MARTES TERCERO DE PASCUA

MARTES TERCERO DE PASCUA

Primera lectura:

Ko’ágä   ñahendúta Tupã Ñandejára ñe’ẽ Apóstolkuéra rembiapokuépe oĩ háicha              

          7, 51 – 8, 1a

Esteban he’ive ichupe kuéra: Peẽ katu akóinte pende py’a hatã va’ekue, pende apysa ha pende py’a umi Tupã Ñandejára  rehe ojerovia’ỹ vaicha. Peñemoĩ mante Espíritu Santo rehe. Penderu kuéra ypykuéicha avei peẽ. Máva umi maranduháravape piko ndoguereko asýi raka’e penderu kuéra ypykue? Ha’e kuéra ojuka umi oñe’ẽ va’ekuépe upe imarangatúva ou va’erãre, ha ágã oúma ramo ko imarangatúva, peẽ pe pu’ã hese ha pejuka.

Peẽ pehupity va’ekue upe tembiapoukapy Tupã Ñandejára remimbou rupi, ndapejapóinte upe he’íva.”

Ohendúvo ko’ã mba’e, ipochy eterei ha hãi pururũmba hikuái Esteban rehe. Ha’e katu, enyhẽva Espíritu Sántogui, oma’ẽ yvágare ha ohecha Tupã Ñandejára reko mimbipa, ha Jesúspe oñembo’ýva hína Tupã akatúape. Upérõ he’i: Pema’ẽmi! Ahecha ojepe’a ramo yvága, ha pe yvypóraicha ou va’ekuépe, oĩva Tupã akatúape.

Ha’ekuéra katu omboty ijapysa, ha sapukái pópe ojeity hikuái Esteban ári. Oguenohẽ upe távagui ha ojapi ichupe itápe ojuka peve. Ha umi oikóva mba’e rechaha ramo oheja ijao kuéra peteĩ mitã rusu Saulo héravape, oñangareko haguã umívare.

Itápe ojejapi aja, Esteban oñembo’e he’ívo: “Jesús, che Jára, ereko che espíritu.” Upéi oñesũ ha osapukái hatã: “Che Jára, eheja rei ichupe kuéra iñangaipa!” Upéva he’ívo, omano.

Saulo oĩva hína upépe, he’i iporãha Estéban ojejuka.

Tupã Ñandejára Ñe’ẽ.

SALMO ÑEMBOHOVÁI      30, 3cd-4. 6. 7b. 8a. 17. 21ab

R. Tupã Ñandejára nde pópe amoĩ opa che rekove.

O bien:

Aleluia.

Nde upe che rehe reñangarekóva nde guýpe añemo’ã

ha che renohẽ jejopy vaígui,

nde hína che rehe reñangarekóva che renohẽ jejopy vaígui.

Nde réra rehehápe eñangareko che rehe ha che sãmbyhy. R.

Nde pópe amoĩ opa che rekove, che Jára Tupã añetete,

nde hína pe che pytyvõtáva.

Ndéve nembojeguaru umi ta’ãnga omomba’e guasúva,

Tupä Ñandejára, ne mborayhu che mbovy’a. R.

Tupä Ñandejára, ehecha kuaa kena chéve.

Nde, che rayhúgui che pe’a jejopy vaígui.

Ñandejára, ani che rejátei añemotỹ ndéve añembo’e haguére.

To ñemotï umi iñañáva. R.

ALELUIA Jn. 6, 35ab

Aleluia.

“Che hína pe mbuja Tekove rehegua.

Umi oúva che rendápe naiñembyahýi mo’äi araka’eve”,

he’i Ñandejára Jesucristo.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Juan omombe’u háicha. Pejapysaka porãtapa hese?                                                        6, 30-35

Upe ramo oporandu hikuái Ñandejára Jesucrístope:

-Mba’e hechapyrãva piko rejapóta ore rohecha haguã ha péicha roguerovia haguã pe eréva? Emombe’u oréve mba’e-mba’épa rejapo. Ore ru kuéra ypykue ho’u va’ekue maná yvy ojeiko’ỹháme, he’i háicha Tupä Ñandejára ñe’ẽ: ‘Ome’ẽichupe kuéra ho’u haguã mbujape yvága pegua.’

Jesús he’i ichupe kuéra:

-Añetehápe ha’e peẽme: Pe Moisés ome’ẽ va’ekue peẽme ndaha’éi hína mbujape yvága pegua. Che Ru hína upe ome’ẽva mbuja añetete yvága pegua. Upe mbujape che Ru ome’ẽva niko oguejy yvágagui ha omoingove opavavépe.

Ha’e kuéra he’i ichupe:

-Karai, opa árape kena eme’ẽ oréve upéva pe mbujape.

 Ha Jesús he’i ichupekuéra:

-Che hína pe mbuja oporomoingovéva. Upe che rendápe oúva naiñembyahýi chéne araka’eve. Ha upe che rehe ojeroviáva, ndaijyuhéi mo’ãi araka’eve.

Ñandejára Jesucristo Ñe’ẽ.