LECTURAS MARTES XXI DEL TIEMPO ORDINARIO

LECTURAS MARTES XXI DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Tesalónica guápe 2, 1- 8

Peẽ voi, ore pehẽngue, peikuaa pe ore jeho pende recha haguã ndareíri hague. Peikuaa háicha katu, Filípospe rojeja’o ha rojerereko asy rire ramo jepe, Tupã Ñandejára ore pytyvõ romombe’u haguã peẽme hembipota, py’a guasúpe ha ñorairõ atã pa’ũme.

Roikuaágui ndorojavyiha pe romombe’úvape, ha noroñe’ẽi ave rohekágui mba’e vai térã roporombotavy haguã. Tupã Ñandejára katu omboaje ore rembiapo ha ome’ẽ oréve romoasãi haguã hembipota, ha upéicha roñe’ẽ. Ndorojapói mba’eve rojehayhuka haguã avavépe, Tupã Ñandejára mante, oipyguaráva ore py’a. Peikuaa háicha, araka’eve na porombojuru he’ẽi va’ekue ñe’ẽ porãreve, térã roiporu ro’éva romono’õ haguã viru. Tupã Ñandejára oikuaa upéva.

Araka’eve ndorohekái va’ekue ore mbojerovia avave: peẽ térã oimeraẽva. Ikatu va’erã mo’ã ramo jepe roñeñanduka peẽme Cristo remimbo’ekue ramo, roiko mitãicha pende apytépe. Peteĩ sy omongakuaa ha oñangarekóva imemby teére, upéicha avei, pende rayhu etereígui, rome’ẽse va’erã mo’ã peẽme, ndaha’éi Ñandejára Ñe’ẽ añónte, ore rekove guive katu. Mba’éicha ite peve nipo oguahẽ pende rayhu eterei!

Tupã Ñandejára Ñe’ẽ.

SALMO ÑEMBOHOVÁI 138, 1-6

Opavave: Ore Jára, nde reipyguara che reko ha nde che kuaa.

Ore Jára, nde reipyguara che reko ha nde che kuaa.
Nde reikuaa aguapy ha apu’ã ramo,
mombyry guive reikuaa upe che akãme arekóva,
reikuaa aguata térã aguapy ramo,
opa mba’e ajapóva reikuaa. O.

Ñe’ẽ ne’ĩra gueteri osẽ che jurúgui,
ha nde, che Jára, reikuaáma upe ha’étáva hína;
Che kupépe ha che renondépe, upépe reime.
Nde pópe che rereko, che rehe reñangareko.
Peteĩ arandu ijojaha’ÿva che rasapáva:
ijyvate etereígui ndaikatúi ahupity. O.

ALELUIA Heb 4, 12

Aleluia.
Tupã Ñandejára Ñe’ẽ hekove ha ikatupyry;
oiporavo umi ivai ha iporäva ha opa mba’e
oïva ñane korasöme.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 23, 23-26

Upe ramo Jesús he’i péicha: Pejererekóke peẽ Moisés rembiapoukapy mbo’eha ha peẽ fariséokuéra rova mokõi! Peẽ peme’ẽ Tupã Ñandejárape 10gui peteĩ pene ménta, anís ha komíno jepe.

Upéi katu pende resarái Tupã Ñandejára rembiapoukapy pene mbo’eha pende reko joja va’erãha, peporo poriahuvereko va’erãha ha pejerovia va’erãha Tupã Ñandejárare.

Ko’ãva raẽvete pejapo va’erã ha upéi katu umi ambue. Peẽ moakãhára resatũ, peẽ niko pende ýgui pembogua ñati’ũ ha pemokõ kavaju.
Pejererekóke peẽ Moisés rembiapoukapy mbo’eha ha peẽ fariséokuéra rova mokõi!

Peẽ pemopotĩ pende mbayru ha pene ña’ẽmbe ijapéguio, hyepy katu henyhẽ umi mba’e pemonda va’ekuégui, pene mba’e pota tarovágui. Ehendúke, nde fariséo resatũ. Emopotĩ raẽ ne mbayru ha ne ña’ẽmbe hyepýguio, péicharõ ipotĩne avei ijapéguio.

Ñandejára Jesucristo Ñe’ẽ.