, omoñuhã haguã Jesúspe, ha he’ívare omoĩ vai haguã ichupe. Ko’ãva oho ha he’i ichupe: Mbo’ehára, roikuaa niko añetévante ereha, ndoguapyiha nde rehe mba’eve oje’éva nde rehe, ha neremañaiha avavére rehecha haguã mba’eichaguápa ha’e. Roikuaa heko itépe rembo’eha Tupã Ñandejára rape. Iporã piko rome’ẽ viru mburuvicha guasu Romape guápe, térãpa nahániri?

Jesús katu ohecha kuaa hova mokõiha hikuái, ha he’i: Mba’ére piko pe che moñuhãse? Pehechauka chéve pe viru peme’ẽva jepi.

Ha ombohasa ichupe hikuái. Jesús oporandu ichupe kuéra: Máva ra’ãnga ha máva réra piko ko oĩva hese?

Ha’ekuéra he’i: Mburuvicha guasu Roma pegua.

Jesús he’i ichupe kuéra: Néi, peme’ẽ mburuvicha guasúpe mburuvicha guasu mba’éva, ha Tupãme Tupã Ñandejára mba’éva.

Ha ijurujái joa opytávo.

Ñandejára Jesucristo Ñe’ẽ