MARTES SEMANA XXI DURANTE EL AÑO

MARTES SEMANA XXI DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Tesalónica guápe  2, 1- 3a. 14-17

Ko’ágã , che pehẽnguekuéra, Ñandejára Jesucristo ou jevy haguã rehegua, ha ñande joaju hendivére niko rojerure peẽme, ani peheja avave pene mbotavy térã pene mondyise he’ívo peẽme oguahẽma hague Ñandejára ouha ára. Ikatúne oime oimo’ãva ore ro’e hague upéva Espíritu rupi, roñemoñe’ëháme térã kuatia ñe’ẽme. Ani peheja avave pene mbotavy. Upéva upe ára mboyve, oikóta ñepu’ã guasu Tupã Ñandejárare ha oúta pe tekove aña oñehundi va’erã.

Upevarã pene renói va’ekue  Tupã Ñandejára, marandu porã ore romoerakuãva rupi, peike haguã avei peẽ Ñandejára Jesucristo reko mimbipápe.

Aipórõ, ore pehẽnguekuéra, pejepytaso ha ani pende resarái umi ore pombo’e va’ekuégui, ta ha’e ore ñe’ẽ tee rupi, térã kuatiañe’ẽ rupi. Ñandejára Jesucristo voi ha Tupã ñande Túva, ñande rayhúva ha ome’ẽva’ekue  ñandéve vy’a opa’ỹva, ha ñeha’arõ kuaa ipy’a porã rupi.

Tupã Ñandejára Ñe’ẽ.

SALMO ÑEMBOHOVÁI    95, 10-13

Opavave: Ñandejára ñande ruvicha guasu hína.

Tupä Ñandejára ñande ruvicha guasu hína.

Hatã omoĩ hendápe ko yvy, ha ndaipóri omongu’éva.

Ha’e oisãmbyhy tekojojápe tetã nguéra. O.

To vy’a yvága ha yvy.

To sununu pe yguasu ha opa ipype oĩva.

To vy’a umi ñu ha opa mba’e ipype oĩva. O.

Vy’águi to sapukái umi yvyra ka’aguy pegua.

To jepurahéi Tupä Ñandejára renondépe, ha’e ou ko yvy oisãmbyhy haguã. O.

Tekojojápe ko yvy oisãmbyhýta, ha añetépe tetãnguéra.

Tupã Ñandejára ou yvy oisambyhývo. O.

ALELUIA Heb 4, 12

Aleluia.

Tupä Ñandejára Ñe’ë hekove ha ikatupyry;

oiporavo umi ivai ha iporäva ha opa mba’e

oïva ñane korasöme.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 23, 23-26

Upe ramo Jesús he’i péicha: Pejererekóke peẽ Moisés rembiapoukapy mbo’eha ha peẽ fariséokuéra rova mokõi! Peẽ peme’ẽ Tupã Ñandejárape 10gui peteĩ pene ménta, anís ha komíno jepe.

Upéi katu pende resarái Tupã Ñandejára rembiapoukapy pene mbo’eha pende reko joja va’erãha, peporo poriahuvereko va’erãha ha pejerovia va’erãha Tupã Ñandejárare.

Ko’ãva raẽvete pejapo va’erã ha upéi katu umi ambue. Peẽmoakãhára  resatũ, peẽ niko pende ýgui pembogua ñati’ũ ha pemokõ kavaju.

Pejererekóke peẽ Moisés rembiapoukapy mbo’eha ha peẽ fariséo kuéra rova mokõi! Peẽ pemopotĩ pende mbayru ha pene ña’ẽmbe ijapéguio, hyepy katu henyhẽ umi mba’e pemonda va’ekuégui, pene mba’e pota tarovágui. Ehendúke, nde fariséo resatũ. Emopotĩ raẽ ne mbayru ha ne ña’ẽmbe hyepýguio, péicharõ ipotĩne avei ijapéguio.

Ñandejára Jesucristo Ñe’ẽ.