MARTES SEMANA XXVII TO

Ñahendúta Tupã Ñandejára Ñe’ẽ San Pablo ohai va’ekue Galacia guápe                         1, 13-24

Che pehẽnguekuéra:

Oiméne pehendu oje’e ramo mba’épa raka’e yma pe che reko, ha mba’éichapa akaguai mbarete Tupã Ñandejára iglésiare, ha añeha’ã ahundi. Aikoha árape judío rekópe, umi che rapicha judío che javeguápe tapykuete aheja, che rakate’ỹgui umi ñande ru ypy kuerakue jepokuaaháre.

Tupã Ñandejára che poravo aju mboyvéma voi ko yvy ári, ha tuichágui pe imborayhu che renói. Ha’e oipotávo, oikuaauka chéve Ta’ýra, amoasãi haguã imarandu oporopysyrõva, umi judio’ỹva apytépe. Ha upérõ ndahái va’ekue  añomongeta mba’eveichagua yvypóra ndive. Ha ndahái avei Jerusalénpe ahechávo umi apóstolma va’ekuépe che mboyve.

Upéva rangue, aha pya’ete Arábiape, ha upéi aju jevy Damáscope.

Mbohapy áño haguépe aha Jerusalénpe aikuaávo Céfaspe (Pedro) ha hendive aime 15 ára. Ha ndahechái ambue kuéra apóstolpe, ahecha jepe Santiágope, Ñandejára pehẽngue. Tupã Ñandejára renondépe ha’e peẽme, ko ahaíva hína peẽme añeteguaha.

Upéi aha Siria ha Cilíciape. Umi ñane pehẽngue  Jesucristo iglésia pegua oĩva Judéape, nda che kuaái va’ekue. Ohendúnte hikuái oje’e ramo: “Ku oiko va’ekue  ñane muña, ko’ágä  oiko omoasãi pe marandu porã ymave ohundise va’ekue.” Ha upévare oguerohory Tupã Ñandejárape.

Tupã Ñandejára Ñe’ẽ.

SALMO ÑEMBOHOVÁI      138, 1-3. 13-15

R. Ajépa tuicha ite upe ne rembiapokue.

Ore Jára, nde reipyguara che reko ha nde che kuaa.

Nde reikuaa aguapy ha apu’ã ramo, mombyry guive

reikuaa upe che akãme arekóva.

Reikuaa aguata térã aguapy ramo, opa ajapóva reikuaa. R.

Opa che retepy ne rembiapokue,

ha che sy rye pýpe che apo ñepyrũ va’ekue.

Che mopirĩmba ha che mbojurujái upe che rehe rejapóva.

Upévare romomba’e guasu. Tuicha ite ne rembiapokue. R.

Che mopirĩmba ha che mbojurujái upe che rehe rejapóva.

Che angapy peve reikuaa, ha umi che kãngue

oñemoĩ ramo ojuehe kañyháme, añembojoapýrõ ojuehe yvy guýpe. R.

ALELUIA Lc 11. 28

Aleluia.

Ovy’ a ite niko umi ohendu ha

ojapóva Tupä Ñandejára ñe’ë.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                       10, 38- 42

Upe ramo Jesús oipykúi hape ha oguahẽ peteĩ táva’ipe, ha upépe omoguahẽ ichupe hógape peteĩ kuña hérava Marta. Ha’e oguereko peteĩ ikypy’y hérava María, oguapýva Jesús ypýpe ohendu haguã umi he’íva.

Marta katu, oikóva hína heta hembiapo reheve, oñemboja Jesús rehe ha he’i ichupe: Che Jára, na nde py’apýipa che kypy’y che rejaha cheño ko tembiapo heta ite reheve? Ere ichupe ta che pytyvõ.

Jesús katu he’i ichupe: Marta, Marta, rejepy’apy heta iterei mba’ére, ha peteĩ mba’énte tekotevẽ. María ojapyhy pe iporãvéva, ha avave ndoipe’a mo’ãi ichugui .

Ñandejára Jesucristo Ñe’ẽ