LECTURAS MARTES XXIII DEL TIEMPO ORDINARIO

LECTURAS MARTES XXIII DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Colosas guápe 2, 6-15

Che pehẽnguekuéra: Pemoguahẽvo pende pype Crístope pende Jára ramo, peiko va’erã Cristo reheguáva ramo, peñe mbohapo va’erã ipype, peñe mopyenda hatã hese, pende jeroviáre, peñe mbo’e haguéicha ha peme’ẽvo pende aguyje opa ára Tupã Ñandejárape.

Peñe ñangarekóke: ani peñe mbotyryryuka umi pene mbotavyséva japúpe ha mba’e reípe, ha’e kuéra niko noñemopyendái Crístope, umi mba’e rerovia yma guarépente ha umi pu’aka ko yvy ári guápe oporoguerekóva poguýpe.

Tupã Ñandajára reko ojekuaapa Crístope, ha ipype peẽ peimemba, Cristo ha’égui opa espíritu pu’aka ha oñemomba’éva moakãhára. Ipype avei peẽ pejeapi’ouka va’ekue, ndaha’éi jeapi’o yvypóra ojapo va’ekuépe, jeapi’o Tupã Ñandejára voi ojapo va’ekuépe katu, pene mbojoajúvo Crístore ha oipe’ávo pende hegui pende reko vai.

Peñe mongaraívo, peẽ peñeñotỹ va’ekue Cristo ndive ha peikove jevy avei hendive, pejeroviágui Tupã Ñandejára pu’akapa rehe ha omopu’ã jeýva ichupe omanóva apytégui.

Peẽ niko yma, pemano va’ekue pene angaipápe ha pende rete ojeapi’o’ỹme; ko’ágä katu Tupã Ñandejára pene moingove Cristo ndive, pene pysyrõvo opa pene angaipágui. Tupã Ñandejára oheja reipa ñandéve pe tembiapoukapy rupive ñande jopy va’ekue hína, oikutúvo pe kurusúre. Tupã Ñandejára oipe’a ipu’akaha umi espíritugui, ha Cristo rupi omoñakãity ichupe kuéra opavave renondépe, ombotyryrývo hapykuéri ohechauka haguã ha’e ipu’akaveha.

Tupã Ñandejára Ñe’ẽ.

SALMO ÑEMBOHOVÁI 144, 1-2. 8-11

Opavave: Tupã Ñandejára imba’e porã ha oporoporiahuvereko.

Tupã che Jára, ndéve romomba’e guasúta che ruvicha guasu.
Nde réra amomba’éta opa árape.
Ára ko’ẽre romomba’e guasúta,
ha nde réra amomba’éne opa ára. O.

Tupã Ñandejára imba’e porã ha oporoporiahuvereko.
Ha’e oporohayhu ha hasýpe ipochy,
opavavépe ha’e ohecha kuaa,
ha ohecha ramo opa hembiapokue. O.

Opa ne rembiapokue ta ne momba’e guasu, Ñandejára,
opa nde rehe ojeroviáva ta ne momba’e guasu.
Ha’ekuéra to moerakuã tuichaha upe ne retã,
ha’ekuéra toikuaauka nde ne mbareteha. O.

ALELUIA Cf. Jn 15, 16

Aleluia.
Ñandejára Jesucristo he’i: “Che poiporavo yvypóra apytégui, peho haguä ha heta mba’e porä osë haguã pende hegui
ha umi mba’e porä toiko opa árape”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 6, 12-19

Umíva umi árape, Jesús oho peteĩ yvytýpe oñembo’évo, ha pyhare pukukue oñembo’e Tupã Ñandejárape. Ko’ẽ rire ohenói umi hemimbo’épe, ha oiporavo 12 ijapytéguikuéra, ohenóiva apóstol.

Umíva va’ekue : Simón, ombohéra va’ekue avei Pedro; Andrés, Simón ryvy; Santiago, Juan, Felipe, Bartolomé, Mateo, Tomás; Santiago, Alfeo ra’y; Simón, oñembohérava avei “Tetã rayhupára”, Judas, Santiago ra’y; ha Judas Iscariote, pe upéi omoñuhã va’ekue Jesúspe.

Jesús oguejy upe yvytýgui hemimbo’ekuéra ndive, ha opyta peteĩ ñúme. Oñemboaty ra’e upépe umi hapykuéri oikóva ha heta Judeagua, Jerusalén pegua ha umi Tiro rembe’ýpe oikóva, ha Sidónpe. Oguahẽ ra’e hikuái ohendúvo Jesúspe, ha ha’e omonguera haguã ichupekuéra imba’asýgui. Umi ipype oguerekóva mba’epochy okuerapa avei. Ha upéicha, opavave opokosénte jepe Jesús rehe, oporomonguerágui pe pokatu osẽva ichugui .

Ñandejára Jesucristo Ñe’ẽ